Iona

4 KUA kelea lahi ni e mena ia kia Iona ti ita ai a ia.

2 Ti liogi a ia kia Iehova, kua pehe atu, Ko e hanai Iehova na e, nakai kia ko e haku a kupu ia he nofo ai au ke he haku motu? Ko e mena ia ne fakatepetepe au ke hola ki Tasesa; ha kua iloa e au a koe ko e Atua fakaalofa noa, mo e fakaalofa hofihofi, kua fakatuai hau a ita, to lahi hau a fakaalofa, kua tokihala foki a koe mo e nakai fakahoko ai e kelea.

3 Ko e hanai foki, Iehova na e, kua ole atu e au kia koe, ke uta kehe e koe haku a moui, ha kua mitaki ke mate au, ka e kelea ke moui.

4 Ti pehe mai a Iehova, Kua mitaki kia ke ita a koe?

5 Ti fano ai a Iona he maga, ti nofo a ia ke he fahi uta he maga, ti eke ai e ia ke he mena ia e fale api mana, ti nofo ai a ia ke he malu he fale ato kitia ai e ia po ke heigoa e mena ke hoko ke he maga.

6 Ti fakatupu ai e Iehova ko e Atua e kakaiona ti fakavihia ai a ia ki luga a Iona, ti eke a ia mo fakamalu ki luga hana ulu, ke laveaki mai a ia he hana matematekelea. Ti fiafia lahi a Iona ha ko e kakaiona.

7 Kua matafatafa ata e aho a pogipogi ti kotofa ai he Atua e moko; kua kai e ia e kakaiona ti fifigo ai.

8 Kua hake e la ti kotofa ai he Atua e matagi vevela mai he fahi uta; ti velagia e ulu a Iona he la, ti lolelole ai a ia, mo e ole atu ke mate a ia, kua pehe atu, Kua mitaki ke mate ai au, ka e kelea ke moui.

9 Ti pehe mai e Atua kia Iona, Kua mitaki kia ke ita ai a koe ha ko e kakaiona? Ti pehe atu a ia, Kua mitaki ke ita ai au, ke hoko ke he mate.

10 Ti pehe mai a Iehova, Kua fakaalofa a koe ke he kakaiona, ko e mena nakai gahua ai e koe, po ke fakatupu ai e koe; ko e mena ne tupu ai ke he po taha, ti fifigo ai ni ke he po taha.

11 Ka e nakai kia fakaalofa au ki Nineva ko e maga lahi, ha ha i ai e tau tagata kua mua he tokologa ke he taha teau uafulu e afe, kua nakai iloa e lautolu po ko fe e lima matau ha lautolu, po ko fe e lima hema ha lautolu, ti ha ha i ai foki e tau manu huifa loga.