Tau Salamo

78 HAKU motu na e, kia fanogonogo mai a mutolu ke he haku a fakatufono; kia haga mai ha mutolu a tau teliga ke he tau kupu he hoku gutu.

2 To vagahau atu e au ke he tau kupu fakatai; to talatala atu e au e tau kupu galo tali mai i tuai,

3 Ko e tau kupu ne fanogonogo ki ai a tautolu, mo e iloa ni e tautolu; ne talahau mai foki kia tautolu he tau matua ha tautolu.

4 Nakai fufu e tautolu e tau kupu ia ke he fanau ha lautolu, ka e talahau atu ke he hau ne mui atu e tau fakahekeaga a Iehova; ko e hana malolo foki, mo e hana tau mena ne eke e ia.

5 Kua fakatu e ia e fakatufono ia Iakopo, ti tuku atu e ia e poaki kia Isaraela, ko e tau mena ia ne poaki e ia ke he tau matua ha tautolu, ke fakailoa ke he fanau ha lautolu;

6 Kia iloa ai he hau ne mui atu, ko e fanau nakala fanau mai; kia tutupu hake a lautolu, mo e talahau atu ke he fanau ha lautolu;

7 Kia tua ai ni a lautolu ke he Atua; kia nakai nimo foki ia lautolu e tau gahua he Atua; ka kia omaoma a lautolu ke he hana tau poaki;

8 Kia nakai tuga ha lautolu a tau matua a lautolu, ko e hau haia ne matauka, mo e fakafualoto; ko e hau nakai taute ha lautolu a tau loto; ti nakai fakamoli ha lautolu a tau loto ke he Atua.

9 Ko e fanau a Efaraimo ha i ai e tau kanava akau, ko lautolu kua fana ke he tau fana; ne liliu ki tua a lautolu ke he aho ne tau ai.

10 Nakai taofi e lautolu e maveheaga he Atua, ti nakai fakai foki ke o a lautolu ke he puhala he hana fakatufono;

11 Ne fakanimonimo foki e lautolu hana tau gahua, mo e tau mana ne fakakite e ia kia lautolu.

12 Ne eke mana e ia ki mua he tau matua ha lautolu ke he motu ko Aikupito, ko e fonua a Soana.

13 Ne ihi e ia e tahi, mo e fakafano age ai a lautolu, ne fakatu e ia e puke tahi tuga ne tumutumu.

14 Ne takitaki e ia a lautolu ke he aolagi ke he aho; ka ko e maama he afi ne takitaki aki a lautolu ke he po katoa.

15 Ne ihi e ia e tau kau maka ke he tutakale; ne fakainu e ia a lautolu tuga ne ha i ai e loloto lahi.

16 Ne fakatafe mai e ia e tau vai lele mai he maka tumau; ne fakatafe hifo e ia e vai tuga ne tau vailele.

17 Ka kua au atu ni he hala a lautolu kia ia, he fakafualoto a lautolu kia ia ne Mua ue atu ke he motu nakai fai vai.

18 Ne kamatamata e lautolu e Atua ke he tau loto ha lautolu, ke he ha lautolu a ole mena kai ke he ha lautolu a manako lahi.

19 Ne fai kupu a lautolu ke he Atua, kua pehe a lautolu, kua maeke kia ke he Atua, ke laulau mai e tau mena kai ke he tutakale?

20 Kitiala, ne ta e ia e kaumaka ti tafe mai ai e vai; ti puapuā e tau vai lele; ka kua maeke kia kia ia ke foaki mai e tau mena kai? kua maeke kia ke tamai e ia e tau kakano manu mo e hana tau tagata?

21 Ko e mena ia ne fanogonogo mai ai a Iehova ti ita mai ai a ia; ne tafu e afi kia Iakopo, ne hake foki e ita kia Isaraela;

22 Ha kua nakai tua a lautolu ke he Atua, nakai falanaki foki a lautolu ke he fakamouiaga mai ia ia.

23 Ati fekau ai e ia e tau aolagi i luga; ne hafagi foki e ia e tau gutuhala he lagi.

24 Ne fakato hifo e ia kia lautolu e manai ke kai: ne foaki mai e ia e tau mena kai mai he lagi ma lautolu.

25 Ne kai he tagata e tau mena kai he tau iki; ne tuku mai e ia e tau mena ke kai ai e lautolu ke mamakona ai.

26 Ne fakaohooho mai e ia ke he lagi e matagi uta; ko e hana malolo foki ne fakaagi ai e ia e matagi toga.

27 Ne fakato hifo e ia ki luga ia lautolu e tau manu tuga ne efuefu; ko e tau manu lele foki tuga ne oneone he tahi;

28 Ne fakato ai e ia ke he vaha loto he heaga api ha lautolu; kua takai ai e mena ne nonofo ai a lautolu.

29 Ne kai e lautolu, ti mamakona lahi ai a lautolu; ha ko e mena tamai e ia kia lautolu e tau mena ne manako lahi ki ai a lautolu.

30 Nakai la mavehe a lautolu mo e mena ne manako lahi a lautolu ki ai; ha ha he tau gutu ha lautolu e mena kai ha lautolu,

31 Ti hoko ai kia lautolu e ita he Atua, kua kelipopo e ia e tau tagata gako ha lautolu; kua liti e ia ki lalo e tau fuata a Isaraela.

32 Pete ni he tau mena oti ia kua hala mau a lautolu, pete ni he hana tau mana ka e nakai tua a lautolu.

33 Ko ia foki ne mole atu ai ha lautolu a tau aho kua teao, mo e ha lautolu a tau tau kua fakaatukehe.

34 Ka kelipopo e ia a lautolu ti kumi ai e lautolu kia ia; kua liliu foki a lautolu ke kumi fakamakutu ke he Atua.

35 Ti manatu hifo ai a lautolu ko e Atua ko e ha lautolu a maka tumau ia; ko e Atua mua ue atu ko ia ne laveaki a lautolu.

36 Ka kua fakavai e lautolu a ia ke he tau gutu ha lautolu, mo e pikopiko a lautolu kia ia ke he tau alelo ha lautolu.

37 Ti nakai mau ha lautolu a tau loto kia ia, mo e nakai fakamoli a lautolu ke he hana maveheaga.

38 Ka ko ia, kua fakaalofa hofihofi, ne fakamagalo e ia ha lautolu a tau mahani kelea; nakai fakaotioti e ia a lautolu; kua mafoki kehe lagaloga e ia hana ita, nakai fakatupu foki e ia hana ita katoatoa.

39 Ha kua manatu e ia ko e tau tagata hokoia a lautolu; ko e matagi kua mole atu, ti nakai tuai liu mai.

40 Lagaloga ne fakafualoto a lautolu kia ia ke he tutakale; ti fakahukia a ia ke he vao.

41 Ne liu foki kamatamata e lautolu e Atua; mo e fakahogohogo e lautolu a ia, ne Tapu i Isaraela.

42 Ai manatu e lautolu hana lima, ko e aho ne fakamoui ai e ia a lautolu mai he matematekelea;

43 Ko e hana tau fakamailoga ne eke e ia i Aikupito, mo e hana tau mana ne eke e ia ke he fonua a Soana.

44 Ne faliu toto e ia ha lautolu a tau vailele, ko e ha lautolu a tau vai lele ikiiki foki kia nakai inu ai a lautolu.

45 Ne fakafano atu e ia kia lautolu e tau garova, ne kai a lautolu; ko e tau rane foki ne moumou a lautolu.

46 Ne age e ia e tau fua he tau fonua ha lautolu ke he tau hē kasili, ne age foki e ia ha lautolu a tau gahua ke he tau hē akerisi.

47 Ne tamate e ia ha lautolu a tau vine ke he uha tuli, ne tamate ha lautolu a tau sukamina ke he makalili lahi.

48 Ne tuku age e ia ha lautolu a tau manu ke he uha tuli, mo e tuku foki ha lautolu a tau fuifui mamoe ke he uhila.

49 Ne fakahoko e ia hana ita kaka kia lautolu, ko e vale, mo e ita, mo e matematekelea, he hana fakafano atu e tau fekafekau ha i ai e malaia.

50 Ne taute e ia e puhala mo e hana ita; nakai taofi foki e ia a lautolu mai he mate, ka kua tuku atu e ia ha lautolu a moui ke he tatalu;

51 Ne keli foki e ia e tau tama uluaki oti i Aikupito; ko e mataulu he malolo ha lautolu ha he tau fale ie a Hamo.

52 Ne uta e ia hana tau tagata tuga ne tau mamoe, ne takitaki e ia a lautolu tuga ne fuifui ke he tutakale.

53 Ne takitaki e ia a lautolu ti nakai haofia, ti nakai matakutaku a lautolu; ka ko lautolu kua ita ki ai kua mahakava a lautolu ke he tahi.

54 Ne fakahoko e ia a lautolu ke he hana fonua tapu, ko e mouga nai ni ne moua e ia ke he hana lima matau.

55 Ne tutuli e ia e tau motu kehe ki mua ha lautolu, ne vevehe atu e ia kia lautolu e fonua kua fafati, kua fakanofo foki e ia e tau magafaoa a Isaraela ke he tau fale ie ha lautolu.

56 Ka kua kamatamata e lautolu mo e fakafualoto ke he Atua mua ue atu; nakai omaoma foki a lautolu ke he hana tau fakatufono.

57 Kua liliu foki a lautolu, mo e fakavai tuga ne tau matua ha lautolu; kua liliu a lautolu tuga ne kaufana fakavai.

58 Ne fakahukia e lautolu a ia he tau mena tokoluga ha lautolu; ne fakatupu foki e lautolu hana ita tafuā ke he tau tupua ha lautolu ne ta.

59 Ne fanogonogo a Atua, ti ita lahi ai a ia, mo e vihiatia lahi ai e ia a Isaraela;

60 Ti tiaki e ia e faituga i Sailo, ko e fale uta fano ne nofo fakalataha ai a ia mo e tau tagata.

61 Ne tuku atu foki e ia hana malolo ke fakapaea, mo e hana fulufuluola ke he lima hana ne fai fi mai.

62 Ne tuku atu e ia hana motu ke he pelu, ti kua ita lahi a ia ke he hana tau tagata.

63 Ko e ha lautolu a tau fuata kua kai he afi; ha lautolu a tau tamafine foki kua nakai uhu lologo e taha kia lautolu.

64 Ko e ha lautolu a tau ekepoa kua mamate ke he pelu; ti nakai tagi aue ha lautolu a tau takape.

65 Ti ala ai e Iki tuga ne taha ne mohe; tuga ne toa kua kalaga fiafia ha ko e uaina.

66 Ti kua ta e ia e tau tau ha lautolu ne fai fi kia ia; kua age e ia ma lautolu e mā tukulagi.

67 Ne tiaki foki e ia e fale ie a Iosefa, nakai fifili foki e ia e magafaoa a Efaraimo.

68 Ka kua fifili e ia e magafaoa a Iuta, ko e mouga ko Siona kua finagalo ki ai a ia.

69 Kua eke foki e ia e faituga hana tuga ne tau mena tokoluga, tuga ne lalolagi kua fakave e ia ke tukulagi,

70 Kua fifili e ia hana fekafekau ko Tavita, ne ta mai e ia a ia mai he tau lotopa mamoe;

71 Ne ta mai e ia a ia ne mui atu ke he tau mamoe fai punua, kia fagai ai e ia a Iakopo hana motu, ko Isaraela foki hana tau tagata.

72 Kua fagai e ia a lautolu ke lata mo e fakamoli he hana loto; kua takitaki foki e ia a lautolu mo e iloilo he hana tua lima.