Ioane

14 AUA neke fakaatukehe ha mutolu a tau loto; kia tua a mutolu ke he Atua, ati tua mai a foki kia au.

2 Ne loga e tau mena ke nonofo ai ke he fale he haku a Matua; ane nakai, po kua tala atu e au kia mutolu; ke fano au ke taute taha mena ke nonofo ai a mutolu.

3 Kaeke foki ke fano au mo e taute taha mena ke nonofo ai a mutolu, to liu mai au, ti talia mai foki e au a mutolu kia fakalataha mo au, kia nonofo ai a mutolu ke he mena ha i ai au.

4 Kua iloa e mutolu e mena ke fano au ki ai, kua iloa foki e mutolu e puhala.

5 Kua tala age a Toma kia ia, Ko e Iki na e, nakai iloa e mautolu e mena ke haele a koe ki ai, ke maeke fefe ia mautolu ke iloa e puhala?

6 Kua tala age a Iesu kia ia, Ko au nai ko e puhala, mo e kupu moli, mo e moui; nakai hau taha ke he Matua, ka noa mo au.

7 Ane iloa e mutolu au, po kua iloa foki e mutolu haku Matua; ke kamata nai foki he iloa a ia e mutolu; ke kitia foki e mutolu a ia.

8 Kua pehe age a Filipo kia ia, Ko e Iki na e, kia fakakite mai e koe e Matua kia mautolu, ati kuenaia ha mautolu a manako.

9 Kua tala age a Iesu kia ia, Filipo na e, kua leva he nofo au kia mutolu, ka e nakai kia iloa e koe au? Ko ia kua kitia au, kua kitia foki e ia e Matua; ti kua tala mai fefe e koe, Fakakite mai e Matua kia mautolu?

10 Nakai kia talia e koe, ko au ha i loto he Matua, ko e Matua foki ha i loto ia au? Ko e tau kupu kua tala atu e au kia mutolu, nakai talahau noa e au, hoko au; ka ko e Matua ha ne nofo i loto ia au, ko ia ni kua eke e tau gahua nai.

11 Kia talia e mutolu au, ko au ha i loto he Matua, ko e Matua foki ha i loto ia au; ka nakai, kia talia e mutolu au, ha ko e tau gahua ia.

12 Ko e moli, ko e moli, ke tala atu e au kia mutolu, ko ia ne tua mai kia au, to eke e ia ni e tau gahua ne eke e au; to eke foki e ia e tau mena ke mua ke he tau mena nai, ha ko e mena fano au ke he haku a Matua.

13 Ko e tau mena oti foki ke ole atu ai a mutolu ke he haku a higoa, to eke ni e au, kia fakaheke ai e Matua ha ko e Tama.

14 Kaeke ke ole atu e mutolu ha mena ke he haku a higoa, to eke ni e au.

15 Kaeke ke fakaalofa mai a mutolu kia au, kia omaoma mai a mutolu ke he haku a tau poaki.

16 To tala age foki au ke he Matua, ati foaki mai ai e ia kia mutolu e taha Lagomatai, kia nofo mau a ia ia mutolu tukulagi;

17 Ko ia ko e Agaga ke tupu ai e kupu moli, nakai maeke he lalolagi ke talia a ia, ha ko e mena nakai kitia a ia, ti nakai iloa a ia; ka ko mutolu, kua iloa e mutolu a ia, ha ko e mena nofo mau a ia kia mutolu, ha i ai foki a ia ki loto ia mutolu.

18 Nakai toka e au a mutolu ko e tau tagata kua mamate e tau matua; to hau au kia mutolu.

19 Toe tote ti nakai kitia he lalolagi au, ka e kitia e mutolu au. Kua moui au, ko e mena ia ke momoui ai a mutolu.

20 Ko e aho ia ke iloa ai e mutolu, ko au ha i loto he haku a Matua; ko mutolu foki ha i loto ia au, ko au foki ha i loto ia mutolu.

21 Ko ia ha i ai haku a tau poaki, mo e omaoma ki ai, ko ia haia ke fakaalofa kia au; ko ia foki ke fakaalofa kia au, to ofania a ia he haku a Matua; to fakaalofa foki au kia ia, mo e fakakite atu au kia ia.

22 Kua tala age kia ia a Iuta, (nakai ko Isakariota a ia), Ko e Iki na e, ko e heigoa e mena ke fakakite mai ai a koe kia mautolu, ka e nakai ke he lalolagi?

23 Kua tala age a Iesu, kua pehe age kia ia, Kaeke ke fakaalofa mai taha kia au, ke oma e ia haku a kupu; ti fakaalofa ni haku a Matua kia ia; to o mai foki a maua kia ia, ti nonofo a mautolu fakalataha mo ia.

24 Ko ia kua nakai fakaalofa kia au, nakai oma e ia haku a tau kupu; ko e kupu foki ke fanogonogo a mutolu ki ai, nakai ko e haku haia, ka ko e kupu he Matua ne fakafano mai au.

25 Ko e tau mena ia kua tala atu ai e au kia mutolu, he nonofo a tautolu.

26 Ka ko e Lagomatai, ko e Agaga Tapu haia, ko ia ke fakafano mai he Matua ke he haku a higoa, to fakaako e ia a mutolu ke he tau mena oti kana; to fakamanatu foki e ia kia mutolu e tau mena oti kua tala atu ai e au kia mutolu.

27 Kua tuku atu e au kia mutolu e monuina; ko e monuina haku ke ta atu e au kia mutolu; nakai ta atu e au kia mutolu tuga ne ta atu he lalolagi. Aua neke fakaatukehe ha mutolu a tau loto; ua matakutaku foki a mutolu.

28 Kua fanogonogo mai a mutolu, kua tala atu au kia mutolu, To fano au, mo e liu mai au kia mutolu. Kane mai ke fakaalofa a mutolu kia au, po kua kolikoli a mutolu he haku ne tala atu, To fano au ke he Matua; ha ko e mena mua haku a Matua ia au.

29 Ka e tala atu ainei e au kia mutolu ka e nakala eke, kia talia e mutolu ka hoko mai.

30 Nakai tuai vagahau atu au kia mutolu ke he tau kupu loga; ha ko e hau ne fai e iki he lalolagi nei, ka e nakai moua e ia taha mena kia au.

31 Ka kia iloa he lalolagi, kua fakaalofa au ke he Matua, tuga e poaki mai foki he Matua kia au, pihia he eke e au. Tutu a ki luga, kia o kehe a a tautolu.