2 Korinito

4 KO e mena ia kua nakai fakalolelole ai a mautolu ha ha ia mautolu e feua nai, ha kua ofania a mautolu.

2 Ka kua tiaki e mautolu e tau mena galo ke ma ai, nakai o fano a mautolu mo e mahani pikopiko, nakai fiofio e mautolu e kupu he Atua; ka kua fakailoa a mautolu ke he tau loto manamanatu he tau tagata oti ki mua he Atua he fakakite atu e mautolu e kupu moli.

3 Kaeke foki kua ufia ha mautolu a vagahau mitaki, kua ufia ia kia lautolu kua malaia.

4 Kua fakapouli he atua he lalolagi nai e tau manatu ha lautolu kua nakai tua, neke kikila atu kia lautolu e maama he vagahau mitaki he lilifu a Keriso, ko ia kua fakatai ke he Atua.

5 Nukua nakai fakamatala atu e mautolu a mautolu, ka ko Keriso Iesu, ko e Iki; ko mautolu nai foki, ko e tau fekafekau ha mutolu ha ko Iesu.

6 Ha ko e Atua, ko ia ne tala age kia kikila mai e maama he pouli, kua fakakikila mai a ia ke he tau loto ha mautolu, ko e maama ke iloa ai e lilifu he Atua ke he fofoga a Iesu Keriso.

7 Ka e ha ha ia mautolu e koloa nai ke he tau kapiniu kelekele, kia ha ha he Atua e lahi ue atu he malolo, ka e nakai mai ia mautolu.

8 Kua matematekelea a mautolu ke he tau mena oti, ka e nakai fakaatukehe; kua fakahakuhaku a mautolu ka e nakai mahalohalo noa;

9 Kua favale mai kia mautolu, ka e nakai tiaki a mautolu; kua palu hifo a mautolu, ka e nakai mahaikava;

10 Kua uta fano ke he tino nakai noa e keliaga he Iki ko Iesu, kia fakakite foki e moui a Iesu ke he tau tino ha mautolu.

11 Ha ko mautolu kua momoui, kua tuku mau atu a mautolu ke he mate ha ko Iesu, kia fakakite ai e moui a Iesu ke he tau tino mole vave ha mautolu.

12 Hanai, kua gahua e mate ki loto ia mautolu, ka ko e moui ki loto ia mutolu.

13 Ka e ha ha ia mautolu e loto kua tua, tuga e mena ne tohi, Ne tua au, ko e mena ia ne vagahau atu ai au; ko mautolu foki kua tua a mautolu, ko e mena ia kua vagahau atu ai na mautolu.

14 Ha kua iloa e mautolu, ko ia ne liu foki fakatu mai e Iki ko Iesu, to liu fakatu mai foki e ia a mautolu ha ko Iesu, mo e tuku atu a mautolu fakalataha mo mutolu.

15 Ha ko e tau mena oti ma mautolu ia, kia fakalahi ai e fakahekeaga ke he Atua he fakaaue he tokologa ha ko e fakaalofa noa kua fakalahi mai.

16 Ko e mena ia kua nakai fakalolelole ai a mautolu; ha ko e mena pete ni he moumou ha mautolu a tagata i fafo, kua fakafou ha mautolu a tagata i loto ke he taha aho mo e taha aho.

17 Ha ko e matematekelea ha mautolu kua mama mo e mole vave, ke tupu mai ai ma mautolu e monuina kua mua ue atu e mamafa mo e tukulagi.

18 Kua nakai manamanatu e mautolu e tau mena kua kitia, ka ko e tau mena nakai kitia; ha ko e tau mena kua kitia kua mole vave ia, ka ko e tau mena nakai kitia kua tukulagi ia.