Tau Fakafili

13 KUA liu mahani kelea e fanau a Isaraela ki mua a Iehova; ti tuku atu ai e Iehova a lautolu ke he lima he tau tagata Filisitia ke he tau tau ne fagofulu.

2 Ko e taha tagata i Soraa he magafaoa a Tano, ko Manoa hana higoa; ti tufua hana hoana, nakai ni fanau a ia.

3 Kua fakakite mai e agelu a Iehova ke he fifine, kua pehe mai kia ia, Kitiala, kua tufua a koe, kua nakai fanau a koe, ka to fatu ni a koe, mo e fanau ai e koe e tama tane.

4 Ko e hanai, a koe, neke inu a koe e uaina po ke kava, ti aua neke kai a koe ha mena kelea;

5 Ha ko e mena, kitiala, to fatu ni a koe, ti fanau ai e koe e tama tane; ti nakai hifi foki hana a ulu, ha ko e mena eke e tama mo naseri ke he Atua, ke kamata mai he hana fanauaga; to kamata foki e ia ke laveaki mai a Isaraela he lima he tau tagata Filisitia.

6 Ti fano e fifine kua tala age a ia ke he hana tane, kua pehe age, Ne hau kia au e tagata he Atua, ko e hana tino mai kua tuga ne tino he agelu he Atua, ti matakutaku lahi ni au; nakai huhu age e au kia ia po ke hau i fe a ia; ti nakai tala mai foki e ia kia au hana higoa.

7 Ne pehe mai foki a ia kia au, Kitiala, to fatu ni a koe, ti fanau ai e koe e tama tane; ko e hanai aua neke inu e koe e uaina po ke kava, ti aua neke kai a koe ha mena kelea, ha ko e mena eke e tama mo naseri ke he Atua, ke kamata mai he hana fanauaga, ke hoko ke he hana aho ke mate ai.

8 Ti liogi atu ai a Manoa kia Iehova, kua pehe atu, Kua ole atu e au kia koe ma Iki na e, ke liu mai ai kia maua e tagata he Atua ne fakafano mai e koe, mo e fakakite mai e ia kia maua e tau mena ke eke ai e maua ke he tama ka fanau mai.

9 Kua fanogonogo mai e Atua ke he leo a Manoa, ti haele mai foki e agelu he Atua ke he fifine he nofo ai a ia ke he fonua; ka ko e tane hana ko Manoa nakai ha i ai mo ia.

10 Ti alumaki e fifine, ti poi a ia, mo e tala age ai e ia ke he hana tane, kua pehe age, Kitiala, kua fakakite mai kia au e tagata ne hau kia au he aho tuai.

11 Ti matike a Manoa, mo e mui atu ai ke he hana hoana; kua hoko atu a ia ke he tagata, ti pehe atu a ia kia ia, Ko koe kia e tagata ne vagahau mai ai ke he fifine? Ti pehe mai a ia, Ko au ni haia.

12 Ti pehe atu a Manoa kia ia, Hanai, kia hoko ai hau a vagahau; ko e heigoa e mena kua lata ai mo e tama, mo e mena ke eke ai e maua kia ia?

13 Ti pehe mai e agelu a Iehova kia Manoa; Kia omaoma e fifine ke he tau kupu oti ne tala age e au kia ia;

14 Aua neke kai ai e ia e tau mena oti kua tupu mai he vine; ti ua inu a ia e uaina mo e kava, ti aua neke kai ai e ia e tau mena kelea oti; kia omaoma a ia ke he tau mena oti ne poaki age e au kia ia.

15 Ti pehe atu a Manoa ke he agelu a Iehova, Kua taofi e maua a koe ke taute ai e maua e punua koti māu.

16 Ti pehe mai e agelu a Iehova kia Manoa, Pete he taofi e koe au nakai kai au hau a tau mena kai; kaeke ke eke e koe e poa huhunu, kia eke ai e koe kia Iehova; ha kua nakai iloa e Manoa, ko e agelu a Iehova a ia.

17 Ti pehe atu a Manoa ke he agelu a Iehova, Ko hai kia e higoa hau, kia fakalilifu atu ai a maua kia koe ka hoko ai hau a vagahau?

18 Ti pehe mai ai e agelu a Iehova kia ia, Ko e ha ne huhu mai a koe ke he higoa haku, ha ko e mena galo ia.

19 Ti uta ai e Manoa e punua koti katoa mo e poa mena kai, ti eke poa ai e ia ki luga he maka kia Iehova, ti eke ai he agelu e tau mana, ti kitekite ki ai a Manoa mo e hana hoana;

20 Kua hake e puho he afi mai luga he fatapoa ke he lagi, ti hake ai e agelu a Iehova ke he puho he afi he fatapoa, ka kua kitekite ki ai a Manoa mo e hana hoana ti fakaveveli fakafohifo ai a laua ke he kelekele.

a ia.

21 Ka e nakai liu fakakite mai ai e agelu a Iehova kia Manoa mo e hana hoana; ti iloa ai e Manoa ko e agelu a Iehova a ia.

22 Ti pehe atu a Manoa ke he hoana hana, to mamate ni a taua, ha kua kitia e taua e Atua.

23 Ka e pehe mai e hoana kia ia, Ane mai kua finagalo a Iehova ke tamate a taua po kua nakai talia e ia e poa huhunu, mo e poa mena kai mai he tau lima ha taua, po kua nakai fakakite mai foki e tau mena oti nai; po kua nakai tala mai foki e ia kia taua e tau mena pihia, tuga ne tala mai ai ke he aho nai.

24 Ti fanau ai he fifine e tama tane, ti ui ai hana higoa ko Samisoni; kua tupu e tama, kua fakamonuina e Iehova a ia.

25 Ti kamata ai he Agaga a Iehova ke fakalagalaga a ia i Mahane-tano ke he vaha loto a Soraa mo Esitaola.