2 Tau Patuiki

2 KUA finagalo a Iehova ke ta hake a Elia ke he hiohio ke he lagi, ti o ai a Elia mo Elisaio i Kilikala.

2 Ti pehe age a Elia kia Elisaio, Kia nofo a a koe i hinai, ha kua fakafano atu e Iehova au ki Peteli. Ka e pehe age a Elisaio kia ia, Kua moui a Iehova, kua moui foki a koe, nakai toka e au a koe. Ti o hifo ai a laua ki Peteli.

3 Ti o age e vahega he tau perofeta ha ha i Peteli kia Elisaio kua pehe age a lautolu kia ia, Kua iloa nakai e koe ko e uta kehe ne fai e Iehova hau a iki ia koe ke he aho nai? Ti pehe age a ia, Kua iloa tuai e au; kia fakamamate a a mutolu.

4 Ti pehe age a Elia kia ia, Elisaio na e, kia nofo ā a koe i hinai, ha kua fakafano atu e Iehova au ki Ieriko. Ka e pehe age a ia, Kua moui a Iehova, kua moui foki a koe, nakai toka e au a koe. Ti hoko atu ai a laua ki Ieriko.

5 Ti fakatata ai e vahega he tau perofeta ha ha i Ieriko kia Elisaio, kua pehe age a lautolu kia ia, Kua iloa nakai e koe ko e uta kehe ne fai e Iehova hau a iki ia koe ke he aho nai? Ti pehe age ai a ia, Kua iloa tuai e au; kia fakamamate ā a mutolu.

6 Ti pehe age a Elia kia ia, Kia nofo ā a koe i hinai, ha kua fakafano atu e Iehova au ki Ioritana. Ti pehe age a ia, Kua moui a Iehova kua moui foki a koe, nakai toka e au a koe. Ti o ai a laua tokoua.

7 Ti o age ai e tau tagata tokolimagofulu he vahega he tau perofeta, kua tutu mamao atu a lautolu ke he mena ke kitekite atu ai; ti tutu ai a laua tokoua ke he kauvai a Ioritana.

8 Ti toto e Elia hana tapulu lahi, kua vakai ai e ia, ti ta aki e ia e vai, ti vevehe ua ai ke he taha fahi mo e taha fahi. Ti o atu ai a laua tokoua ke he hala toka momo.

9 Kua hohoko a laua ke he fahi atu, ti pehe age a Elia kia Elisaio, Tala mai la e koe po ke heigoa e mena ke eke e au māu ka kua nakaila uta kehe ai au ia koe. Ti pehe age ai a Elisaio, Kia ta mai kia au ua e veveheaga he agaga ha ha ia koe.

10 Ti pehe age a ia, Ko e mena uka kua tala mai ai e koe; kaeke ke kitia e koe au ka uta kehe ai au ia koe, ti eke ai pihia kia koe; ka ko e mena ka nakai kitia e koe au, ti nakai eke pihia.

11 Kua o atu ai a laua, mo e vagahau ai fakahaga; kitiala, ko e kariota afi mo e tau solofanua afi, kua vevehe kehekehe ai a laua tokoua ti hake ai a Elia ke he hiohio ke he lagi.

12 Kua kitia foki e Elisaio, ti tagi ai a ia, Haku matua na e, haku matua na e, ko e tau kariota a Isaraela mo e hana kau heke solofanua. Kua nakai tuai kitia e ia a ia, ti toto ai e ia hana tau tapulu, ti hēhē ua ai e ia.

13 Kua uta foki e ia e tapulu lahi a Elia ne to hifo ia ia, ti liu atu a ia, ti tu ai a ia ke he kauvai a Ioritana.

14 Ti toto ai e ia e tapulu lahi a Elia ne to hifo ia ia, ti ta aki e ia e vai, mo e pehe age, Ko fe kia a Iehova ko e Atua a Elia? Kua ta foki e ia e vai, ti veveheua ai ke he taha fahi mo e taha fahi; ti fano ai a Elisaio ke he fahi atu.

15 Kua kitia foki a ia he vahega he tau perofeta ha ha i Ieriko, mai he mena ne kitekite ai a lautolu, ti pehe age ai a lautolu, Ha ha ia Elasaio e agaga a Elia. Ti o age a lautolu ke fonofono a ia ti fakaveveli fakafohifo ai a lautolu kia ia.

16 Ti pehe age a lautolu kia ia, Kitiala, ha ha he tau fekafekau hāu tokolimagofulu e tagata malolo, kia o a lautolu mo e kumi e lautolu hāu a iki, neke ta hake he Agaga a Iehova a ia, mo e liti ai a ia ke he taha mouga, po ke taha pahua. Ka e pehe age a ia, Aua neke fakafano atu e mutolu.

17 Kua fakamakamaka age a lautolu kia ia, ato ma ai a ia, ti pehe age a ia, Kia fakafano atu ā. Ti fakafano atu ai e lautolu e tau tagata tokolimagofulu. Tolu e aho ne kumi ai e lautolu a ia; ka e nakai kitia e lautolu a ia.

18 Ti liliu mai a lautolu kia ia, he nofo ai a ia i Ieriko, ti pehe age a ia kia lautolu, Nakai kia pehe atu au kia mutolu, Ua o a mutolu?

19 Ti pehe age e tau tagata he maga kia Elisaio, Kitiala, kua mitaki e mena ne tu ai e maga nai, tuga ne fioia e koe ma iki na e; ka e kelea e vai, ti talue foki e kelekele.

20 Ti pehe age a ia, Ta mai la kia au e kumete fou, mo e tuku ai e masima. Ti ta age ai e lautolu kia ia.

21 Ti fano a ia ke he mena ne puna ai a vai, ti liti e ia e masima ki ai, mo e pehe age Kua talahau mai pehe a Iehova, Kua fakamagalo e au e vai nai; nakai tupu mai ai foki e mate po ke talue.

22 Ti magalo ai e vai, ke hoko ni ke he aho nai, ke lata mo e kupu a Elisaio, ne vagahau ai e ia.

23 Kua hake a ia mai he mena ia ki Peteli; kua hake a ia ke he puhala, ti o age ai e tau tama ikiiki mai he maga, kua va a lautolu kia ia, kua pehe age a lautolu kia ia, Hake ā, ko e ulu kila na e; hake ā, ko e ulu kila na e.

24 Ti haga ki tua a ia, kua kitekite age a ia kia lautolu, ti kaialu age a ia kia lautolu ke he higoa a Iehova. Ti o mai ai ua e urosa fifine he vao, ti hēhē ai e tau tama tokofagofulu ma ua ia lautolu.

25 Ti fina age ai a ia he mena ia ke he mouga ko Karamelu; ti liu atu ai a ia he mena ia ki Samaria.