Esekielu

10 TI kitekite au, kitiala ke he lagi likoliko ha ha i luga he tau ulu he tau kerupi, ko e mena tuga ne maka safaira, ne tino mai tuga ne fakatai he nofoaiki ne tu mai ki luga ha lautolu.

2 Ti tala age a ia ke he tagata ne tapulu ai ke he ie lino, kua pehe age, Kia hu atu a koe ke he vaha he tau veliveli i lalo he kerupi, mo e fakapuke e koe hau a tau lima ke he tau malala kaka mai he vaha he tau kerupi, mo e gana ai e koe ki luga he maga. Ti hu age ai a ia he kitekite atu au.

3 Ne tutu foki e tau kerupi ke he fahi matau he fale he hu atu ai e tagata; ti fakapuke ai e lotopa i loto ke he aolagi.

4 Ti hake ai e lilifu a Iehova mai luga he kerupi, kua hoko ke he gutuhala he fale; ti fakapuke ai e fale ke he aolagi, ne puke foki e lotopa ke he kikila he lilifu a Iehova.

5 Ne logona foki e tuputupu he tau tapakau he tau kerupi, kua hoko ni ke he lotopa i fafo, kua tuga ne leo he Atua hana e malolo oti kana ka vagahau mai a ia.

6 Kua oti foki he poaki atu e ia ke he tagata ne tapulu ai ke he ie lino, kua pehe atu, Kia uta e koe e afi mai he vaha he tau veliveli, mai he vaha he tau kerupi; ti hu age ai a ia, mo e tu tata age ke he veli.

7 Ti fakaolo atu ai e lima he kerupi mai he vaha he tau kerupi ke he afi ha ha he vaha he tau kerupi, kua uta ai, mo e tuku ai ke he lima hana ne tapulu ai ke he ie lino; kua talia e ia ti hu atu ai a ia ki fafo.

8 Ne kitia ke he tau kerupi e fakatino he lima he tagata i lalo he tau tapakau ha lautolu.

9 Ti kitekite ai au kitiala, ko e fa e veliveli ke he tapa he tau kerupi, takitaha e veli ke he tapa he tau kerupi takitaha; ne tino mai foki e tau veliveli tuga ne tino mai he maka tasisa.

10 Ko e ha lautolu a tino mai foki, ne tino fakalataha a lautolu ne fa, tuga ne veliveli ha i loto he veliveli.

11 Ka o a lautolu, ti o ai a lautolu ke he ha lautolu a tau fahi ne fa, nakai tafilu a lautolu he o, ka ko e mena ne hagao ki ai e ulu ne mumui atu a lautolu ki ai; nakai liliu a lautolu he o a lautolu.

12 Ko e ha lautolu a tau tino oti, mo e ha lautolu a tau tua, mo e ha lautolu a tau lima, mo e ha lautolu a tau tapakau, katoa mo e tau veliveli kua puke ai ke he tau mata, kua agaagai ai, ko e tau veliveli ni ha lautolu ne fa.

13 Ka ko e tau veliveli, ne ui age e taha kia lautolu, he logona ai e au, Ko e veliveli na e.

14 Kua takitaha a lautolu mo e tau mata ne fa; ko e mata fakamua ko e mata he kerupi haia, ko e mata ne ua aki, ko e mata he tagata haia, ko e mata ne tolu aki ko e mata he leona haia, ko e mata ne fa aki, ko e mata he aeto haia.

15 Ti hake ai e kerupi ki luga. Ko e mena moui haia ne kitia ai e au ke he vailele ko Kepara.

16 Ka o foki e tau kerupi ti o ai e tau veli ke he tau fahi ha lautolu; ka fofola ai ki luga he tau kerupi ha lautolu a tau tapakau ke hake ai mai he lalolagi, nakai liliu kehe e tau veli he tau fahi ha lautolu.

17 Ka tutu a lautolu ti tutu ai a lautolu na; ka ta hake foki a lautolu ki luga, ti ta hake ai a lautolu na he ha i ai ia lautolu e agaga he mena moui.

18 Ti fina atu ai e lilifu a Iehova mai he gutuhala he fale, mo e tu ai ki luga he tau kerupi.

19 Ti fofola ai ki luga he tau kerupi ha lautolu a tau tapakau, ne o hake ai a lautolu he lalolagi, ne kitekite au ki ai; ne o atu a lautolu ti fakalataha mo lautolu e tau veliveli, ti tutu ai a lautolu ke he mena ne huhu atu ai ke he gutuhala he fahi uta he fale a Iehova; ti ha ha i luga ia lautolu e lilifu he Atua a Isaraela.

20 Ko e mena moui haia ne kitia e au i lalo he Atua a Isaraela ke he vailele ko Kepara; ti iloa e au ko e tau kerupi ni a lautolu.

21 Ne takitaha mo e hana tau mata ne fa, ne takitaha foki mo e hana tau tapakau ne fa; ko e fakatino foki he tau lima he tagata ha ha i lalo he tau tapakau ha lautolu.

22 Ko e fakatino foki he tau mata ha lautolu, ko e tau mata ia ne kitia ai e au tata age ke he vailele ko Kepara ko e ha lautolu a tino mai, mo lautolu ni; ne takitaha ni mo e fano fakahako atu ki mua hana.