2 Tau Patuiki

6 KUA pehe age e fanau he tau perofeta kia Elisaio. Kitiala, ko e mena kua nonofo ai a tautolu mo koe, kua nakai lata ma tautolu he apiapi.

2 Kia o a mautolu ki Ioritana, ti takitaha e tagata mo e uta ai hana akau, ti ta aki e mautolu ke he mena ia e fale ke nonofo ai a tautolu. Ti pehe age a ia kia lautolu, Ati o a a mutolu.

3 Ti pehe age ai e taha, Kia o a tautolu mo mautolu ko e hau a tau fekafekau. Ti pehe age ai a ia, To o a tautolu.

4 Ti o ai a lautolu mo ia, kua hoko foki a lautolu ki Ioritana, ti ta akau ai e lautolu.

5 Kua hio he taha hana akau, ti to kehe ai e toki ke he vai; ti tagi ai a ia, kua pehe age, Oi te! ko e iki na e; ko e mena ne ogo mai e au.

6 Ti pehe age e tagata he Atua, Ko e mena fe ne to hifo ai? Ti fakakite age ai e ia e mena. Ti hahala mai e ia e akau, kua liti atu ki ai; ti holo ai e lapatoa.

7 Ti pehe age a ia, Kia uta a. Ti fakaolo atu e ia hana lima, kua toto atu ki ai.

8 Kua tau e patuiki a Suria kia Isaraela, ti pulega a ia mo e hana tau fekafekau kua pehe age, Ko e mena na, mo e mena na ke he api ai au.

9 Ti fakafano atu he tagata he Atua ke he patuiki a Isaraela, kua pehe atu, A koe, neke fina age a koe ke he mena na, ha kua o hifo ki ai e tau tagata Suria.

10 Ti fakafano age he patuiki a Isaraela e falu ke he mena ne tala age ai he tagata he Atua mo e fakakite atu kia ia; ti fakamoui ai e ia a ia ke he mena ia, nakai ko e laga taha po ke laga ua.

11 Ko e mena ia ne fakaatukehe lahi e loto he patuiki a Suria; ti ui age e ia ke he hana tau fekafekau, ti pehe age a ia kia lautolu, Nakai kia fakakite mai e mutolu kia au, po ko hai ia tautolu kua kau mo e patuiki a Isaraela.

12 Ti pehe age ai e taha he hana tau fekafekau, Ko e iki na e, ko e patuiki, nakai ni fai tagata pihia; ka ko Elisaio ko e perofeta ha ha i Isaraela, kua fakakite e ia ke he patuiki a Isaraela e tau mena kua vagahau ai e koe ke he hau a poko mohe.

13 Ti pehe age a ia, Kia o a a mutolu, ti kitekite a mutolu ke he mena ne ha i ai a ia, to fakafano atu e au falu ke tapaki a ia. Ti talahau ai kia ia kua pehe age, Kitiala, ha ha i Totana a ia.

14 Ti fakafano atu ai e ia ke he mena ia e tau solofanua, mo e tau kariota, mo e kau lahi. Kua hohoko atu a lautolu he po, ti agaagai ai a lautolu ke he maga.

15 Kua uhu matike e fekafekau he tagata he Atua, mo e fano a ia ki fafo, kitiala ko e kau kua agaagai mai ke he maga mo e ha lautolu a tau solofanua mo e tau kariota. Ti pehe mai ai hana fekafekau kia ia, Oi te fakaalofa! ko e iki na e, ko e heigoa kia e mena ke eke ai e tautolu?

16 Ti pehe atu ai a ia, Ua matakutaku a koe, ha kua mua he tokologa ha ha ia tautolu, kia lautolu ha ha ia lautolu.

17 Ti liogi e Elisaio, kua pehe atu, Iehova na e, kia fakaala e koe hana tau mata ke kitia ai e ia. Ti fakaala ai e Iehova e tau mata he fuata, ti kitia e ia, kitiala, kua puke e mouga ke he tau solofanua mo e tau kariota afi, kua agaagai a lautolu kia Elisaio.

18 Kua o hifo e kau kia ia ti liogi e Elisaio kia Iehova, kua pehe atu, Kia fakamatapouli e koe e tau tagata nai. Ti fakamatapouli ai e ia a lautolu, ke lata mo e kupu a Elisaio.

19 Ti pehe age a Elisaio kia lautolu, Nakai ko e puhala nai, ti nakai ko e maga nai; kia mumui mai a a mutolu kia au to takitaki atu e au a mutolu ke he tagata kua kumi e mutolu. Ka e takitaki e ia a lautolu ki Samaria.

20 Kua hohoko atu a lautolu ki Samaria, ti pehe atu ai a Elisaio, Iehova na e kia fakaala e koe e tau mata he tau tagata nai ke kitia ai e lautolu. Ti fakaala ai e Iehova e tau mata ha lautolu, ti kitia e lautolu, ti kitiala, ha ha i loto a Samaria a lautolu.

21 Kua kitia he patuiki a Isaraela a lautolu ti pehe age a ia kia Elisaio, Haku matua na e, to keli kia e au a lautolu,

22 Ti pehe age a ia, Aua neke keli; ke keli kia e koe a lautolu kua moua e koe ke he hau a pelu mo e hau a kaufana? Kia fakatoka atu e koe ki mua ha lautolu e tau mena kai mo e maga vai, ke kai ai e lautolu mo e inu, ti o a lautolu ke he iki ha lautolu.

23 Ti taute ai e ia e tau mena kai loga ma lautolu; kua kai ai e lautolu mo e inu, ti fakafano atu e ia a lautolu, ti liliu atu ai a lautolu ke he iki ha lautolu. Ti nakai liliu mai foki e tau kau a Suria ke he motu a Isaraela.

24 Kua mole atu e tau mena na, ti fakapotopoto ai e Penihata ko e patuiki a Suria hana tau kau oti, ti o hake a lautolu, ti pa takai ai e lautolu a Samaria.

25 Ti lahi ai e hoge i Samaria; kitiala, kua patakai ai e lautolu e maga, ato fakafua ai e ulu asini ke he tau tupe ario ne valugofulu, mo e veveheaga ne fa aki e kapekirio ke he tau tupe ario ne lima.

26 Kua fina age ai e patuiki a Isaraela ki luga he kaupa, ti tagi atu ai e taha fifine kia ia, kua pehe atu, Ko e iki na e, ko e patuiki kia lagomatai mai a e koe.

27 Ti tali mai a ia kia ia, Kaeke ke nakai lagomatai mai e Iehova kia koe, ko e tau mena fe kia ke lagomatai atu ai e au kia koe? mai he mena ne taholi ai e saito kia, po ke mai he holiaga vine.

28 Ti pehe mai e patuiki kia ia, Ko e heigoa kia? Ti tali atu ai a ia, Ne pehe mai e fifine nai kia au, Kia ta mai e koe e tama tane hāu ke kai ai e taua ke he aho nai, to kai ai e taua e tama haku a pogipogi.

29 Ti tunu ai e maua e tama haku ti kai ai e maua a ia. Ti pehe atu au kia ia ke he taha aho, kia ta mai ā e koe e tama hau ke kai ai e taua a ia; ka kua fufu e ia hana tama.

30 Kua logona he patuiki e tau kupu he fifine, ti hehe ai e ia hana tau tapulu; kua fina age ai a ia ki luga he kaupa, ti kitia ai he motu, kitiala, kua tapulu ai a ia ke he ie talatala ke he hana tino ki loto.

31 Ti pehe age ai a ia, Kia eke pihia he Atua kia au, mo e lafilafi ki ai, kaeke ke po he aho nai ka e tumau agaia ki luga hana e ulu a Elisaio ko e tama a Safata.

32 Ka kua nofo a Elisaio ke he hana fale, kua nonofo a lautolu mo e tau patu. Ti fakafano ai he patuiki e tagata mai mua hana; ka kua nakaila hoko mai e fekau kia ia, ti pehe age a ia ke he tau patu, Kua kitia kia e mutolu kua fakafano mai he tama na he keli tagata ke hio kehe haku ulu? Kitekite la a mutolu, ka hau ai e fekau ti pa e mutolu e gutuhala, mo e taofi e mutolu ke mau ai a ia ke he gutuhala; nakai kia mui mai kia ia e pohū he tau hui he hana iki?

33 Kua nakaila oti hana vagahau mo lautolu, kitiala, kua hifo mai e fekau kia ia. Ti pehe age a ia, Kitiala, mai ia Iehova a malaia nai; ko e heigoa kia e mena ke tatali atu ai au kia Iehova?