Numera

29 KO e mahina fitu, ke he aho fakamua he mahina, kia eke ai e mutolu e fakapotopotoaga tapu; aua neke eke ai e mutolu ha gahua mamafa; ko e aho haia ha mutolu ke ulo ai e pu.

2 Kia eke ai e mutolu e poa huhunu ke eke mo mena manogi mitaki kia Iehova; ko e taha punua povi tane, ti tahi e mamoe tane, ti fitu e punua mamoe tau taha, kua katoatoa e mitaki.

3 Ko e ha lautolu a tau poa mena kai, ko e falaoa mitaki kua laku mo e puke lolo tolu e omera ke he povi tane; ti ua e omera ke he mamoe tane;

4 Ko e omera taha ke he taha punua mamoe, ti pihia ke he tau punua mamoe ne fitu.

5 Ko e koti tane ne taha, ko e poa ha ko e hala, ke eke mo lukutoto ma mutolu;

6 Ke lafilafi ai ke he poa huhunu he mahina, mo e hana poa mena kai, katoa mo e poa huhunu mau, mo e hana poa mena kai, mo e ha lautolu a tau poa inu, ke lata mo e ha lautolu a kotofaaga, ke eke mo mena manogi mitaki, ko e poa kua eke ke he afi kia Iehova.

7 Kia eke ai e mutolu e fakapotopotoaga tapu ke he aho hogofulu he mahina fitu, kia fakamamahi ai e mutolu a mutolu, ti aua neke eke ai e mutolu ha gahua.

8 Ti ta mai foki e mutolu e poa huhunu kia Iehova, ko e mena manogi mitaki; ko e taha punua povi tane, mo e taha mamoe tane, mo e fitu e punua mamoe tau taha, kua katoatoa e mitaki ma mutolu.

9 Ko e ha lautolu a tau poa mena kai, ko e falaoa mitaki kua laku mo e puke lolo, ko e tolu e omera ke he taha povi tane, ti ua e omera ke he mamoe tane ne taha;

10 Ko e taha omera ke he taha punua mamoe, ti pihia ni ke he tau punua mamoe ne fitu.

11 Ko e taha e koti tane ke eke mo poa ha ko e hala, ke lafilafi ke he poa ha ko e hala ne eke aki e lukutoto, katoa mo e poa huhunu mau, mo e hana poa mena kai, mo e ha laua a tau poa inu.

12 Kia eke ai foki e mutolu e fakapotopotoaga tapu ke he aho hogofulu ma lima he mahina fitu; aua neke eke ai e mutolu ha gahua mamafa; ka e eke ai e mutolu e galue kia Iehova ke he tau aho na fitu.

13 Ti uta ai e mutolu e poa huhunu, ko e poa kua eke ke he afi, koe mena manogi mitaki kia Iehova; ko e tau punua povi tane ne hogofulu ma tolu, mo e tau mamoe tane ne ua, mo e tau punua mamoe tau taha ne hogofulu ma fa, kia katoatoa e mitaki a lautolu.

14 Ko e ha lautolu a tau poa mena kai, ko e falaoa mitaki kua laku mo e puke lolo, taki tolu e omera ke he punua povi tane taha, pihia ke he tau povi tane ne hogofulu ma tolu; ti ua e omera ke he taha mamoe tane, ti pihia ke he tau mamoe tane ne ua.

15 Ko e takitaha e omera ke he punua mamoe, ti pihia ke he tau punua mamoe ne hogofulu ma fa.

16 Ko e taha koti tane ke eke mo poa ha ko e hala, ke lafilafi ke he poa huhunu mau, ko e hana poa mena kai, mo e hana poa inu.

17 Ko e aho ua he galue kia uta e mutolu e tau punua povi tane ne hogofulu ma ua, ko e tau mamoe tane ne ua, mo e tau punua mamoe tau taha ne hogofulu ma fa, kua katoatoa e mitaki.

18 Ko e ha lautolu a tau poa mena kai, mo e ha lautolu a tau poa inu, ma e tau povi tane, mo e tau mamoe tane, mo e tau punua mamoe kia fakalata ia kia lautolu ka totou, ke tuga ne poakiaga.

19 Ti taha e koti tane ke eke mo poa ha ko e hala, ke lafilafi ke he poa huhunu mau, mo e hana poa mena kai, mo e ha laua a poa inu.

20 Ko e aho tolu foki, ko e tau povi tane ne hogofulu ma taha, ko e tau mamoe tane ne ua, mo e tau punua mamoe tau taha ne hogofulu ma fa, kua katoatoa e mitaki.

21 Ko e ha lautolu a tau poa mena kai, mo e ha lautolu a tau poa inu, ma e tau povi tane, mo e tau mamoe tane, mo e tau punua mamoe, kia fakalata kia lautolu ka totou, tuga ne poakiaga.

22 Ti taha e koti tane ke eke mo poa ha ko e hala, ke lafilafi ke he poa huhunu mau, mo e hana poa mena kai, mo e hana poa inu.

23 Ko e aho fa foki, ko e tau povi tane ne hogofulu, ko e tau mamoe tane ne ua, mo e tau punua mamoe tau taha ne hogofulu ma fa, kua katoatoa e mitaki.

24 Ko e ha lautolu a tau poa mena kai, mo e ha lautolu a tau poa inu, ma e tau povi tane, mo e tau mamoe tane, mo e tau punua mamoe, kia fakalata ia kia lautolu ka totou, ke tuga ne poakiaga.

25 Ti taha e koti tane ke eke mo poa ha ko e hala, ke lafilafi ke he poa huhunu mau, ko e hana poa mena kai, mo e hana poa inu.

26 Ko e aho lima foki, ko e tau povi tane ne hiva, ko e tau mamoe tane ne ua, mo e tau punua mamoe tau taha, ne hogofulu ma fa, kua katoatoa e mitaki.

27 Ko e ha lautolu a tau poa mena kai, mo e ha lautolu a tau poa inu, ma e tau povi tane, mo e tau mamoe tane, mo e tau punua mamoe, kia fakalata ia kia lautolu ka totou ke tuga ne poakiaga.

28 Ti taha e koti tane ke eke mo poa ha ko e hala, ke lafilafi ke he poa huhunu mau, mo e hana poa mena kai mo e hana poa inu.

29 Ko e aho ono foki, ko e tau povi tane ne valu, ko e tau mamoe, tane ne ua, mo e tau punua mamoe tau taha ne hogofulu ma fa, kua katoatoa e mitaki.

30 Ko e ha lautolu a tau poa mena kai, mo e ha lautolu a tau poa inu, ma e tau povi tane, mo e tau mamoe tane, mo e tau punua mamoe, kia fakalata ia kia lautolu ka totou, ke tuga ne poakiaga.

31 Ti taha e koti tane ke eke mo poa ha ko e hala, ke lafilafi ke he poa huhunu mau, ko e hana poa mena kai, mo e hana poa inu.

32 Ko e aho fitu foki, ko e tau povi tane ne fitu, ko e tau mamoe tane ne ua, mo e tau punua mamoe tau taha ne hogofulu ma fa, kua katoatoa e mitaki.

33 Ko e ha lautolu a tau poa mena kai foki, mo e ha lautolu a tau poa inu ma e tau povi tane, mo e tau mamoe tane, mo e tau punua mamoe, fakalata ia kia lautolu ka totou, ke tuga ne poakiaga.

34 Ti taha e koti tane ke eke mo poa ha ko e hala, ke lafilafi ke he poa huhunu mau, ko e hana poa mena kai mo e hana poa inu.

35 Ko e aho valu foki kia eke ai e mutolu e fakapotopotoaga, aua neke eke ai e mutolu ha gahua mamafa.

36 Kia ta mai e mutolu e poa huhunu kua eke ke he afi, ko e mena manogi mitaki kia Iehova; ko e taha povi tane, ko e taha mamoe tane, mo e fitu e punua mamoe tau taha, kua katoatoa e mitaki.

37 Ko e ha lautolu a tau poa mena kai, mo e ha lautolu a tau poa inu, ma e povi tane, mo e mamoe tane, mo e tau punua mamoe, fakalata ia kia lautolu ka totou, ke tuga ne poakiaga.

38 Ti taha e koti tane ke eke mo poa ha ko e hala, ke lafilafi ke he poa huhunu mau, mo e hana poa mena kai, mo e hana poa inu.

39 Ko e tau poa hanā ke eke ai e mutolu kia Iehova ke he ha mutolu a tau galue, ke lafilafi ke he tau mena kua omonuo ai e mutolu, mo e tau poa kua makai ki ai ha mutolu a tau loto ke eke ti eke mo e ha mutolu a tau poa huhunu, mo e ha mutolu a tau poa mena kai, mo e ha mutolu a tau poa inu, mo e ha mutolu a tau poa fakaaue.

40 Ti tala age e Mose ke he fanau a Isaraela, ke tuga ne tau mena oti ne poaki mai ai e Iehova kia Mose.