2 Nofoaga he Tau Patuiki

32 KUA mole atu e tau mena ia, mo e mahani fakamoli na, ti hau ai e patuiki a Asuria ko Sanerivi, ne hoko mai a ia ki Iuta mo e heapi ai ki mua he tau maga ne nonofo ke he tau taue, mo e manatu a ia ke heia atu ai ke eke māna.

2 Kua iloa e Hesekia kua hau a Sanerivi, mo e haga mai a ia ke tau ki Ierusalema,

3 Ti pulega a ia mo e hana tau iki mo e hana tau toa ke ponoti e tau vaipuna ha ha i tua he maga; ne lagomatai foki a lautolu kia ia.

4 Ti fakapotopoto ai e tau tagata tokologa, mo e ponoti e lautolu e tau vaipuna oti, mo e vailele ne tafe ai i loto he motu, kua pehe age, Ke o mai he ha e tau patuiki Asuria, mo e moua ai e lautolu e tau vai loga?

5 Ne fakamalolo ai a ia, mo e ati foki e ia e kaupa oti ne maona, mo e ati hake ai ke hoko ke he tau kolo, mo e taha kaupa foki i tua, mo e taute e ia a Milo ke he maga a Tavita, mo e eke ai e ia e tau kanavaakau mo e tau akau punuti loga;

6 Ti kotofa ai e ia e tau iki kua takitaki e tau, ke pule ke he motu, mo e fakapotopoto ai e ia a lautolu ke he male ke he gutuhala he maga, mo e fakamafana e ia a lautolu, kua pehe atu,

7 Kia fakamalolo a a mutolu mo e fakamanavalahi, aua neke matakutaku a mutolu, ti ua fakaatukehe a mutolu ha ko e patuiki a Asuria, ha ko e motu o tagata oti foki kua fakalataha mo ia; ha ko e tokologa ha ha ia tautolu, ka e tokogahoa ha ha ia ia.

8 Ha ha ia ia e lima he tagata, ka e ha ha ia tautolu a Iehova ha tautolu a Atua ke lagomatai kia tautolu, mo e tau ai ke he tau ha tautolu. Kua fanogonogo foki e motu ke he tau kupu he patuiki a Iuta ko Hesekia.

9 Kua mole atu e tau mena ia, ti fakafano age he patuiki a Asuria ko Sanerivi hana tau fekafekau ki Ierusalema, (ka ko ia mo e hana kau oti ha ha ia ia ne tau a lautolu ki Lakisa,) ke he patuiki a Iuta ko Hesekia, katoa mo Iuta oti ha ha i Ierusalema, kua pehe age,

10 Kua pehe mai e vagahau he patuiki a Asuria ko Sanerivi, Ko e heigoa e mena kua tua ki ai a mutolu kua nonofo a mutolu ke he taue i Ierusalema?

11 Nakai kia fakaohooho atu e Hesekia a mutolu kia tuku atu e ia a mutolu ke mamate a mutolu he hoge, mo e fia inu, kua pehe atu, To laveaki e Iehova ha tautolu a Atua a tautolu mai he lima he patuiki a Asuria?

12 Nakai kia ko Hesekia na ne uta kehe hana tau mena tokoluga, mo e hana tau fatapoa mo e vagahau atu kia Iuta mo Ierusalema kua pehe atu, Kia hufeilo a mutolu ki mua he fatapoa taha, mo e fakavela ai e mena manogi ki luga hana?

13 Nakai kia iloa e mutolu e tau mena ne eke e au mo e haku a tau matua ke he tau tagata oti he tau motu? Ne maeke kia ke he tau atua he tau motu ia ke laveaki e tau motu ha lautolu mai he lima haku?

14 Ko hai kia taha he tau atua oti he tau motu ia ne fakaoti ai he tau matua haku, ne maeke ke laveaki mai hana motu he lima haku, ke maeke ia ke he Atua ha mutolu ke laveaki a mutolu mai he lima haku?

15 Hanai, aua neke fakavai e Hesekia a mutolu, ti aua neke fakaohooho pihia e ia a mutolu, ti ua tua a mutolu kia ia; he nakai fai atua he tau motu oti, mo e tau kautu ne maeke ke laveaki mai hana motu he lima haku, mo e tau lima he haku a tau matua; ka e au atu foki ke nakai laveaki he Atua ha mutolu mai he lima haku.

16 Ka e lafilafi atu foki hana tau fekafekau mo e vagahau atu foki a lautolu kia Iehova ko e Atua, mo Hesekia hana fekafekau.

17 Ne tohi age foki e ia e tau tohi ke fakafiu kia Iehova ko e Atua a Isaraela, mo e ekefakakelea kia ia, kua pehe age, Tuga ne tau atua he tau tagata he tau motu nakai laveaki e lautolu ha lautolu a tau motu mai he lima haku, kua pihia ni e Atua a Hesekia nakai laveaki mai e ia hana motu he lima haku.

18 Ti ui age a lautolu mo e leo lahi ke he vagahau Iuta ke he tau tagata Ierusalema ha ha i luga he kaupa, ke fakamatakutaku age kia lautolu mo e fakaatukehe ai a lautolu, kia moua ai e lautolu e maga.

19 Ne vagahau a lautolu ke he Atua a Ierusalema, tuga ne vagahau ai a lautolu ke he tau atua he tau motu he lalolagi ne eke ai he tau lima he tau tagata.

20 Ti liogi ai e patuiki ko Hesekia, mo e perofeta ko Isaia ko e tama a Amota, mo e tagi atu a laua ke he lagi ha ko e mena ia.

21 Ti fakafano mai ai e Iehova e agelu, mo e fakaoti ai e ia e tau toa malolo oti, mo e tau takitaki mo e tau iki takitaki kau ke he heagaapi he patuiki a Asuria; ti liu atu a ia mo e ma ke he hana motu. Ne hu atu foki a ia ke he fale he hana atua, ti kelipopo ai he fanau hana a ia ke he pelu.

22 Ne laveaki pihia e Iehova a Hesekia mo lautolu ne nonofo i Ierusalema mai he lima he patuiki a Asuria ko Sanerivi, mo e tau lima he tau motu oti, mo e leveki e ia a lautolu ke he tau fahi oti.

23 Ko e tokologa foki ne ta mai e tau poa kia Iehova ki Ierusalema, mo e tau koloa uho ke he patuiki a Iuta ko Hesekia; ti lilifu ai a ia ki mua he tau motu oti tali mai he vaha ia.

24 Ko e tau aho ia ne gagao ai a Hesekia kua teitei mate a ia; ti liogi atu a ia kia Iehova; ti vagahau mai a ia kia ia, mo e foaki mai ai e ia e fakamailoga.

25 Ka e nakai liuaki atu e Hesekia ke lata mo e tau mena fakaalofa ne eke kia ia; ha kua fakatokoluga hana loto; ti hoko ai e ita kia ia, mo Iuta, mo Ierusalema.

26 Ka e fakatokolalo foki a Hesekia ha ko e fakatokoluga he hana loto, ko ia katoa mo lautolu ne nonofo i Ierusalema, ti nakai hoko mai ai e ita a Iehova kia lautolu ke he vaha ia Hesekia.

27 Ha ha ia Hesekia e koloa mo e lilifu, ne lahi mahaki ni; ne eke foki e ia māna e tau mena ke tatanaki ai e ario, mo e auro, mo e tau maka uho, mo e tau mena manogi, mo e tau akau punuti, mo e tanakiaga he tau mena fulufuluola oti;

28 Ko e tau fale foki ke tatanaki ai e tau fua saito, mo e uaina, mo e puke lolo; mo e tau mena ke nonofo ai e tau manu kehekehe oti, mo e tau mena ke nonofo ai e tau fuifui manu.

29 Ne eke foki e ia e tau maga māna, mo e tau fuifui mamoe, mo e tau fuifui povi loga; he foaki mai he Atua kia ia e tau mena loga lahi ni.

30 Ko Hesekia hanā ne ponoti e vaipuna tapa ki luga he vailele ko Kihona, mo e takitaki fakahako hifo ke he fahi lalo he maga a Tavita. Ne monuina foki a Hesekia ke he tau mena oti ne eke e ia.

31 Ka ko e mena he tau fekau he tau iki Papelonia, ne fakafano age kia ia ke he fakamailoga ne eke ai ke he motu, ne toka ai he Atua a ia ke kamatamata ai a ia, kia iloa ai e tau mena oti ha ha he loto hana.

32 Ko e tau mena ne toe ne eke e Hesekia, mo e hana mahani mitaki, kitiala, kua tohi ai ke he fakakiteaga he perofeta ko Isaia ko e tama a Amota, mo e tohi ke he tau patuiki a Iuta mo Isaraela.

33 Kua takoto foki a Hesekia fakalataha mo e hana tau matua, ti tanu e lautolu a ia ke he mena ne o hake ai ke he tau tukuaga he fanau a Tavita; ne fakalilifu atu kia ia a Iuta oti mo lautolu ne nonofo i Ierusalema he mate a ia. Ti eke e tama hana ko Manase mo patuiki ke hukui aki a ia.