Luka

22 KUA tata tuai e galue he tau areto nakai fakaea, ne higoa ko e paseka.

2 Ti kumi he tau ekepoa ne mua mo e tau tohikupu po ke eke fefe ke kelipopo a ia; ha kua matakutaku a lautolu ke he tau tagata. 3 Ati hu ai a Satani kia Iuta ne higoa ko Isakariota, ko e taha ia he tokohogofulu ma ua.

4 Ti fano a ia, kua pulega mo e tau ekepoa ne mua, mo e tau takitaki kau po ke eke fefe ke afo ai e ia a ia kia lautolu. 5 Kua fiafia a lautolu, kua pulega mo ia ke age e tau tupe kia ia. 6 Kua loto ki ai a ia, ti kolo e ia ka moua taha magaaho ke maeke vave ai ke afo e ia a ia kia lautolu, ka e nakai ha i ai e moto tagata.

7 Ati hoko mai ai e aho he tau areto nakai fakaea, kua lata ke keli ai e paseka.

8 Kua fakafano atu e ia a Peteru mo Ioane, kua pehe atu, O a a mua ke taute e paseka ma tautolu, ke kai ai a tautolu.

9 Ti pehe mai a laua kia ia, Ko fe ne finagalo a koe ki ai ke taute ai e maua?

10 Ti pehe age a ia kia laua, Kitiala, ka hohoko a mua ke he māga, ti fakataupa ai a mua mo e taha tagata ha ne uta e vai kelekele kula, ti mumui atu a mua kia ia ke he fale ka hu atu a ia ki ai.

11 Ti tala age a mua ke he patu he fale, Kua poaki mai e akoako kia koe, Ko fe e poko ke api ai e tau fenoga ke kai ai e mautolu e paseka mo e haku a tau tutaki?

12 To fakakite atu ai e ia e poko lahi tapa ki luga, kua oti he taute; ke taute ai e mua ke he mena ia.

13 Ti o na laua, kua kitia ai tuga ne tala age a ia kia laua; ati taute ai e laua e paseka.

14 Kua hoko ke he magaaho, ti takoto ai a ia ke kai mena, kua fakalataha foki mo ia e tau aposetolo ne tokohogofulu ma ua.

15 Kua tala age a ia kia lautolu, Ko e haku a manako, ti lahi ni haku manako ke kai fakamua e paseka nai mo mutolu, ka e nakala hoko ke he haku a matematekelea.

16 Ha ko e mena tala atu e au kia mutolu, nakai tuai kai ai au, ato hoko ke he fakakatoatoaga ke he kautu he Atua.

17 Ati toto ai e ia e kapiniu, mo e fakaaue, kua tala age, Kia toto a e mutolu e mena nai, mo e tufatufa age kia mutolu;

18 Ha ko e mena tala atu e au kia mutolu, nakai tuai inu ni au ke he fua vine, ato hoko mai e kautu he Atua.

19 Ati toto ai e ia e areto, mo e fakaaue, ti tofitofi, mo e age kia lautolu, kua pehe age, Ko e haku a tino a enei, kua foaki atu ma mutolu; kia eke e mutolu e mena nai mo fakamanatuaga kia au.

20 Kua pihia foki e kapiniu, ka kua oti he kai mena, kua pehe atu, Ko e kapiniu nai, ko e maveheaga fou ia ke he haku a toto, kua fakamaligi ma mutolu.

21 Kitiala, ha ha ia au ke he laulau nai e lima he tagata ke afo au.

22 To fano foki e Tama he tagata tuga ne kotofa ai; ka ko e tagata ia ka afo a ia, oi fakaalofa kia ia.

23 Ati kamata ai a lautolu ke fekumihaki po ko hai ia lautolu ke eke e mena ia.

24 Kua taufetoko foki a lautolu, po ko hai taha ia lautolu ke mua.

25 Ti tala age a ia kia lautolu, Ko e tau patuiki he tau motu kehe, kua pule kia lautolu; ko lautolu foki kua pule kia lautolu, kua talahaua a lautolu kua totonu.

26 Ka e nakai pihia a mutolu; ka ko ia ne mua ia mutolu, kia eke a ia kia tuga a ia ne muikau, ko e takitaki foki kia tuga e fekafekau a ia.

27 Ha ko hai kia kua mua; ko e tagata kia ne takoto ke kai, po ko ia ne fekafekau mai? Nakai kia ko ia ne takoto ke kai? Ka ko au nai ha ha ia mutolu tuga ni e fekafekau.

28 Ko mutolu nā, ne tumau a mutolu kia au ke he tau mena ne kamatamata ai au.

29 Tuga ne kotofa mai he haku a Matua e kautu kia au, ke pihia foki he kotofa e au kia mutolu.

30 Kia kai a mutolu mo e inu ke he haku a kaiaga mena ke he kautu haku, kia nonofo foki ke he tau nofoaiki, mo e fakafili e tau faoa a Isaraela ne hogofulu ma ua.

31 Kua tala age e Iki, Simona na e, ma Simona, kitiala, kua manako a Satani kia mutolu, ke lulululu a mutolu tuga ne saito;

32 Ka kua ole au māu, kia nakai mate hau a tua; ka ko koe, ka mafoki mai a koe, ti fakamalolo e koe hau a tau matakainaga.

33 Kua tala age a ia kia ia, Ko e Iki na e, kua taute au ke fano fakalataha mo koe ke he fale puipui katoa mo e mate.

34 Ka e pehe age a ia, Ma Peteru na e, kua tala atu e au kia koe, nakai kō e tau moa he po nai, ato fakatikai lagatolu mai a koe, kua nakai iloa e koe au.

35 Kua tala age a ia kia lautolu, Ne fakafano atu e au a mutolu, nakai fai kato tupe a mutolu, po ke kato, po ke tau afialoalohui, ti nonofogati nakai a mutolu ke he taha mena taha? Ti pehe age a lautolu, Nakai fakai.

36 Ati tala age ai a ia kia lautolu, Ka ko e ainei, ko e tagata ne fai kato tupe, kia uta ai e ia, ti pihia foki mo e kato; ko e tagata foki nakai fai pelu, kia uta a hana tapulu ke fakafua aki mai taha. 37 Ha ko e mena tala atu e au kia mutolu, kua lata fakamoli mai kia au e mena ne tohi ha ē, Kua totou foki a ia fakalataha mo e tau tagata holifono; ha ko e mena fakahiku foki e tau mena ne tohi kia au.

38 Ti pehe mai a lautolu, Ko e Iki na e, kitiala, ne ua la e pelu hanai. Ti pehe age a ia kia lautolu, Toka ai.

39 Kua hu ki fafo a ia, kua fano ke he mouga ko Olive, ke tuga hana mahani; kua mumui atu foki kia ia hana tau tutaki.

40 Kua hoko atu a ia ke he mena ia, ati tala age ai a ia kia lautolu, Kia liogi a mutolu, neke hoko mai e kamatamata kia mutolu.

41 Ti fano kehe a ia ia lautolu, tuga ne mamao e maka ka liti, ati fakatokotui ai, kua liogi,

42 Kua pehe atu, Ma Matua ne e, ka finagalo a koe, kia uta kehe e koe e kapiniu nai ia au; ka e aua neke eke hoku loto, ka ko e hau a finagalo. 43 Ati fakakite mai ai kia ia e agelu mai he lagi, kua fakamalolo a ia.

44 Kua matematekelea, kua au atu ai hana liogi; kua kavakava foki a ia tuga he tau fatufatuoka toto kua to hifo ke he kelekele.

45 Kua matike a ia he liogi, ati haele age ai ke he hana tau tutaki, kua moua a lautolu kua momohe he momoko.

46 Ti pehe age a ia kia lautolu, Kua momohe a mutolu he ha? Ati mamatike a ke liogi; neke hoko mai e kamatamata kia mutolu.

47 Ha ne vagahau a ia, kitiala, ko e moto tagata, ko ia foki ne higoa ko Iuta, ko e taha ia he tokohogofulu ma ua, kua mua mai ia lautolu, ti unuunu mai a ia kia Iesu ke fakafigita a ia.

48 Ka e tala age a Iesu kia ia, Iuta na e, to afo kia e koe e Tama he tagata mo e fakafigita?

49 Kua kitia e lautolu ne fakalataha mo ia e mena ko e eke ne fai, ti tala age ai a lautolu kia ia, Ko e Iki na e, to ta nakai e mautolu ke he pelu?

50 Ko e taha tagata ia lautolu, kua ta e ia e fekafekau he ekepoa ne mua, kua motupū ai hana teliga matau.

51 Ati tala age ai a Iesu, kua pehe age, Toka a; aua ia. Ati piki age ai a ia ke he hana teliga, kua fakamalolo a ia.

52 Kua tala age a Iesu ke he tau ekepoa ne mua, mo e tau takitaki he tau kau he faituga, mo e tau patu, ko lautolu ne o mai kia ia, Kua o mai a mutolu mo e tau pelu, mo e tau katoua, tuga ne tagata fofo mena au. 53 Mena nonofo au mo mutolu ke he faituga ke he tau aho oti, ka e nakai hoko mai ni ha mutolu a tau lima kia au; ka ko e vaha ha mutolu a enei, mo e pule he pouli.

54 Ati tapaki ai e lautolu a ia, kua uta mo e takitaki a ia ke he fale he ekepoa ne mua. Ka e mui mamao atu a Peteru.

55 Kua tafu e lautolu e afi ke he vaha fale, kua nonofo hifo a lautolu, kua nofo foki a Peteru fakalataha mo lautolu.

56 Ti kitia he taha fekafekau fifine a ia, he nofo a ia ke he maama he afi, kua ono kia ia, ti pehe age, Ha ha ia ia foki e tagata nai. 57 Ka e fakatikai a ia kia ia, kua pehe age, Teme na e, nakai kitia e au a ia.

58 Kua levaleva, ti kitia ai e taha a ia, kua pehe mai, Ko koe foki taha ia lautolu. Ka e pehe age ai a Peteru, Teme na e, nakai ko au.

59 Kua mole atu poke magapo taha, ti talahau fakamakamaka ai taha, kua pehe age, Ko e moli ni, ha ha ia ia e tagata nai; ha ko e Kalilaia foki a ia.

60 Ka e pehe age a Peteru, Teme na e, nakai iloa e au e mena ne talahau mai ai e koe. Ha ne vagahau a ia, ti kō ai agataha e tau moa.

61 Ti haga atu e Iki, mo e kitekite atu kia Peteru. Ti manatu ai a Peteru ke he kupu he Iki ne tala age kia ia, Nakai kō e tau moa, ato fakatikai lagatolu mai a koe kia au.

62 Ati fano ai a Peteru ki fafo, kua tagi lahi a ia.

63 Ko e tau tagata ne taofi a Iesu, kua va a lautolu kia ia, ti keli ni.

64 Kua ūfi e lautolu hana tau mata, ti ta e lautolu hana fofoga, kua hūhu mai kia ia, kua pehe mai, Talahau la, po ko hai ne ta a koe? 65 Ko e falu a kupu foki ne loga ne kupu kelea ai a lautolu kia ia.

66 Kua aho, ati fakapotopoto ai e tau patu he motu, ko e tau ekepoa ne mua, mo e tau tohikupu, ti takitaki atu a ia ke he fakapotopotoaga ha lautolu, kua pehe mai,

67 Kaeke ko e Keriso a koe, tala mai a kia mautolu. Ti pehe age a ia kia lautolu, Kaeke ke tala atu e au kia mutolu, ti nakai talia mai ni e mutolu;

68 Kaeke foki ke hūhu atu e au kia mutolu, ti nakai tali mai a mutolu kia au, po ke vevete au.

69 Ke kamata ainei ke nofo e Tama he tagata ke he fahi matau he Atua malolo.

70 Ti pehe mai a lautolu oti, Ti ko e Tama he Atua kia a koe? Kua tala age a ia kia lautolu, Ko au haia, kua talahau mai ai e mutolu.

71 Ti pehe ai a lautolu, To aoga ha ha kia lautolu e tau talahau? ha kua logona e tautolu ke he hana gutu ni.