Ioane

10 KO e moli, ko e moli, ke tala atu e au kia mutolu, ko e tagata nakai hu atu ke he gutuhala ki loto he lotopa mamoe, ka e hake ki ai ke he taha fahi, ko e kaiha a ia mo e fofo mena.

2 Ka ko ia kua hu atu ke he gutuhala, ko e leveki mamoe ni a ia.

3 To vevete mai he leveki e pahala kia ia; kua fanogonogo foki e tau mamoe ke he hana leo. Kua ui ni a ia ke he hana tau mamoe ke he tau higoa ha lautolu; kua takitaki foki e ia a lautolu.

4 Ka uta e ia hana tau mamoe, ti mua a ia ki ai; ti mumui atu ai e tau mamoe kia ia, ha kua iloa e lautolu hana leo.

5 Ka e nakai mumui atu a lautolu ke he tagata kehe, ka e fehola kehe ai; ha kua nakai iloa e lautolu e tau leo he tau tagata kehe.

6 Kua tala age a Iesu kia lautolu e fakatai na, ka e nakai maama kia lautolu e tau mena ne talahau atu e ia kia lautolu.

7 Ati liu foki tala age ai a Iesu kia lautolu, Ko e moli ko e moli, ke tala atu e au kia mutolu, ko au nai ko e gutuhala he tau mamoe.

8 Ko lautolu oti ne mumua ia au, ko e tau kaiha a lautolu mo e tau fofo mena; ka e nakai fanogonogo kia lautolu e tau mamoe.

9 Ko au nai ko e gutuhala; kaeke ke hu atu ai taha kia au, ti fakamoui ai a ia, to hu atu mo e hu mai a ia, to moua foki e ia e tau mena kai.

10 Ko e kaiha, nakai hau a ia ke he taha mena ka ko e kaiha ni, mo e keli, mo e fakaoti; kua hau au kia moua e lautolu e moui, kia moua lahi ai ni.

11 Ko au ko e leveki mamoe mitaki; kua tuku atu he leveki mamoe mitaki hana moui ke hukui aki e tau mamoe.

12 Ka ko e fekafekau palepale, nakai ko e leveki foki haia, nakai ko e tau mamoe hana; kua kitia atu e ia e luko ha ne hau, ti tiaki ai e ia e tau mamoe, ka e hola; ti hēhē ai he luko, ti mavehevehe fano ai e tau mamoe.

13 Ka e hola e fekafekau palepale, ha ko e fekafekau palepale ni a ia, ti nakai manatu a ia ke he tau mamoe.

14 Ko au ko e leveki mamoe mitaki; kua kitia e au haku a tau mamoe; kua kitia foki au he haku a tau mamoe;

15 Tuga he fioia he Matua au, mo e kitia foki e au e Matua. Kua tuku atu foki e au haku a moui ke hukui aki e tau mamoe.

16 Ti kua fai mamoe kehe au, nakai ha he lotopa nai; ko lautolu foki kua lata he takitaki mai e au, to fanogonogo foki a lautolu ke he leo haku; ati taha ai e fuifui mamoe, mo e leveki mamoe ne tokotaha.

17 Ko e mena nai kua fakaalofa mai ai e Matua kia au, ha kua tuku atu e au haku a moui, kia liu foki ta mai ai e au.

18 Nakai uta kehe e taha ia au, ka ko au, kua tuku atu e au ni. Ha ha ia au e pule ke tuku atu ai ni, ha ha ia au foki e pule ke liu ta mai ai; ne moua e au e poaki nai mai he haku a Matua.

19 Ati liu foki veveheua ai e tau tagata Iutaia ke he tau kupu ia.

20 Kua pehe ni falu a lautolu tokologa, Ha ha ia ia he temoni, kua vikoia foki a ia; kua fanogonogo he ha a mutolu kia ia?

21 Ka kua pehe falu, Ko e tau kupu na nakai ko e tau kupu he tagata kua heketia; kua maeke kia he taha temoni ke fakaala e tau matapouli?

22 Kua eke i Ierusalema e galue he fakaulufale, ko e vaha makalili foki.

23 Kua evaeva a Iesu ke he faituga, ke he fakamaluaga a Solomona.

24 Ti agaagai ai he tau tagata Iutaia a ia, kua pehe age a lautolu kia ia, Ke fakataumaleku mai a koe kia mautolu ato a fe? Kaeke ko e Keriso a koe, ati talahau fakatonu mai a kia mautolu.

25 Kua tala age a Iesu kia lautolu, Kua oti he tala atu e au kia mutolu, ka e nakai talia mai ni e mutolu. Ko e tau gahua ne eke e au ke he higoa he haku a Matua, kua talahau ia kia au.

26 Ka e nakai talia ni e mutolu, ha ko e mena nakai ko e tau mamoe haku a mutolu, tuga he tala atu e au kia mutolu.

27 Ko e haku a tau mamoe kua fanogonogo mai ke he haku a leo, kua iloa foki e au a lautolu; kua mumui mai foki a lautolu kia au;

28 To ta atu foki e au e moui tukulagi kia lautolu. Nakai mamate ni a lautolu tukulagi; ti nakai maeke ni ia taha ke fofo a lautolu mai hoku lima.

29 Ko e haku a Matua ne foaki mai a lautolu kia au, kua homo a ia ke he tau mena oti kana; ti nakai maeke ia taha ke fofo a lautolu mai he lima he haku a Matua.

30 Ko au nai mo e Matua, kua taha ni a maua.

31 Kua liu e tau tagata Iutaia eke hake e tau maka, ke tauliti kia ia.

32 Kua tala age a Iesu kia lautolu, Loga e tau gahua mitaki ne fakakite atu e au kia mutolu mai hoku Matua; ko e mena fe kia he tau gahua ia kua tauliti mai ai e mutolu au?

33 Kua tala age e tau Iutaia kia ia, kua pehe age, Nakai ko e gahua mitaki ke tauliti ai e mautolu a koe, ka ko e vagahau kelea; ha ko koe ko e tagata, kua eke e koe a koe mo Atua.

34 Kua tala age a Iesu kia lautolu, Nakai kia tohi ke he fakatufono ha mutolu, Ne talahaua e au a mutolu ko e tau atua?

35 Kaeke ke talahaua a lautolu e ia ko e tau atua, ko lautolu ha i ai e kupu he Atua; ti nakai maeke ke eke e Tohi mo mena nakai aoga;

36 Kua pehe kia a mutolu kia ia ne fakatapu mo e fakafano mai he Matua ke he lalolagi, Kua vagahau kelea a koe, he pehe atu au, Ko au nai ko e Tama he Atua?

37 Kaeke kua nakai eke e au e tau gahua he haku a Matua, aua neke talia e mutolu au.

38 Kaeke kua eke ni e au, pete ni he nakai talia e mutolu au, kia talia e mutolu e tau gahua; kia iloa ai e mutolu, mo e talia fakatonu, ha i loto ia au e Matua, ko au foki ha i loto ia ia.

39 Ati liu foki eke e lautolu ke tapaki a ia; ka kua haele kehe a ia he tau lima ha lautolu.

40 Ti kua liu foki haele atu ai a ia ke he fahi atu a Ioritana, ke he mena ne papatiso fakamua ai e Ioane, ti nofo a ia ke he fahi ia.

41 Ti o age kia ia e tokologa, kua pehe foki a lautolu, Nakai fakai taha fakamailoga ne eke e Ioane, ka ko e tau mena oti ne tala mai ai e Ioane kia ia nai, kua moli ia.

42 Ne tokologa foki a lautolu ne talia a ia ke he fahi ia.