1 Korinito

5 KUA talahaua ni ha ha ia mutolu e feuaki, ko e feuaki pihia foki kua nakai talahaua ke he tau motu kehe, kua eke taha e hoana he hana matua tane.

2 Ko mutolu foki, nakai kia fakatokoluga a mutolu? ka e nakai kia fakatutuku a mutolu, kia tuku kehe ia mutolu a ia kua eke e mena ia?

3 Ku au foki, pete ni he nakai ha ia mutolu hoku tino, kua ha ha ia mutolu hoku loto, kua oti foki haku a fakafili ke he tagata kua eke pihia e mena ia, tuga ne ha i ai au ia mutolu;

4 Ke tuku atu a ia ke he higoa he Iki ha tautolu, ko Iesu Keriso, ka fakapotopoto mai a mutolu fakalataha mo e haku a loto, mo e malolo he Iki ha tautolu ko Iesu Keriso,

5 Ke tuku atu a ia kua pihia kia Satani kia malaia ai e tino, ka kia hao e agaga ke he aho he Iki, ko Iesu.

6 Kua nakai lata ha mutolu a hula. Kua nakai kia iloa e mutolu ko e mena tote kua fakaea, kua fakaea aki e ia e lakuaga falaoa katoa?

7 Ko e mena ia kia tiaki ai e mutolu e mena fakaea tuai, kia eke a mutolu mo lakuaga fou, kua tuga e mena nakai fakaea a mutolu; ha ko Keriso foki ko e paseka haia ha tautolu kua keli a ia ma tautolu.

8 Ko e haia, aua neke eke e tautolu e galue mo e mena kua fakaea tuai, po ke mena kua fakaea ke he loto kelea mo e mahani kelea; ka kia eke mo e mena nakai fakaea, ko e loto mitaki mo e fakamoli haia.

9 Ne tohi atu e au kia mutolu ke he haku a tohi, ua feoaki a mutolu mo e tau feuaki.

10 Ka e nakai pihia fakaoti mo e tau feuaki he lalolagi nai, katoa mo e tau velevelemena, mo e tau fofo mena, mo e tau hufeilo ke he tau tupua; kane mai ke pihia po kua lata ai ia mutolu he o kehe ai he lalolagi nai.

11 Ka ko e hanai, ne tohi atu e au kia mutolu, kaeke kua talahaua taha ko e matakainaga, ka ko ia ko e feuaki, po ke velevelemena, po ke hufeilo ke he tau tupua, po ke tagata vagahau kelea, po ke konahia, po ke fofo mena, aua neke feoaki, aua foki neke kai mena fakalataha mo e tagata pihia.

12 To ku kia au kia a lautolu i tua ke fakafili e au a lautolu? Kua nakai kia fakafili e mutolu a lautolu ha ha he lotopa?

13 Ka ko lautolu i tua kua fakafili he Atua a lautolu. Hanai, kia tuku kehe e mutolu e tagata mahani kelea nā ia mutolu.