Esoto

30 KIA eke foki e koe e fatapoa ko e fata ke huhunu ai e tau mena manogi, to eke ni ke he akau ko e sitima.

2 Taha e kupita hana loa, ti taha e kupita hana laulahi, to fakafahifa tatai ni, ti ua e kupita hana tokoluga; to eke hana tau hoe ke he mena taha ia.

3 Ti fakakili e koe ke he auro mitaki, ko e hana fuga luga, mo e hana tau fahi ke takai aki, mo e hana tau hoe; ti eke foki e koe e fakapiki auro ke takai aki.

4 Ti eke e koe ua e veli auro ki ai, ke he tapa lalo he hana fakapiki, ke he na kaniva fata ua, to eke ni ke he na fahi ua; ke eke mo mena ke humaki ai e tau akau ke tauloto aki.

5 Ti eke ni e koe e tau akau tauloto ke he akau ko e sitima mo e fakakili aki he auro;

6 Ti tuku ai e koe ki mua he puipui ie, ha ha he tapa he puha he fakatufono, ki mua he haeleaga he fakaalofa noa ha i luga he puha he fakatufono, ko e mena haia ke feleveia ai a taua mo koe.

7 To huhunu e Arona ki luga he fata e tau mena manogi mitaki ke he tau magaaho pogipogi oti, ka taute e ia e tau lamepa, ti huhunu ai e ia e mena manogi.

8 Ka tugi foki e Arona e tau lamepa ke he magaaho afiafi, ti huhunu ai e ia e mena manogi; ko e mena manogi ki mua a Iehova nakai noa, ke he tau hau ha mutolu a mui.

9 Aua neke huhunu ai e mutolu ha mena manogi kehe, po ke poa huhunu, po ke poa mena kai; aua foki neke liligi ai ha poa inu.

10 To eke foki e Arona ki luga he tau hoe he fata e lukutoto ke he toto he tau poa ha ko e hala ke lukutoto aki taki lagataha ke he tau tau; to eke ai e ia e lukutoto taki lagataha ke he tau tau ke he tau hau ha mutolu a mui; ko e mena tapu ue atu ia kia Iehova.

11 Kua vagahau mai foki e Iehova kia Mose, kua pehe mai,

12 Ka totou e koe e fanau a Isaraela, ko lautolu kua lata ke totou, ti igatia ai e tagata mo e totogi he hana moui ke ta mai kia Iehova ka totou a lautolu, neke hoko ha malaia kia lautolu ka totou a lautolu.

13 Ko e mena hanai ke igatia a lautolu mo e ta mai, ko lautolu oti kua totou, ko e hafa sikeli, ko e sikeli he faituga ia; (na uafulu e kera ko e taha sikeli haia;) ko e hafa sikeli ko e poa haia kia Iehova.

14 Ko lautolu oti kana kua totou, kua kamata ia lautolu ne tau uafulu, katoa mo lautolu ne fakamua atu, to igatia a lautolu mo e ta mai e poa ia kia Iehova.

15 Aua neke fakalahi he tagata maukoloa, ti aua neke fakatote he tagata nofogati, ka ko e hafa sikeli hokoia ni, ka ta mai e lautolu e poa kia Iehova, ke eke mo totogi ma mutolu.

16 Ti eke e koe e tupe he totogi mai he fanau a Isaraela, ti ta mai ai e koe ke eke aki e tauteaga he fale uta fano he tutuutaga; kia eke mo fakamanatuaga ke he fanau a Isaraela ki mua a Iehova, ke eke mo totogi ma mutolu.

17 Kua vagahau mai foki e Iehova kia Mose, kua pehe mai,

18 Kia eke e koe e kumete apa kula, mo e hana tuaga ni ke he apa kula, ke koukou ai; ti tuku ai e koe ke he vaha he fale uta fano he tutuutaga mo e fatapoa; ti fakapuke ke he vai.

19 To holoholo ai e Arona mo e hana tau tama tane ha lautolu a tau lima mo e ha lautolu a tau hui.

20 Ka huhū atu a lautolu ke he fale uta fano he tutuutaga kia koukou a lautolu ke he vai neke mamate a lautolu; ka fakatata atu a lautolu ke he fatapoa, ke fekafekau ai a lautolu, ke huhunu ai e poa kua eke he afi kia Iehova.

21 Kia holoholo foki e lautolu ha lautolu a tau lima mo e ha lautolu a tau hui, neke mamate a lautolu; to eke foki ia mo fakatufono tukulagi kia lautolu, ko ia mo e hana fanau ke he tau hau ha lautolu a mui.

22 Kua vagahau mai foki e Iehova kia Mose, kua pehe mai.

23 Ko koe foki, kia uta e koe e tau mena manogi ne homo, ko e muro mitaki lima e teau e sikeli, ko e kinamoni manogi foki, ko e veveheaga ne ua aki he mena ia, ko e ua e teau ia ti limagofulu e sikeli; ko e kani manogi foki ua e teau ti limagofulu e sikeli;

24 Ko e kesia foki lima e teau e sikeli, ko e sikeli haia he faituga; ti taha e hinu he lolo olive.

25 Ti eke ai foki e koe e lolo tapu ke fakauku aki, koe lolo kua laku fiofio, ko e feua he tufuga eke mena manogi, ke eke mo lolo tapu ke fakauku aki.

26 Ti fakatakai e koe e fale uta fano he tutuutaga, mo e puha he fakatufono;

27 Ko e laulau foki mo e hana tau mena oti; ko e fakatuaga lamepa foki mo e hana tau mena; mo e fata ke huhunu ai e tau mena manogi;

28 Mo e fata ke eke ai e tau poa huhunu mo e hana tau mena oti; ko e kumete holoholo mo e hana tuaga.

29 Ti fakatapu e koe e tau mena ia, kia eke mo tau mena tapu ue atu; ko e tau mena oti ke piki ki ai to tapu ia.

30 Ti fakauku e koe a Arona mo e hana tau tama tane, ti fakatapu e koe a lautolu, kia eke e lautolu e feua he ekepoa kia au.

31 Ti vagahau atu a koe ke he fanau a Isaraela, kia pehe atu, To eke e mena nai mo lolo uku kua tapu kia au, ke hoko ke he ha mutolu a tau hau a mui.

32 Aua neke fakatakai aki e tino he tagata, aua foki neke eke e mutolu ha mena pihia ke tuga mo e mena ia, ko e mena tapu ia, to tapu ai ni kia mutolu.

33 Ko e tagata ke laku fiofio ha lolo pihia, po ke fakauku aki ha tagata kehe, kia vevehe kehe ni a ia he hana motu.

34 Kua pehe foki a Iehova kia Mose, Kia uta e koe e tau mena manogi mitaki, ko e matafa, mo e sakeleta, mo e halipana, ko e tau mena manogi ia, mo e lipano mitaki kia tatai e tau mena ia.

35 Ti eke ai e koe e mena manogi, kua laku fiofio ko e feua he tufuga eke mena manogi, ke fakamasima, to mitaki, to tapu.

36 Ti tuki fakavalavala e koe e taha maga he mena manogi, mo e tuku atu ki mua he puha he fakatufono ke he fale uta fano he tutuutaga ke he mena ke feleveia ai a taua mo koe; to tapu ue atu e mena manogi ia kia mutolu.

37 Ko e mena manogi foki ke eke e koe, aua neke eke ha mena kua laku pihia ma mutolu; ke tapu e mena ia kia koe ma Iehova;

38 Ko e tagata kua eke ha mena pihia ke hohogi ki ai, kia vevehe kehe a ia he hana motu.