Numera

9 KUA vagahau mai foki a Iehova kia Mose ke he tutakale ko Sinai, ke he mahina fakamua he tau ua he o mai a lautolu he motu ko Aikupito, kua pehe mai,

2 Kia eke ai he fanau a Isaraela e paseka ke he hana vaha kua kotofa.

3 Ti eke ai e mutolu ia ke he aho hogofulu ma fa he mahina nai ke he afiafi, ke he hana vaha kua kotofa; to eke ai e mutolu ia tuga ne tau fakatufono oti hana, mo e hana tau poakiaga.

4 Ti vagahau atu a Mose ke he fanau Isaraela ke eke ai e lautolu e paseka.

5 Ti eke ai e lautolu e paseka ke he afiafi he aho hogofulu ma fa he mahina fakamua ke he tutakale ko Sinai; tuga ne tau mena oti ne poaki mai e Iehova kia Mose, ne eke pihia ni he fanau Isaraela.

6 Ko e falu a tagata foki ha ha ia lautolu ne kelea ke he tino he tagata mate ti nakai maeke a lautolu ke eke ai e paseka ke he aho ia; ti o mai ai a lautolu ke he aho ia ki mua a Mose ki mua foki a Arona;

7 Ti pehe mai ai e tau tagata ia kia ia, Kua kelea tuai a mautolu ke he tino he tagata mate: kua fakalekua ai he ha a mautolu he mena ia ke nakai eke poa ai e mautolu kia Iehova ke he hana po kua kotofa fakalataha mo e fanau a Isaraela?

8 Ti pehe atu a Mose kia lautolu, Kia tatali la a mutolu ato iloa e au po ke heigoa e mena ke poaki mai ai e Iehova kia mutolu.

9 Ti vagahau mai a Iehova kia Mose, kua pehe mai,

10 Kia tala age pehe a koe ke he fanau a Isaraela, Kaeke ke ha ia mutolu po ke tau hau ha mutolu a mui taha kua kelea ke he tino he tagata mate, po ke tagata kua mamao ke he fenoga, to eke ni e ia e paseka kia Iehova.

11 Kia eke ai e mutolu ia ke he afiafi he aho hogofulu ma fa he mahina ua, to kai ai ni e lautolu mo e tau areto nakai fakaea mo e tau lakau kona.

12 Aua neke toka ai e lautolu ha mena ato a pogipogi, ti aua neke fafati e lautolu hana tau huimotua; tuga ne tau fakatufono oti ke he paseka kia eke ai e lautolu ia.

13 Ka ko e tagata kua mea, ti nakai fano fenoga foki a ia, ka e nakai eke e ia e paseka to vevehe kehe e tagata ia mo e hana motu; ha kua nakai ta mai ai e ia e poa kia Iehova ke he hana vaha kua kotofa; to nofo mo e hala e tagata ia.

14 Kaeke foki kua nofo ha tagata kehe ia mutolu, ti fia eke e ia e paseka kia Iehova, ti eke ni e ia ke lata mo e fakatufono he paseka ke tuga foki hana tau poakiaga; taha ni e fakatufono kia mutolu, ke hoko ke he tagata kehe katoa mo e tagata ne fanau ai ke he motu.

15 Ko e aho ne fakatu ai e faituga ne ufia e faituga ke he aolagi, ko e fale uta fano ia ne ha i ai e fakatufono; ko e afiafi foki ne ha i luga he faituga e mena kua tino mai po ke afi ato hoko ke he pogipogi.

16 To pihia mau ni; to ufia ai ke he aolagi ka aho, mo e mena kua tino mai po ke afi ka po.

17 Ka lagaaki foki e aolagi mai luga he fale uta fano, kua mole ia ti o ai e fenoga he fanau a Isaraela; ko e mena foki kua nofo ai e aolagi ko e mena ia ni kua heapi ai e fanau a Isaraela.

18 Ko e kupu ni a Iehova ne o fenoga ai e fanau a Isaraela, ko e kupu foki a Iehova ne heapi ai a lautolu; ko e tau aho oti ne nofo ai e aolagi ki luga he faituga ne nonofo ai a lautolu ke he ha lautolu a tau heaga api.

19 Ka ha i ai e aolagi i luga he faituga ke he tau aho loga, ti omaoma ai e fanau a Isaraela ke he fekau a Iehova, ti nakai ni o fenoga a lautolu.

20 Ti pihia foki, kaeke kua po gahoa ai e aolagi ki luga he faituga; ko e kupu ni e Iehova ne heapi ai a lautolu, ko e kupu foki a Iehova ne o fenoga ai a lautolu.

21 Ti pihia foki, kaeke kua ha i ai e aolagi mai he afiafi ke hoko atu ke he pogipogi, ti lagāki ai e aolagi ke he magaaho pogipogi, ti o fenoga ai a lautolu; ko e aho poke po ka lagaaki e aolagi ti o ai ni ha lautolu a fenoga.

22 Kaeke foki ko e po ua, po ke mahina katoa, po ke tau ne ha i ai e aolagi ki luga he faituga, mo e nofo ai ki luga hana, ti nonofo ai e fanau a Isaraela ke he heagaapi nakai ni o fenoga a lautolu; ka kua lagaaki ia ti o fenoga a lautolu.

23 Ko e kupu a Iehova ne heapi ai a lautolu, ko e kupu foki a Iehova ne o fenoga ai a lautolu; ti omaoma a lautolu ke he fekau a Iehova tuga ne kupu a Iehova kia Mose.