Kenese

44 NE poaki a ia ke he tagata ne pule ke he hana magafaoa, kua pehe atu, Kia fakapuke a e tau taga he tau tagata ia ke he tau mena kai ke lata mo e mena kua fahia, a lautolu ke uta; kia tuku foki e tau tupe he tagata takitaha ke he gutu he hana taga.

2 Kia tuku foki haku kapiniu auro, ke he gutu taga he tehina fakamui, katoa mo e tau tupe he hana saito. Ti eke ai e ia tuga ne kupu ne tala atu ai e Iosefa.

3 Kua maama mai a pogipogi, ti fakafano atu ai e tau tagata, katoa mo e ha lautolu a tau asini.

4 Kua mole ki tua e māga he o a lautolu, ka e nakala mamao, ti pehe ai a Iosefa ke he tagata ne pule ke he hana magafaoa, Matike ā, tutuli e tau tagata ia, ka moua a lautolu, ti pehe age a koe kia lautolu, Ko e heigoa e mena ne taui ai e mutolu e mitaki ke he kelea?

5 Nakai kia ko e kapiniu ia ne fa inu ai haku a iki, mo e mena foki ia ne fakafili ai e ia? kua mahani kelea a mutolu he eke pihia.

6 Kua moua foki e ia a lautolu, ti tala age kia lautolu e tau kupu ia.

7 Ti pehe mai a lautolu kia ia, Ko heigoa e mena ne pihia mai ai e iki ke he tau kupu ia? kia mamao mo e tau fekafekau hau ke eke e lautolu ha mena pihia.

8 Kitiala, ko e tau tupe ne moua e mautolu ke he tau gutu taga ha mautolu, ne liuaki atu e mautolu kia koe mai he motu ko Kanana, to maeke fefe ia mautolu ke kaiha e mautolu e ario po ke auro ke he fale he hau a iki?

9 Ko e tagata ia mautolu ko e hau a tau fekafekau ne moua i ai e mena ia, kia mate ni a ia, to eke foki a mautolu mo tau tupa kia koe ha mautolu a iki.

10 Ti pehe atu ai a ia, Haia, ati eke a tuga ne tau kupu ha mutolu; ko ia ha i ai e mena ia to eke a ia mo fekafekau maku, ka e mea a mutolu.

11 Ti takitaha a lautolu mo e alumaki ke tuku hifo hana taga ke he kelekele, kua takitaha foki mo e vevete hana taga.

12 Ti kumikumi ai e ia kua kamata kia ia ne motua, ti fakahiku kia ia ne fakamui, ti moua ni e kapiniu ke he taga a Peniamina.

13 Ti hehe ai e lautolu ha lautolu a tau tapulu, kua takitaha mo e fakatoka e kavega ki luga hana asini, ti liliu atu ke he māga.

14 Kua hoko atu a Iuta mo e hana tau matakainaga ke he fale a Iosefa, ha kua nofo agaia a ia i ai; ti fakaveli fakafohifo ai a lautolu ki mua hana.

15 Ti pehe atu a Iosefa kia lautolu, Ko heigoa e mena nai kua eke e mutolu? Nakai kia iloa e mutolu kua maeke ke he tagata tuga au nai ke fakafili?

16 Ti pehe mai ai a Iuta, To tala atu heigoa e mautolu ke he iki ha mautolu? ko e heigoa ha mautolu a tau kupu? to fakatonu atu fefe e mautolu a mautolu? Kua fioia he Atua e hala he hau a tau fekafekau; kitiala, ko mautolu ko e tau fekafekau hau, ma iki na e, ko mautolu katoa mo ia ne moua e kapiniu ha i ai.

17 Ti pehe atu ai a ia, Kia mamao ia au ke eke pihia, ka ko ia ne moua i ai e kapiniu to eke a ia mo fekafekau māku, ka ko mutolu, kia o hake a mutolu mo e monuina ke he matua tane ha mutolu.

18 Ti unu mai a Iuta kia ia, kua pehe mai, Ko e iki na e, tuku mai ke he hau a fekafekau ke vagahau atu ha kupu ke he tau teliga hau, aua foki neke ita mai a koe ke he hau a fekafekau; ha kua tuga ne Farao a koe ni.

19 Ko e iki na e, ne hūhū mai a koe ke he hau a tau fekafekau, kua pehe mai, Fai matua tane nakai a mutolu, po ke matakainaga?

20 Ti pehe atu ai a mautolu kia koe, ma iki na e, Na fai matua tane a mautolu, ko e fuakau, mo e tama ne fanau ka kua motua tuai a ia, ko e tama fakamui, kua mate foki hana matakainaga, ko e tama ia hokoia ne toe he hana matua fifine, kua fakahelehele ni a ia he hana matua tane.

21 Ti pehe mai a koe ke he hau a tau fekafekau, Kia ta mai e mutolu a ia kia au, kia kitia e au a ia.

22 Ti pehe atu a mautolu kia koe, ma iki na e, Nakai maeke ni ke toka he tama hana matua tane; ka toka e ia hana matua tane, ti mate ni hana matua tane.

23 Ti pehe mai ai a koe ke he hau a tau fekafekau, Kaeke ke nakai o mai a mutolu mo e matakainaga fakamui ha mutolu, ti nakai liu foki fekitiāki a tautolu.

24 Kua o hake a mautolu ke he hau a fekafekau ko e matua tane ha mautolu, ti tala age e mautolu kia ia e tau kupu he iki ha mautolu.

25 Na pehe mai foki ha mautolu a matua tane, Liliu atu foki ke fakatau mai e falu a mena kai ma tautolu.

26 Ti pehe atu a mautolu, Nakai maeke ni ke o hifo foki a mautolu, kaeke ke o a mautolu mo e matakainaga fakamui ha mautolu, ti o hifo ai a mautolu; ha kua nakai maeke ke kitia e mautolu e fofoga he iki ka nakai fakalataha mo mautolu e matakainaga fakamui ha mautolu.

27 Ti pehe mai hau a fekafekau, ko e ha mautolu a matua tane kia mautolu, Kua iloa e mutolu ne fanau mai haku hoana kia au e na tama tane tokoua.

28 Ne fina atu taha ia au, ti pehe age ai au, na ko e moli kua hēhē tuai a ia he tau manu, ti nakai kitia e au a ia tali mai.

29 Ka uta kehe e mutolu a ia nai ia au, ka hoko atu kia ia ha mena kelea, ti ta hifo ai e mutolu haku tau lauulu hina ke he tukuaga mo e mānu.

30 Ko e hanai, ka fina atu au ke he hau a fekafekau, ko e haku matua tane, ka e nakai ha ia mautolu e tama, (ha ko e moui he tama ko e hana moui ia,)

31 Ka kitia e ia nakai ha i ai e tama ti mate ai a ia; ti ta hifo ai he tau fekafekau hau e tau lauulu hina he hau a fekafekau, ko e ha mautolu a matua tane, ke he tukuaga mo e mānu.

32 Ha kua eke hau a fekafekau mo leveki he tama ke he haku matua tane, kua pehe atu, Kaeke ke nakai ta mai e au a ia kia koe, ti eke au mo tagata hala ke he haku matua tane ke he tau aho oti kana.

33 Ko e hanai, kua ole atu au, kia nofo au, ko e hau a fekafekau mo tupa ke he haku iki ke hukui aki e tama, ka e hake ni e tama fakalataha mo e hana tau matakainaga;

34 Ha kua maeke fefe ia au ke hake ke he haku matua tane, ka e nakai ha ia au e tama? neke kitia e au e kelea kua hoko ke he haku matua tane.