Tau Salamo

71 IEHOVA na e, kua tua ni au kia koe, aua neke fakamā tukulagi au;

2 Kia laveaki e koe au ke he hāu a tututonu, mo e fakamoui au; kia haga mai hāu a na teliga kia au; mo e fakamoui au.

3 Kia eke a koe mo maka tumau ke nofo ai au, ke fano mau au ki ai; kua pule a koe ke fakamoui au; ha ko e haku a maka tumau mo e haku a kolo, ko koe ni haia.

4 Haku Atua na e, kia laveaki e koe au mai he lima he tagata mahani kelea, ko e lima hana kua mahani hepehepe mo e favale.

5 Ha ko koe kua amaamanaki au ki ai, ma Iki na e, ko Iehova, ne tua ki ai au tali mai he vaha tote.

6 Ko koe ne tokotū au tali he fanau au; ne ta mai e koe au he manava he haku a matua fifine; to fakaheke atu au kia koe nakai noa.

7 Ne eke au tuga ne mena ke ofomate ai e tokologa; ka ko koe, ko e haku a taue uka a koe.

8 To puke haku gutu he hāu a fakahekeaga, ha ko e hāu a fulufuluola ke he aho oti.

9 Aua neke tiaki e koe au ke he vaha fuakau; aua neke tiaki e koe au ka mole atu haku a malolo.

10 Ha kua fai kupu kia au a lautolu ne fai fi kia au; kua pulega fakalataha a lautolu ne lamalamati ke keli au.

11 Kua pehe age, Kua tiaki a ia he Atua; kia tutuli mo e tapaki e mutolu a ia, ha kua nakai fai laveaki a ia.

12 Ko e Atua na e, aua neke fakamamao ia au; haku Atua na e, kia fakaave ke lagomatai kia au.

13 Kia mā, kia fakaotioti ni a lautolu kua fai fi kia au; kia ufiufi he mā mo e ekefakakelea a lautolu kua kumi ke kelea ai au.

14 Ka ko au to amaamanaki au kia koe nakai noa, ti lafilafi foki e au ke he hāu a tau fakahekeaga oti kana.

15 To tokutoku atu haku a gutu e tututonu hāu, ko e fakamouiaga mai ia koe ke he aho oti; ha kua nakai maeke ia au ke totou ai.

16 To fano au ke he malolo he Iki ko Iehova; to tokutoku e au hāu a tututonu, hāu ni hokoia.

17 Ko e Atua na e, kua fakaako e koe au tali mai he vaha tote; kua hoko mai foki ke he vaha nai kua fakakite gaia au hāu a tau mana;

18 Ko e Atua na e, aua neke tiaki e koe au ka fuakau au mo e uluhina; ato fakakite e au hāu a lima ke he hau nai, mo e hāu a malolo kia lautolu oti kana a mui.

19 Ko e Atua na e, kua homo ue atu hāu a tututonu; kua eke e koe e tau mena lalahi; ko hai kia ke tatai mo koe?

20 Ko koe ne fakakite mai kia mautolu e tau matematekelea ne loga mo e kelea, to liu foki fakamoui mai e koe a mautolu, ti liu foki ta hake a mautolu mai he mena hokulo he kelekele.

21 To fakalahi e koe haku lilifu; to liu mai a koe mo e fakamafana mai kia au.

22 To fakaheke atu foki au kia koe ke he napeli, ko e hāu a fakamoli haku Atua na e; to ta e au e kitara mo fakahekeaga kia koe, ko koe ne Tapu i Isaraela.

23 To kalaga fiafia haku tau laugutu ka uhu lologo au kia koe, katoa foki mo e haku agaga kua fakamoui e koe.

24 To tokutoku foki haku alelo e tututonu hāu ke he aho oti; ha kua mā ni, ha kua fakama tuai a lautolu kua kumi ke kelea ai au.