Numera

24 KUA kitia e Palaamo kua finagalo a Iehova ke fakamonuina a Isaraela, ti nakai tuai fano ai tuga ne eke fakamua, ke kumi e tau lagatau he tau taulatua, ka e hagao atu a ia ke he tutakale.

2 Ti haga hake ai a Palaamo, kua kitia e ia a Isaraela kua nonofo fakalata ke he tau magafaoa ha lautolu, ti hoko mai ai e Agaga he Atua ki luga hana.

3 Ti taute ai e ia hana fakatai, kua pehe atu, Ko e kupu hanai a Palaamo ko e tama a Peoro; ko e kupu hanai he tagata kua ala ai hana tau mata.

4 Kua pehe atu a ia kua logona e tau kupu he Atua, ko ia ne kitia e tau mena kua fakakite mai E ia hana e malolo oti kana, ne veli a ia ka e mena ala ni hana tau mata.

5 Iakopo na e kua homo e fulufuluola he hau a tau fale ie, mo e hau a tau mena ke nonofo ai ma Isaraela na e.

6 Kua fofola ai a lautolu tuga ne tau pahua; tuga ne tau kaina ke he kauvai he vai lele; tuga ne tau aloe foki kua to e Iehova; tuga ne tau arasi foki ke he kauvai.

7 To liligi ai e ia e maga vai mai he hana tau vai, to ha i ai foki hana fanau ke he tau vai loga; ko e mena mua foki hana patuiki kia Akako, to fakamatalahi ai foki hana kautu.

8 Ne ta mai he Atua a ia mai Aikupito, kua ha ia ia e mafiti lahi tuga ne mafiti he rema; to kai ai e ia e tau motu kehe ko lautolu kua favale atu kia ia; ti gau ai e ia ha lautolu a tau huiatua, kua tuina ai a lautolu ke he hana tau fana.

9 Kua fakamemege a ia, kua takoto ai a ia tuga ne leona, ke tuga ne leona fifine foki; ko hai kia taha ke fakalagalaga a ia? Kua monuina a ia kua fakamonuina atu kia koe, ka e malaia a ia kua kaialu atu kia koe.

10 Ti tupu ai e ita a Palako kia Palaamo, kua pati ai e ia hana tau lima; ti pehe atu foki a Palako kia Palaamo, Ne ta mai e au a koe ke kaialu ke he haku a tau fi, ka e kitiala, ko e lagatolu ia kua fakamonuina ni e koe a lautolu.

11 Hanai, kia hola a a koe ke he hau a mena ke nofo ai; ne pehe atu au to fakalilifu atu ai e au a koe, ka e kitiala, kua taofi e Iehova a koe neke fakalilifu ai a koe.

12 Ti pehe atu a Palaamo kia Palako, Nakai kia vagahau atu ai au ke he tau fekau hau ne fakafano age e koe kia au, kua pehe atu.

13 Kaeke ke foaki mai e Palako kia au e tau ario mo e tau auro ke puke ai hana fale nakai maeke kia au ke holi e kupu a Iehova, ke eke ai e au ha mena mitaki po ke mena kelea he haku loto ni, ka ko e kupu ni ke vagahau mai ai a Iehova to talahau atu ni e au.

14 Hanai, kitiala, ko e fano ne fai au ke he haku a motu kia haele mai a, to fakatonu atu e au kia koe e tau mena ke eke ai he motu na ke he motu hau ke he tau aho a mui.

15 Ti taute ai e ia hana fakatai, kua pehe atu, Ko e kupu hanai a Palaamo ko e tama a Peoro, ko e kupu hanai he tagata kua ala ai hana tau mata.

16 Kua pehe atu a ia ne logona ai e tau kupu he Atua, mo e iloa ai e pulotu hana ne mua ue atu; kua iloa foki e tau mena ne fakakite mai E ia hana e malolo oti kana, ne veli ai a ia, ka e mena ala ni hana tau mata.

17 To kitia e au a ia ka e nakai kitia aenei; to kitekite atu au kia ia ka e nakai tata mai; to hau ai e fetu mai Iakopo; to tu mai foki e tokotoko ia Isaraela, ti keli ai e ia e na fahi ua a Moapi, mo e fakaotioti ai e fanau oti a Setu.

18 Ti eke ai a Etoma mo tufaaga, ti eke ai foki a Seira mo tufaaga ha lautolu kua eke mo tau fi ha lautolu; ti eke ai a Isaraela mo tau toa.

19 To pule foki e taha mai Iakopo, ti fakaotioti foki e ia a ia ne toe ke he maga.

20 Kua kitia atu foki e ia a Amaleka, ti taute ai e ia hana fakatai kua pehe atu, Ko Amaleka ne fakamua a ia he tau motu ka ko e hana fakahikuaga ke mahaikava tukulagi a ia.

21 Ti kitia atu e ia e tau tagata Kenī, ti taute ai e ia hana fakatai, kua pehe atu, Kua mau hau a mena ke nofo ai; kua taute foki e koe hau a fata ke he maka.

22 Ka e pete ni e mena ia to fakaotioti ai a Kenī, ato hoko ni ke he vaha ke eke ai a koe mo tau tagata ne fofo he kau a Asuria.

23 Ti taute ai e ia hana fakatai, kua pehe atu, Oi te fakaalofa, to moui a hai ka eke ai he Atua e tau mena na?

24 To o mai e tau vaka he motu ko Kitimo, mo e fakamamahi ai e lautolu a Asuria, ti fakamamahi foki e lautolu a Heperu, ti mahaikava tukulagi foki a ia.

25 Ti matike a Palaamo, mo e fano ti liu atu a ia ke he hana motu; ti fano foki a Palako ke he hana puhala.