Levitika

22 KUA vagahau mai a Iehova kia Mose kua pehe mai,

2 Kia vagahau atu a koe kia Arona mo e hana tau tama tane, kia fakamamao a lautolu mo e tau mena tapu he fanau a Isaraela, ke aua neke holitu e lautolu haku a higoa tapu ke he tau mena ha lautolu kua fakatapu ai e lautolu maku; ko au ko Iehova.

3 Ti pehe atu kia lautolu, Kaeke ke fano e tagata he tau magafaoa oti ha mutolu ke he tau hau ha mutolu a mui, ke he tau mena tapu kua fakatapu ai he fanau a Isaraela ma Iehaova, ka e ha ha ia ia e mena ke kelea ai a ia; to vevehe kehe ni e tagata ia ki mua haku; ko au ko Iehova.

4 Kaeke ke lepela e tagata he magafaoa a Arona, po ke ha ia ia e gagao pela, nakai kai e ia e tau mena tapu ato mea ai a ia; ko ia foki kua piki atu ke he mena kua kelea ha ko e tino he tagata kua mate, po ke tagata kua pa ai a puke vai he hana tino;

5 Kaeke foki ke pipiki atu he tagata ke he taha mena totolo ke kelea ai a ia, po ke tagata ke kelea ai a ia, ke he mena kelea ha ha ia ia;

6 Ko e tagata ka pipiki atu ki ai to kelea ai a ia ato hoko ke he afiafi, ti nakai kai foki e ia e tau mena tapu ato koukou e ia hana tino ke he vai.

7 Ka to e la ti mea a ia; ka mole ia ti kai ai e ia e tau mena tapu, ha ko e hana tau mena kai ni a ia.

8 Ko e mena kua mate noa, mo e mena kua hēhē aua neke kai ai e ia, neke kelea ai a ia he mena ia; ko au ko Iehova.

9 Kia taofi e lautolu haku a fekau, neke nonofo a lautolu mo e kelea, mo e mamate ai a lautolu, ka holi ai e lautolu ia; ko au ko Iehova kua fakatapu ai a lautolu.

10 Aua neke kai e taha tagata kehe e mena tapu; ko e tagata kua nofo mo e ekepoa, po ke gahua ai ke taui nakai kai e ia e mena tapu.

11 Kaeke foki ke fakafua he ekepoa ha tagata ke he hana tau tupe to kai ai e ia, katoa foki mo ia kua fanau ai ke he hana kaina; to kai ai e lautolu ni hana mena kai.

12 Kaeke foki ke faitane e tama fifine he ekepoa ke he tagata kehe, aua neke kai ai e ia e poa he tau mena tapu.

13 Ka ko e tama fifine he ekepoa kaeke kua mate hana tane, po ke tiaki e ia a ia, mo e nakai fai tama a ia, ti kua liu mai a ia ke he kaina he hana matua tuga ne vaha ne tamafine ai a ia, to kai ni e ia e tau mena kai he hana matua; ka e nakai kai ai he tagata kehe.

14 Kaeke foki ke kai he tagata e mena tapu mo e nakai iloa, ti lafilafi atu e ia ki ai hana maga ne lima aki he mena ia, ti uta ai e ia ke he ekepoa, katoa mo e mena tapu.

15 Aua neke fakakelea foki e lautolu e tau mena tapu he fanau a Isaraela, kua ekepoa ai e lautolu kia Iehova;

16 Ti eke foki e mutolu a lautolu ke nonofo mo e kelea ha ko e hehe, ka kai ai e lautolu e tau mena tapu; ha ko au ko Iehova kua fakatapu a lautolu.

17 Kua vagahau mai foki a Iehova kia Mose, kua pehe mai,

18 Kia vagahau atu a koe kia Arona, mo e hana tau tama tane, katoa mo e fanau oti a Isaraela, ti pehe atu a koe kia lautolu, Kaeke kua fia ta atu he tagata he magafaoa a Isaraela, po ke tagata kehe kua nofo i Isaraela, hana poa he tau mena oti ne omonuo ai a ia, mo e tau mena oti kua makai ki ai hana loto ke eke, kua ekepoa ai e lautolu kia Iehova ke eke mo poa huhunu;

19 Kia ofania a mutolu, kia eke ai e mutolu e manu tane kua katoatoa e mitaki he tau povi, po ke tau mamoe, po ke tau koti.

20 Aua neke ta atu e manu kua ha i ai ha kelea, ha ko e mena nakai talia a ia ma mutolu.

21 Kaeke ke ta atu he tagata e poa fakaaue kia Iehova, ke fakamoli aki e mena ne omonuo ai a ia, po ke poa kua makai ki ai hana loto, ko e povi, po ke mamoe, kia uta ai e manu kua katoatoa e mitaki, kia ofania a ia; aua neke ha i ai ha mena kelea ke kelea ai a ia.

22 Ko e mena kua matapouli, po ke fatia, po ke kafokia, po ke fai gagao pela, po ke gagao matafune, po ke magiho kua papa ai, aua neke uta e tau mena ia kia Iehova, ti ua eke ia mo poa kua eke ke he afi ki luga he fatapoa kia Iehova.

23 Ko e povi foki, mo e punua mamoe kua ha i ai ha mena kehe, po ke punua kovi, kua maeke ni ke ekepoa ai ke eke mo poa kua makai ki ai hana loto ke eke, ka e nakai talia ai a ia ka eke mo mena kua omonuo ai.

24 Aua neke uta kia Iehova ha manu kua tukia, po ke malipilipi, po ke mafaki, po ke helehele ai hana mouiaga; ti ua eke foki e mena ia ke he motu ha mutolu.

25 Ti ua uta foki e mutolu mai he lima he tagata kehe e tau mena kai he ha mutolu a Atua ke he taha mena he tau mena oti ia; ha kua ha he tau mena ia ha lautolu a kelea, kua ha he tau mena ia e tau tepu; ti nakai talia ia ma mutolu.

26 Kua vagahau mai foki a Iehova kia Mose, kua pehe mai,

27 Ka fanau ai e punua povi, po ke mamoe, po ke koti, ti tokai a ia mo e hana matua po fitu, ka e kamata ke he po valu hana mo e tau aho i mua haia ke talia ai a ia mo poa kua eke ke he afi kia Iehova.

28 Aua neke keli e mutolu e povi, po ke mamoe, katoa mo e hana punua ke he aho taha.

29 Kaeke foki ke eke e mutolu e poa fakaaue kia Iehova, ti eke ni mo e fakamakai.

30 Ka kai e mena ia ti kai oti ai ni ke he aho taha; aua neke toka e mutolu ha mena ato a pogipogi; ko au ko Iehova.

31 Kia taofi e mutolu haku tau poaki, mo e eke ai e mutolu ia; ko au ko Iehova.

32 Ti aua neke holitu e mutolu haku a higoa tapu; ka kia fakatapu ai au ke he fanau a Isaraela; ko au ko Iehova kua fakatapu ai a mutolu;

33 Ne ta mai a mutolu mai he motu ko Aikupito, ke eke au mo Atua ha mutolu; ko au ko Iehova.