1 Tau Patuiki

16 TI hoko mai ai e kupu a Iehova kia Iehu ko e tama a Hanani kia Paasa, kua pehe mai,

2 Ne ta hake e au a koe mai he kelekele, mo e kotofa e au a koe ke eke mo takitaki he haku motu ko Isaraela; ka kua fano a koe ke he puhala a Ierepoamo, mo e fakatupu ai e koe e hala ke he motu haku ko Isaraela, ke fakahogohogomanava mai ai a lautolu kia au ke he tau hala ha lautolu.

3 Kitiala, ko e mena ia to uta kehe e au e fanau a Paasa, mo e fanau he hana magafaoa; to eke foki e au hau a magafaoa ke tuga e magafaoa a Ierepoamo ko e tama a Nepata.

4 Ko e tagata a Paasa ke mate ke he maga to kai he tau kuli a ia; ko e tagata hana ke mate ke he vao to kai ai he tau manulele he pulagi a ia.

5 Ko e tau mena ne toe ne eke e Paasa, mo e tau mena ne eke e ia, mo e hana malolo, nakai kia tohi ia ke he tohi ne tohi ai e tau tala ke he nofoaga he tau patuiki a Isaraela?

6 Ti takoto ai a Paasa fakalataha mo e hana tau matua, ti tanu ai a ia i Tiresa; ti eke e Ela hana tama tane mo patuiki ke hukuiaki a ia.

7 Ko Iehu foki ko e perofeta, ko e tama a Hanani, ne hoko mai ai e kupu a Iehova kia Paasa mo e hana magafaoa; ha ko e tau mena kelea oti ne eke e ia ki mua a Iehova, ke fakahogohogomanava atu kia ia ke he tau gahua he hana tau lima, he tuga ne magafaoa a Ierepoamo a ia, ha kua kelipopo foki e ia a ia.

8 Ko e tau uafulu ma ono ne patuiki ai a Asa i Iuta ne eke ai a Ela ko e tama a Paasa mo patuiki a Isaraela i Tiresa, ti ua e tau ne patuiki ai a ia.

9 Ti fakafualoto kia ia hana fekafekau ko Simeri, ko ia ne pule ke he maga ne veveheuaaki hana tau kariota; ha ha i Tiresa a ia ha ne inu a ia ke konahia ke he fale a Arasa ko e tagata ne pule ke he hana magafaoa i Tiresa.

10 Ti hu atu ai a Simeri mo e ta a ia, mo e kelipopo e ia a ia, ke he tau uafulu ma fitu ne patuiki ai a Asa i Iuta; ti eke a ia mo patuiki ke hukuiaki a ia.

11 Kua eke a ia mo patuiki, kua nofo a ia ke he hana nofoaiki, ti keli ai e ia e magafaoa oti a Paasa; nakai toka e ia kia ia ha tama tane taha, po ke taha he hana magafaoa, po ke hana tau kapitiga.

12 Ne fakaotioti ni e Simeri e magafaoa a Paasa, ke lata mo e kupu a Iehova ne vagahau mai ai e ia kia Paasa ne fakamatala e Iehu ko e perofeta.

13 Ha ko e tau hala oti a Paasa, mo e tau hala a Ela hana tama ne hala ai a laua, mo e fakatupu ai e hala kia Isaraela, ke fakahogohogomanava atu kia Iehova, ko e Atua a Isaraela ke he tau mena fakateaga ha lautolu.

14 Ko e tau mena ne toe ne eke e Ela, mo e tau mena oti ne eke e ia, nakai kia tohi ia ke he tohi ne tohi ai e tau tala ke he nofoaga he tau patuiki a Isaraela?

15 Ko e tau uafulu ma fitu ne patuiki ai a Asa i Iuta, ne patuiki ai a Simeri fitu e aho i Tiresa. Kua heapi ai e motu ke tau ki Kipetonu ko e maga ia he tau tagata Filisitia.

16 Ti logona he motu ke he heaga api e tala, Kua fakafualoto a Simeri, kua keli foki e ia e patuiki; ti kotofa ai e Isaraela oti ke he aho ia ke he heaga api, a Omeri ko e takitaki kau ke eke mo patuiki a Isaraela.

17 Ti o hake ai a Omeri mo Isaraela oti fakalataha mo ia i Kipetonu, mo e patakai ai e lautolu a Tiresa.

18 Kua kitia e Simeri kua moua e lautolu e maga; ti hu atu ai a ia ke he kolo ke he fale he patuiki, mo e huhunu ai e ia e fale he patuiki ki luga hana, ti mate ai a ia,

19 Ha ko e hana hala ne hala ai a ia he eke e ia e tau mena kelea ki mua a Iehova, mo e fano ai a ia ke he puhala a Ierepoamo, mo e hana hala ne eke e ia, ke fakatupu ai e hala kia Isaraela.

20 Ko e tau mena ne toe ne eke e Simeri, mo e hana fakafualoto ne fakafualoto ai a ia, nakai kia tohi ia ke he tohi ne tohi ai e tau tala ke he nofoaga he tau patuiki a Isaraela.

21 Ti veveheua ai e motu ko Isaraela; ne mumui atu taha veveheaga he motu kia Tipeni ko e tama a Kenati ke eke a ia mo patuiki ha lautolu; ka e mumui atu e taha veveheaga kia Omeri.

22 Ka e kautu e tau tagata ne mumui atu kia Omeri, ke he tau tagata ne mumui atu kia Tipeni ko e tama a Kenati; ti mate ai a Tipeni, ka e eke a Omeri mo patuiki.

23 Ko e tau tolugofulu ma taha ne patuiki ai a Asa i Iuta, ne eke ai a Omeri mo patuiki a Isaraela, ti hogofulu ma ua e tau ne patuiki ai a ia; ko e ono e tau ne patuiki ai a ia i Tiresa.

24 Ti fakafua e ia e mouga ko Samaria ia Simere ke he ua e taleni ario; ti ati ai e ia e maga ke he mouga, ti ui ai e ia e higoa he maga ne ati e ia ke he higoa a Simere ko e iki hana e mouga, ko Samaria.

25 Ka kua mahani kelea a Omeri ki mua a Iehova; kua homo atu hana mahani kelea kia lautolu oti ne mumua atu kia ia.

26 Ha kua fano a ia ke he tau puhala oti a Ierepoamo ko e tama a Nepata, mo e hana tau hala ne fakatupu ai e ia e hala kia Isaraela ke fakahogohogomanava kia Iehova, ko e Atua a Isaraela ke he ha lautolu a tau mena fakateaga.

27 Ko e tau mena ne toe ne eke e Omeri, mo e hana malolo he eke mena ai e ia, nakai kia tohi ia ke he tohi ne tohi ai e tau tala ke he nofoaga he tau patuiki a Isaraela?

28 Ti takoto a Omeri fakalataha mo e hana tau matua, ti tanu ai a ia i Samaria; ti eke hana tama ko Ahapo mo patuiki ke hukuiaki a ia.

29 Ko e tau tologofulu ma valu he patuiki ai a Asa i Iuta ne eke ai a Ahapo ko e tama a Omeri mo patuiki i Isaraela; ti uafulu ma ua e tau ne eke ai a Ahapo ko e tama a Omeri mo patuiki a Isaraela.

30 Ti mua e mahani kelea a Ahapo ko e tama a Omeri ki mua a Iehova kia lautolu oti ne mumua atu kia ia.

31 Ko e mena māmā kia ia he fano a ia ke he tau hala a Ierepoamo ko e tama a Nepata, ka e faihoana a ia kia Iesepela ko e tama fifine a Etipaala ko e patuiki he tau tagata Saitonu, ti fano a ia mo e fekafekau ai a ia kia Paala mo e fakaveli fakafohifo ki ai.

32 Ne fakatu foki e ia e fatapoa kia Paala ke he fale a Paala ne ta ai e ia i Samaria.

33 Ne eke foki e Ahapo e tupua Asaira; kua mua ue atu ni e tau mena ne eke e Ahapo ke fakahogohogomanava ai kia Iehova ko e Atua a Isaraela ke he tau patuiki oti a Isaraela ne mumua atu kia ia.

34 Ko e vaha ne patuiki a ia ne ati ai e Ieli ko e tagata Peteli a Ieriko; ne eke e ia e tau fakaveaga ti mate ai a Apiramo ko e hana tama uluaki, ne fakatu foki e ia e tau gutuhala he maga ti mate ai a Sikupu ko e hana tama fakamui, ke lata mo e kupu a Iehova ne vagahau mai ai e ia, ne fakamatala e Iosua ko e tama a Nuno.