Tau Salamo

39 NE pehe au, To fakaeneene e au ke he haku a mahani, neke hala au ke he haku alelo; to fakaeneene e au ke he haku a gutu mo e taofi ai, ka kua ha i mua haku e tau tagata mahani kelea.

2 Ne fakamate au mo e nakai vagahau; nakai vagahau au ke he tau mena mitaki; ti fakalagalaga ai haku a mamahi.

3 Ne vela haku loto i loto ia au; ko e haku a manamanatu foki ne puho ai e afi; ti vagahau ai haku alelo.

4 Iehova na e, kia fakailoa mai kia au haku a fakahikuaga, po ke fefe foki e fafati he haku a tau aho; kia iloa e au po ke fakatulaki a fe.

5 Kitiala, kua eke e koe haku a tau aho ke tuga ne hagatike; ko e haku a moui foki ki mua hāu tuga ne mena nakai ha i ai; ko e moli, ko e tau tagata oti ke he malolo ha lautolu ko e mena fakateaga ni haia. Sila.

6 Ko e moli, kua faifano e tagata tuga ne ata; ko e moli kua fakaatukehe teao a ia; kua tanaki koloa e ia ka e nakai iloa e ia po ko hai ke eke e koloa ia.

7 Hanai, ma Iki na e, ko e heigoa e mena kua tatali au ki ai? ha ha ia koe haku a amaamanaki.

8 Kia laveaki e koe au mai he haku a tau holifono oti; aua neke eke au mo mena ke va ki ai e tagata goagoa.

9 Kua fakamate au kua nakai vagahau; ha ko koe ni ne eke.

10 Kia toka a hāu a tā mai kia au; ha kua fakahiku tuai au he fahi mai he hāu a lima.

11 Ka e akonaki atu e koe ke he tagata ke he hau a tau fahi ha ko e hala, ti moumou ai e koe e tau mena kua fiafia ki ai a ia tuga ne kai he moko e tapulu; ko e moli, ko e tau tagata oti ko e mena fakateaga ia. Sila.

12 Iehova na e, kia fanogonogo mai a koe ke he haku a liogi, mo e fakateliga mai ke he haku a kalaga; aua neke fanogonogo tuli a koe ke he haku a tagi; ha ko e tagata kehe au ki mua hāu, mo e tagata paea, tuga ne tau matua oti haku.

13 Kia haga kehe a koe ia au, kia liu foki malolo au, to fano kehe au, mo e nakai ha i ai au.