1 Nofoaga he Tau Patuiki

28 NE fakapotopoto ai e Tavita e tau iki Isaraela oti ki Ierusalema; ko e tau iki he tau magafaoa, mo e tau iki he tau vahega ne fekafekau ke he patuiki, mo e tau iki he tau takiafe, mo e tau iki he tau takiteau, mo e tau iki ne leveki e tau koloa oti mo e tau fuifui manu he patuki, mo e hana tau tama tane, ko e tau fekafekau ne mua foki, mo e tau tagata malolo, katoa mo e tau toa malolo oti.

2 Ti tu ai e patuiki ko Tavita, mo e pehe atu a ia, Haku a tau matakainaga na e, mo e haku a motu na e, kia fanogonogo mai a a mutolu kia au; ha ha i ai ke he haku loto ke ta e fale ke toka ai e puha he maveheaga a Iehova, mo fakatuaga hui foki he Atua ha tautolu, kua oti foki he taute e au ke ta e fale.

3 Ka kua pehe mai e Atua kia au, Nakai ta e koe e fale ma e higoa haku, ha ko koe ko e tagata tau, mo e fakamaligi toto e koe.

4 Ne fifili e Iehova ko e Atua a Isaraela au mai he magafaoa oti he haku matua ke eke mo patuiki a Isaraela tukulagi; ha kua fifili e ia a Iuta ke eke mo iki; ti fifili e magafaoa he matua tane haku ke he magafaoa a Iuta; kua finagalo mai foki a ia kia au he tau tama tane he haku matua ke eke mo patuiki a Isaraela oti.

5 Kua fifili foki e ia haku tama ko Solomona he tau tama tane oti haku, (ha kua foaki mai e Iehova kia au e tau tama tane tokologa,) ke nofo ai ke he nofoaiki he kautu a Iehova ke pule kia Isaraela.

6 Kua pehe mai foki a ia kia au, Ko e tama hau ko Solomona, to ta e ia haku a fale mo e haku a tau lotopā; ha kua fifili e au a ia ke eke mo tama haku, to eke foki au mo matua hana.

7 To fakamau tukulagi foki e au hana kautu, kaeke ke fakamalolo a ia ke eke haku a tau poaki mo e haku a tau fakafiliaga, tuga he eke ai ke he aho nai.

8 Hanai, kua pehe atu au kia mautolu ki mua a Isaraela oti, ko e fakapotopotoaga a Iehova, kua fanogonogo mai foki ha tautolu a Atua, kia omaoma a mutolu mo e kumi ai e tau fakatufono oti a Iehova ha mautolu a Atua; kia eke ai ma mutolu e motu mitaki nai, ke toka atu foki ma e fanau ha mutolu mo tufaaga tukulagi ka mole atu a mutolu.

9 Ko koe foki haku tama na e ma Solomona, kia iloa e koe e Atua he hau a matua, mo e fekafekau a koe kia ia mo e hau a loto katoa, mo e loto fiafia, ha kua kumi e Iehova ke he tau loto oti, kua fioia foki e ia e tau fatuakiloto oti he tau manatu; kaeke ke kumi e koe a ia, ti moua e koe a ia; ka ko e mena ka toka e koe a ia, to tiaki tukulagi e ia a koe.

10 Hanai, a koe kia koe, ha kua fifili e Iehova a koe ke ta e fale ke eke mo faituga; kia fakamalolo a, mo e eke ai e koe.

11 Ti ta age e Tavita ke he hana tama ko Solomona e fakatai he fakamaluaga, mo e hana tau fale, mo e hana tau mena ke tanaki ai e tau koloa, mo e hana tau poko i luga, mo e hana tau poko i loto, mo e fale he nofoaiki ha fakaalofa noa;

12 Ko e fakatai foki he tau mena oti ne moua ai e ia he Agaga, ko e tau lotopa he fale a Iehova, mo e tau poko oti ne takai ai ke tavaki ai e tau koloa he fale he Atua, mo e tau koloa kua fakatapu;

13 Katoa foki mo e tau mena ma e tau vahega he tau ekepoa mo e tau tagata Levi, ke lata foki mo e tau gahua oti ke fekafekau ai ke he fale a Iehova, mo e tau kapiniu oti ke fekafekau ai ke he fale a Iehova;

14 Ne age e ia e auro kua fafati ke lata mo e tau mena kua eke aki he auro, ma e tau mena oti ke he tau gahua kehekehe; ko e ario foki ke lata mo e tau mena oti kua eke aki he ario kua fafati, ma e tau mena oti ke he tau gahua kehekehe;

15 Kua fafati foki e auro ke eke aki e tau fakatuaga lamepa, mo e ha lautolu a tau lamepa auro, kua fafati takitaha e tau fakatuaga lamepa katoa mo e tau lamepa ha lautolu; ko e tau fakatuaga lamepa ario foki, kua fafati e ario ke lata ke eke aki e tau fakatuaga lamepa takitaha mo e ha lautolu a tau lamepa, ke lata mo e tau mena ke eke ai ke he tau fakatuaga lamepa oti takitaha.

16 Kua fafati e auro ma e tau laulau ma e tau areto fakatokatoka ki mua, ko e auro ne lata ke eke aki e tau laulau takitaha; mo e ario ne lata ke eke aki e tau laulau ario;

17 Ko e tau auro mitaki ke eke aki e tau huki, mo e tau kumete, mo e tau kapiniu ahu; ko e tau kapiniu auro foki kua fafati e auro ke eke aki e tau kapiniu takitaha; ko e tau kapiniu ario foki kua fafati e ario ke eke aki e tau kapiniu takitaha.

18 Ko e tau auro kua fakamea kua fafati ke eke aki e fatapoa ke huhunu ai e tau mena manogi; ko e fakatai foki he kariota ko e tau kerupi auro haia, kua fofola ai e tau tapakau ha laua, mo e fakamalu ai e puha he maveheaga a Iehova.

19 Ne pehe age a Tavita, Ne fakakite mai e tau mena oti ia kia au ke he tohi mai he lima a Iehova, ko e tau gahua oti he fakatai nai.

20 Ne pehe age foki a Tavita ke he tama hana ko Solomona, Kia fakamalolo a mo e fakamanavalahi a koe, mo e eke e koe e tau mena na; ua matakutaku a koe, ti ua fakaatukehe; ha ko Iehova ko e Atua, ko e Atua haku, ha ha ia koe a ia, nakai toka e ia a koe, to nakai tiaki e ia a koe, ato fakahiku ai e tau gahua oti kua lata ke fekafekau ai ke he fale a Iehova.

21 Ti kitiala, ko e tau vahega he tau ekepoa mo e tau tagata Levi, kua fekafekau ai a lautolu ke he tau mena oti ke he fale he Atua; to fakalataha foki mo koe ke he tau gahua oti ni, e tau tagata oti kua makai ki ai e tau loto ha lautolu kua iloilo foki a lautolu ke eke e tau gahua oti, ko e tau iki foki mo e motu oti to omaoma a lautolu ke he tau kupu oti hāu.