Iosua

2 NE fakafano atu e Iosua ko e tama a Nuno, e na tagata tokoua i Sitima ke toko fufu atu ke he motu, kua pehe atu, Kia o a a mua ke kitekite ke he motu ko Ieriko ni. Ti o ai a laua mo e hu atu ke he fale he fifine fakataka ko Raava hana higoa, ti nonofo ai a laua.

2 Ti tala age ai ke he iki i Ieriko, kua pehe age, Kitiala, kua o mai ki hinai ke he po nai e tau tagata he fanau a Isaraela ke toko ke he motu.

3 Ti fakafano age he iki Ieriko kia Raava, kua pehe age, Kia ta mai e koe e tau tagata kua o atu kia koe, ko e na tagata kua huhu atu ke he fale hau; ha kua o mai ni a laua ke toko ke he motu oti.

4 Ka kua uta he fifine e na tagata tokoua, ti fufu e ia a laua, ti tala age a ia, pehe, Ne o mai e tau tagata kia au, ka e nakai iloa e au po ke o mai i fe a laua;

5 Kua hoko ke he magaaho ke pa ai e gutuhala; kua pouli tuai, ti o atu ai e tau tagata ia; nakai iloa e au po ke mena fe kua o ki ai e tau tagata, kia tutuli atu fakaave a mutolu kia laua, ko e mena moua atu ni e mutolu a laua.

6 Ka kua ta hake tuai e ia a laua ke he tua fale, mo e fufu ai e ia a laua ke he tau kakau lino ne folafola ai ki luga he tua fale.

7 Ti tutuli atu e tau tagata kia laua, ke he puhala ke pu atu ki Ioritana ke he hala potaki he vailele; ti pa foki e lautolu e gutuhala, ka kua o a lautolu ne tutuli atu kia laua.

8 Ti hake ai e fifine kia laua ke he tua fale ki luga; ka kua nakaila takoto a laua;

9 Ti pehe atu a ia ke he tau tagata, Kua iloa e au kua foaki atu e Iehova e motu kia mutolu, ha kua hoko mai e matakutaku kia mautolu ha ko mutolu, mo e fakaatukehe ai a lautolu oti kua nonofo ke he motu ha ko mutolu.

10 Nukua logona tuai e mautolu ne fakapakupaku ai e Iehova e vai he Tahi Kula ha ko mutolu, he o mai a mutolu i Aikupito; ko e mena foki ne eke e mutolu ke he na iki tokoua he tau tagata Amori ko Sikona, mo Oko, ne nonofo ke he fahi atu a Ioritana, ne fakaoti ai e mutolu a laua.

11 Ne logona e mautolu e tau mena ia, ti faliu puke vai ai ha mautolu a tau loto, to nakai tuai fai malolo e tau tagata ha ko mutolu; ha ko Iehova ko e ha mutolu a Atua, ko e Atua a ia he lagi i luga, mo e lalolagi i lalo nai.

12 Hanai, kia omonuo mai a mua kia au kia Iehova, ha kua fakaalofa atu au kia mua, ti fakaalofa mai a mua ke he magafaoa he haku matua, ti foaki mai e mua e fakamailoga fakamoli;

13 Mo e fakamoui e mutolu haku a matua tane, mo e haku a matua fifine, mo e haku tau tugane, mo e haku tau matakainaga, mo lautolu oti ha ha ia lautolu, mo e laveaki mai e mutolu a mautolu he mate.

14 Ti tali mai ai e tau tagata kia ia, Ko e moui ha maua ke hukui aki a mutolu ke he mate, kaeke ke nakai talahau e koe ha maua a fekau nai. Ka foaki mai foki e Iehova e motu nai kia mautolu, ti fakaalofa atu a mautolu kia koe, mo e fakamoli atu a mautolu kia koe.

15 Ti tuku hifo ai e ia a laua he fakamaama ke he toua; ha ko e mena ha i luga he kaupa he maga hana fale, ti nofo ai a ia ki luga he kaupa.

16 Ti pehe atu a ia kia laua, Kia o atu a mua ke he mouga, neke feleveia ai a mua mo lautolu ne tutuli atu kia mua, ti fakamumuli ai a mua ke tolu e po, ato liliu mai a lautolu ne tutuli atu kia mua, ka mole ia ti o atu ai a mua ke he fenoga ha mua.

17 Ti pehe mai e tau tagata kia ia, To mea a maua he hau a omonuo nai ne pehe mai a koe ke omonuo atu ai e maua.

18 Kitiala, ka o mai a mautolu ke he motu, ti pipi e koe e toua filo kula nai ne tuku hifo ai e koe a maua, ke he fakamaama; ti fakapotopoto mai ai kia koe ke he fale hau, hau a matua tane, mo e hau a matua fifine, mo e hau a tau matakainaga, katoa mo e magafaoa oti he hau a matua tane.

19 Kaeke ke hu atu taha ki fafo he tau gutuhala he hau a fale, to ha ha i luga hana ulu hana toto, ka e mea ni a maua, ka ko ia ha ha he fale mo koe, ke ha i luga ha maua a tau ulu hana toto, kaeke ke hoko atu kia ia ha lima.

20 Ka ko e mena kaeke ke talahau e koe e fekau nai ha maua, ti mea ai a maua he hau a omonuo ne pehe mai a koe ke omonuo atu ai a maua kia koe.

21 Ti pehe atu ai a ia kia laua, To eke ni ke tuga ne tau kupu ha mua. Ti fakafano atu e ia a laua, ti o ni a laua. Ti pipi foki e ia e toua kula ke he fakamaama.

22 Ti o ai a laua, kua hoko atu ke he mouga, ti aho tolu he nonofo ai a laua, ato liliu mai a lautolu ne tutuli atu kia laua; ne kumi a laua he tau tagata ne tutuli atu kia laua, ke he puhala oti, ka e nakai moua.

23 Ti liliu mai e na tagata tokoua ia, kua hifo a laua he mouga, ti o a laua ke he fahi atu he vailele, mo e o atu kia Iosua ko e tama a Nuno, ti tala age a laua kia ia e tau mena oti ne hoko kia laua;

24 Ti pehe age a laua kia Iosua, Kua tuku mai ni e Iehova e motu oti ke he tau lima ha tautolu, ti fakalolelole foki a lautolu oti kua nonofo ke he motu ki mua ha tautolu.