1 Samuela

31 KUA tau e tau tagata Filisitia mo Isaraela; ti fehola ai e tau tagata Isaraela ki mua he tau tagata Filisitia; kua veveli a lautolu mo e tuina ai a lautolu ke he mouga ko Kilepoa.

2 Ti tutuli fakalahi he tau tagata Filisitia a Saulo mo e hana tau tama tane; ti keli ai he tau tagata Filisitia a Ionatana, mo Apinatapu, mo Makisua, ko e tau tama ia a Saulo.

3 Kua mamafa e tau kia Saulo, kua moua atu a ia he tau fana he tau tagata fana, kua tuina lahi a ia he fana he tau tagata fana.

4 Ti pehe age a Saulo ke he hoa hana, Kia āki e koe hau a pelu, mo e hoka aki e koe au; neke hohoko mai e tau tagata nakai peritome na, ti hoka e lautolu au, mo e eke fakakelea mai e lautolu kia au. Ka e nakai mafai hana hoa, ha kua matakutaku lahi a ia; ti toto ai e Saulo e pelu, mo e fakaveli ai ki luga hana.

5 Kua kitia he hoa hana kua mate a Saulo, ti fakaveli foki a ia ki luga hana pelu, ti mate ai a ia fakalataha mo ia.

6 Kua mamate ai a Saulo, mo e hana tau tama tane tokotolu, mo e hana hoa, katoa foki mo e hana tau tagata oti fakalataha mo ia ke he aho ia.

7 Kua kitia he tau tagata Isaraela ha ha i ai ke he fahi atu he pahua, katoa mo lautolu ke he fahi atu a Ioritana, kua fehola e tau tagata Isaraela, mo e mamate a Saulo mo e hana tau tama tane, ti tiaki ai e lautolu e tau maga, mo e fehola a lautolu; ti o mai e tau tagata Filisitia mo e nonofo ai.

8 Kua hoko ke he aho a pogipogi, ti o age ai e tau tagata Filisitia ke akiaki e tau tapulu ha lautolu kua keli; ti moua ai e lautolu a Saulo mo e hana tau tama tane tokotolu kua takaveli ai ke he mouga ko Kilepoa.

9 Ti hio ai e lautolu hana ulu, mo e āki ai e lautolu hana tau tapulu tau, ti fakafano atu e lautolu ke he motu he tau tagata Filisitia, ke fakamatala takai ai ke he fale he tupua ha lautolu, katoa mo e motu.

10 Ti tuku e lautolu hana tau tapulu ke he fale a Asaira, ka ko e hana tino kua fakamau ai e lautolu ke he kaupa i Petesani.

11 Kua logona e lautolu kua nonofo i Iapesa-Kiliata e tau mena kua eke he tau tagata Filisitia kia Saulo;

12 Ti mamatike ai e tau tagata malolo oti, ti o atu ai a lautolu, ke he po katoa; ti uta e lautolu e tino a Saulo, mo e tau tino he hana tau tama tane mai he kaupa i Petesani, ti o atu ai a lautolu ki Iapesa; ti huhunu ai e lautolu a lautolu.

13 Ti uta e lautolu ha lautolu a tau hui atua, mo e tanu ai i lalo he akau lahi i Iapesa, ti fakakanopogi po fitu ai a lautolu.