Levitika

25 KUA vagahau mai a Iehova kia Mose ke he mouga ko Sinai, kua pehe mai,

2 Kia vagahau atu a koe ke he fanau a Isaraela, ti pehe atu kia lautolu, Ka hohoko atu a mutolu ke he motu kua foaki atu e au kia mutolu, ti eke ai e mutolu e sapati ke toka noa ai e kelekele kia Iehova.

3 Ono ni e tau ke gana saito ai ke he hau a fonua, ti ono e tau ke taute ai hau a ulu vine, mo e tatanaki ai hana tau fua.

4 Ka ko e tau fitu kia eke ia mo sapati ke toka noa ai e kelekele, ko e sapati ni kia Iehova; aua neke gana ai e saito ke he hau a fonua, ti ua taute ai hau a uluvine.

5 Ko e tau mena foki ka tutupu noa mai he hau a heleheleaga saito, aua neke helehele ai, aua neke faki foki e koe e tau fuhi vine he hau a vine kua nakai taute; ko e tau ni a ia ke toka noa ai e kelekele.

6 To eke foki e sapati he kelekele mo mena kai ma mutolu, ko koe mo e hau a fekafekau tane, mo e hau a fekafekau fifine, mo ia kua eke hau a gahua ke palepale, katoa mo e tau tagata kehe kua nonofo ia koe.

7 Mo e hau a tau manu he kaina, katoa mo e tau manu he vao ke he hau a motu, to eke ni mo mena kai ma mutolu e tau mena oti ka tutupu ai.

8 Kia totou e koe fitu e tau kua eke ai mo tau sapati, ke fitu e tau kua taki fitu, ko e katoatoa foki he tau tau kua eke mo tau sapati ne fitu, ko e fagofulu ia ti hiva e tau.

9 Ti ulo ai e pu mo e leo lahi ke he aho hogofulu he fitu mahina ke he aho ke eke ai e lukutoto, kia ulo ai e mutolu e pu ke he ha mutolu a motu katoa.

10 Kia fakatapu e mutolu e tau limagofulu, mo e fakamatala ai e tokanoaaga ke he ha mutolu a motu kia lautolu oti kua nonofo ai; to eke ia mo iupeli kia mutolu, ti liliu atu ai a mutolu takitokotaha ke he hana fonua, kia liliu atu foki a mutolu takitokotaha ke he hana magafaoa,

11 Kia eke ai e mutolu e tau limagofulu mo iupeli kia mutolu; aua neke gana saito ai e mutolu, ti ua helehele foki e tau mena ka tutupu noa ai, ti ua faki e tau fuhi vine he hau a vine nakai taute.

12 Ha ko e tau he iupeli haia; ke tapu ni a ia kia mutolu; ko e tau mena kua tutupu mai he fonua ke kai ai e mutolu.

13 Ko e tau foki he iupeli ia ke liliu atu ai a mutolu takitokotaha ke he hana fonua.

14 Kaeke foki ke fakafua atu e koe ha mena ke he tagata kua katofia mo koe, po ke fakafua mai e koe ha mena he lima he tagata kua katofia mo koe, aua neke favale atu, ko e taha ke he taha.

15 Fakalata a koe ke he tau tau po ke fiha tali he iupeli ka fakafua mai e koe he tagata kua katofia mo koe, ti fakalata foki e ia ke he tau tau po ke fiha ke fua mai ai, ka fakafua atu e ia kia koe;

16 Kia fakalahi e koe hana totogi ke lata mo e tau tau loga, ti fakatote e koe hana totogi ke lata mo e tau tau gahoa; ha ko e mena fakalata ke he hana tau fuaaga po ke fiha kua fakafua atu e ia a ia kia koe.

17 Aua neke favale a mutolu ko e taha ke he taha; ka kia matakutaku a koe ke he hau a Atua; ha ko au ko Iehova ko e ha mutolu a Atua.

18 Kia eke e mutolu haku tau fakatufono, ti taofi e mutolu haku tau fakafiliaga, mo e eke ai ni; ti nonofo ai a mutolu ke he motu mo e nakai haofia.

19 To fua mai foki e kelekele hana tau fua, ti kai ai e mutolu mo e makona, ti nonofo ai foki a mutolu mo e nakai haofia.

20 Kaeke foki ke pehe mai a mutolu, To kai ha ha a mautolu ke he tau fitu kitiala, nakai gana saito ai a mautolu, po ke tatanaki ai e tau mena ha mautolu kua tutupu.

21 To poaki atu e au haku a monuina kia mutolu ke he tau ono, ti fua mai ai hana tau fua ke tatai mo e tau tau ne tolu.

22 Ti gana saito ai e mutolu ke he tau ke valuaki, mo e kai ai e tau fua tuai ato hoko a mutolu ke he tau hiva; ato moua ai e mutolu hana tau fua, to kai ai e mutolu e tau fua tuai.

23 Aua neke fakafua atu e mutolu e kelekele, kia uta fakaoti; ko e kelekele ni haku; ha ko e tau tagata kehe a mutolu, mo e tau tagata paea ki mua haku.

24 Ko e motu oti ke eke ma mutolu, kia toka atu ke he tagata ke liu fakafua mai ai hana fonua.

25 Kaeke kua nofogati tuai hau a matakainaga, ti fakafua atu e ia hana fahi fonua, kaeke ke fina atu taha he hana magafaoa ke liu fakafua mai ai, ti liu fakafua mai e ia e mena ne fakafua atu he hana matakainaga.

26 Kaeke ke nakai ha ia ia taha ke liu fakafua mai ai, ka moua ai e ia e mena kua lata ke liu fakafua mai ai e fonua;

27 Ti totou ai e ia e tau tau he hana fakafua, ti liuaki atu e tau mena ne toe ke he tagata ne fakafua atu ki ai, ti liu atu a ia ke he hana fonua.

28 Kaeke ke nakai moua e ia e mena kua lata ke liuaki mai ai e fonua kia ia, ti toka atu ai e mena kua fakafua atu kia ia ne fakafua atu ki ai, ato hoko ke he tau he iupeli; ka hoko ke he iupeli ti tuku mai kia ia, ti liu atu ai a ia ke he hana kaina.

29 Kaeke foki ke fakafua atu e taha ha fale, kua tu ki loto he maga kua puipui ke he pa, ti maeke a ia ke liu fakafua mai ai ka nakaila katoa e tau tali he fakafua atu ai; kua maeke a ia ke fakafua mai ai ka nakaila katoa e tau

30 Kaeke foki ke nakai fakafua mai ai ato katoa e tau, ti toka atu ai fakaoti e fale kua tu ki loto he maga kua puipui ke he pa, ma e tagata ne fakafua ai ke he hana tau hau; nakai liuaki atu ai ka hoko ke he iupeli.

31 Ka ko e tau fale ke he tau maga nakai fai pa ke takai aki, to talahaua ia ke tuga ne tau fonua ki uta; ti maeke ni ke liu fakafua mai ai, to tuku atu ai foki ia ka hoko atu ke he iupeli.

32 Ka ko e tau maga he magafaoa a Levi, ko e tau fale ke he tau maga he ha lautolu a tau fonua, kua maeke ke fakafua mai ai he magafaoa a Levi ke he tau vaha oti.

33 Ka fakafua ai foki e taha ha mena he magafaoa a Levi, ti tuku atu ai e fale kua fakafua ka hoko atu ke he iupeli, ko e maga foki kua eke māna; ha ko e tau fale ke he tau maga he magafaoa a Levi, ha lautolu haia ke he fanau a Isaraela.

34 Ka ko e tau fonua ki tua he tau maga ha lautolu, nakai maeke ke fakafua ai; ha ko e ha lautolu tukulagi haia.

35 Kaeke foki kua nofogati tuai hau a matakainaga, ti nakai maeke kia ia ha mena, ti lagomatai ai e koe kia ia, pete ni ko e tagata kehe, mo e tagata paea a ia; kia nofo ai a ia fakalataha mo koe.

36 Aua neke uta e koe ia ia e totogi fakalahi, po ke mena ke fakalahi aki; ka kia matakutaku ke he hau a Atua; kia nonofo ai hau a matakainaga fakalataha mo koe.

37 Aua neke uta e koe kia ia hau a tau tupe kia moua ai e taui fakalahi; ti ua ta age ki ai hau a tau mena kai kia moua mai ai foki mo e mena ke fakalahi aki.

38 Ko au ko Iehova ko e ha mutolu a Atua ne ta mai a mutolu he motu ko Aikupito ke foaki atu kia mutolu e motu ko Kanana; kia eke ai au mo Atua ha mutolu.

39 Kaeke foki ke nofogati hau a matakainaga kua nofo fakalataha mo koe, ti fakatau e ia a ia kia koe, aua neke fakatupa e koe a ia ke eke ai e ia e gahua he tupa.

40 Ka kia ha i ai a ia ia koe tuga ne fekafekau palepale, mo e tagata paea, ti fekafekau atu e ia kia koe ato hoko ke he tau he iupeli;

41 Ti fano kehe ai a ia ia koe, ko ia katoa mo e hana fanau fakalataha mo ia, ti liu atu a ia ke he hana magafaoa, mo e fonua he hana tau matua to liu atu ni a ia.

42 Ha ko e haku tau fekafekau a lautolu, ne ta mai e au mai he motu ko Aikupito; nakai fakafua ai a lautolu ke eke mo tau tupa.

43 Aua neke pule a koe kia ia mo e favale, ka kia matakutaku a koe ke he hau a Atua.

44 Ka ko e tau fekafekau tane mo e tau fekafekau fifine, mai he tau motu kehe, kua agaagai mai kia mutolu; to fakafua mai ia lautolu, ko e fekafekau tane mo e fekafekau fifine.

45 Ti fakafua mai foki e mutolu he fanau he tau tagata kehe kua nonofo mo mutolu, katoa mo e tau magafaoa ha lautolu kua fanau ai ke he motu ha mutolu; to eke foki a lautolu ma mutolu.

46 To eke foki he fanau ha mutolu a lautolu ka mole atu a mutolu, ke eke foki mo tufaaga ma lautolu; ke eke mo tau fekafekau ma lautolu tukulagi; ka ko e tau matakainaga ha lautolu ko e fanau a Isaraela, aua neke pule a mutolu mo e favale ko e taha ke he taha.

47 Kaeke foki ke maukoloa ai e tagata kehe, po ke tagata paea kua nofo fakalataha mo koe, ka ko e hau a matakainaga kua nofo fakalataha mo ia, kua nofogati a ia, ti fakafua atu ai e ia a ia ke he tagata kehe, po ke tagata paea kua nofo fakalataha mo koe, po ke fanau he magafaoa he tagata kehe;

48 Kua oti he fakafua atu a ia, kua maeke ke liu fakafua mai a ia; kua maeke ni ke he hana matakainaga ke liu fakafua mai a ia;

49 Ti maeke ni ke he matakainaga he hana matua tane ke liu fakafua mai a ia, po ke tau tama tane he matakainaga he hana matua tane; to maeke foki ke he taha he hana magafaoa ke liu fakafua mai a ia; ko ia foki ka maeke kia ia kia liu fakafua mai e ia a ia ni.

50 Ti totou foki e laua mo e tagata ne fakafua ai a ia e tau tau tali mai he fakafua ai a ia ke hoko atu ke he tau he iupeli; ti fakalata ai e tau tupe ke fakafuaaki a ia ke he tau tau ka totou, tuga ne tau tau he fekafekau palepale kia eke pihia ni kia ia.

51 Ka toe loga e tau, kia fakalata ki ai e totogi he hana liu fakafua mai, ti uta e tau tupe ia ke liu fakafua mai a ia.

52 Kaeke foki kua toe e tau tau gahoa ke hoko atu ke he tau he iupeli, ti totou ai mo ia, ti uta fakalata ke he hana tau tau ne toe e totogi ke fakafua mai ai a ia.

53 To ha i ai a ia mo ia tuga ne fekafekau palepale ke he taha tau mo e taha tau; aua neke pule e ia kia ia mo e favale ki ho mua.

54 Kaeke foki ke nakai liu fakafua mai a ia ke he tau tau ia, ti fano kehe a ia ke he tau he iupeli, ko ia katoa mo e hana fanau fakalataha mo ia.

55 Ha ko e tau fekafekau haku e fanau a Isaraela, ko e haku a tau fekafekau a lautolu ne ta mai e au mai he motu ko Aikupito; ko au ko Iehova, ko e ha mutolu a Atua.