1 Timoteo

2 HANAI, kua fakamua ke he tau mena oti kua tomatoma atu au ke eke e tau olelalo, mo e tau liogi, mo e tau tauvalo, mo e tau fakaaue ma e tau tagata oti kana;

2 Ma e tau patuiki, mo lautolu oti ne toka ai e pule, kia nonofo a tautolu fakatekiteki mo e nakai fakaatukehe, ke he mahani Atua ni mo e mahani fulumokoi;

3 Ha ko e mena mitaki ia mo e fakafiafia ki mua he Fakamoui ha tautolu ko e Atua,

4 Ko ia kua finagalo ke fakamomoui e tau tagata oti kana, mo e hokotia a lautolu he maama ke he kupu moli.

5 Ha ko e mena tokotaha ni e Atua, ti tokotaha foki e hulalo ke he Atua mo e tau tagata, ko e tagata ko Keriso Iesu haia;

6 Ko ia ne foaki noa mai e ia a ia ke eke mo lukutoto ma e tau tagata oti kana, ko e fakakiteaga ke he tau vaha kua lata ai;

7 Ne kotofa au ke he mena ia ke eke mo ogo mo aposetolo, (ko e kupu moli kua tala atu ai au ki mua ia Keriso, nakai pikopiko au,) ko e akoako he tau motu kehe ke he tua mo e kupu moli.

8 Hanai, kua manako au kia liogi e tau tane ke he tau mena oti, kua nikiti ki luga e tau lima kua nakai hala, kia nakai ita foki ti nakai mahalohalo noa.

9 Kua pihia mo e tau fifine, kia taute e lautolu a lautolu ke he tau tapulu kua gali, mo e maimaina mo e mahani fakalatalata; aua neke taute mo e lauulu fili, po ke auro, po ke tau penina, po ke tapulu fakafua lahi;

10 Ka kia taute a lautolu ke he tau gahua mitaki, (ko e mena haia kua lata mo e tau fifine kua talahaua e lautolu a lautolu kua mahani Atua.)

11 Kia ako mena e fifine mo e fakamate, mo e omaoma ni.

12 Ha ko e mena nakai maeke e au ke fakaako atu ha fifine, po ke pule ke he tane, ka kia fakamate ni.

13 Ha ko e mena ne eke fakamua a Atamu, ka e fakamui a Eva.

14 Ti nakai fakavai foki a Atamu, ka kua fakavai e fifine, ti holifono ai a ia;

15 Ka e fakamoui a ia ke he fanauaga he tau tama, kaeke ke tumau a ia ke he tua mo e fakaalofa, mo e mahani mitaki, katoa mo e mahani fakalatalata.