Kolose

4 KO mutolu e tau iki, kia ta age e mutolu e tau mena kua tonu, mo e tau mena kua lata ke he tau fekafekau ha mutolu, ha kua iloa e mutolu ha ha ia mutolu foki e Iki ke he lagi.

2 Kia fakamakamaka a mutolu ke he liogi, kia mataala ki ai mo e fakaaue.

3 Kia liogi ma mautolu foki, kia hafagi mai he Atua e puhala he kupu ma mautolu, ke vagavagahau atu ai ke he kupu a Keriso ne galo, ko e mena foki ia kua lili ai au.

4 Kia fakailoa atu ai e au, tuga ne mena kua lata ke vagavagahau atu ai au.

5 Kia o fano a mutolu mo e iloilo ki mua ha lautolu i tua, mo e fakaaoga e mutolu e tau aho he mouiaga nai.

6 Aua neke noa ha mutolu a tau kupu mo e fakaalofa, kia fakamasima ke he masima, kia iloa e mutolu ke tali fakatonu atu ke he tau tagata oti kana.

7 Ko e tau mena oti ha ha ia au, to fakailoa atu kia mutolu e Tuiko, ko e matakainaga fakahele a ia, mo e fekafekau fakamoli, na fekafekau fakalataha foki a maua ke he Iki.

8 Kua fekau atu e au a ia ha ko e mena nai, kia iloa e ia po ke fefe a mutolu, kia fakamafanatia foki e ia ha mutolu a tau loto,

9 Ko laua mo Onesemo, ko e matakainaga fakamoli a ia mo e fakahele, ko e ha mutlou foki a ia, to fakailoa atu e laua kia mutolu e tau mena oti kua eke i hinei.

10 Fakaalofa atu kia mutolu a Aritako, ko ia kua fakalataha mo au ke he fale puipui; katoa mo Mareko, ko e faoa a Panapa ia (kua moua e mutolu e poakiaga ki ai, ka fina atu a ia kia mutolu, kia talia e mutolu a ia;)

11 Fakaalofa atu foki a Iesu, ko ia kua higoa ko Iuso, ko lautolu haia ha he peritome; ko lautolu hoko lautolu ni kua gahua fakalataha mo au ke he kautu he Atua, ne eke foki a lautolu mo fakamafanatia kia au.

12 Ko Epafara, ko e ha mutolu foki a ia, fakaalofa a ia kia mutolu, ko e fekafekau a ia a Keriso, kua fakamakamaka a ia nakai noa ke he tau liogi ma mutolu; kia tumau a mutolu, mo e katoatoa e mitaki, mo e puke ke he finagalo oti he Atua.

13 Ha kua talahau e au a ia kua lahi hana fakamakutu ma mutolu, katoa mo lautolu ha i Laotikaia, mo lautolu ha i Iarapoli.

14 Fakaalofa kia mutolu a Luka ko e ekekafo fakahele, katoa mo Tima.

15 Fakaalofa ke he tau matakainaga ha i Laotikaia, ko Numefa foki, mo e ekalesia ha he fale hana.

16 Ka oti he totou e mutolu e tohi nai, kia uta ai ke totou ke he ekalesia i Laotikaia, kia totou foki e mutolu e tohi mai he ekalesia i Laotikaia.

17 Tala age foki kia Arekipa, A koe ke he gahua ne tuku atu kia koe ha he Iki, kia fakamau ai.

18 Ko e fakaalofa hanai kua tohi he haku a lima, ko au ko Paulo. Kia manamanatu a mutolu ke he haku a tau liliaga. Kia ha ha ia mutolu e fakaalofa noa. Amene.