1 Tesalonia

Ko e Tohi Fakamua a Paulo ke he Tau Tagata Tesalonia

1 KO e tohi hanai ha mautolu, ko Paulo, mo Siluano, mo Timoteo, ke he ekalesia he tau tagata Tesalonia ha he Atua ko e Matua, mo e Iki ko Iesu Keriso. Kia ha ha ia mutolu e fakaalofa noa, mo e monuina mai he Atua ko e Matua ha tautolu, katoa mo e lki ko Iesu Keriso.

2 Kua fakaaue a mautolu nakai noa ke he Atua, ha ko mutolu oti kana, kua totoku atu a mutolu ke he tau liogi ha mautolu,

3 Kua nakai noa ha mautolu a manatu ke he gahua ha mutolu ke he tua, mo e fakamalolo ke he fakaalofa, mo e fakauka ke he amaamanaki ke he Iki ha tautolu ko Iesu Keriso, ki mua he Atua, ko e Matua ha tautolu haia;

4 Ha kua iloa e mautolu e fifiliaga ha mutolu, ko e tau matakainaga na e kua ofania he Atua.

5 Ha ko e mena nakai hoko atu ha mautolu a vagahau mitaki kia mutolu, ko e kupu hokoia, ka ko e malolo, mo e Agaga Tapu, katoa mo e maliali ni, ha kua iloa e mutolu ha mautolu a mahani ha ko mutolu, he nofo ai a mautolu mo mutolu;

6 Ne fifitaki mai foki a mutolu kia mautolu, katoa mo e Iki, he talia e mutolu e kupu mo e matematekelea lahi, mo e fiafia mai he Agaga Tapu;

7 Ko e mena ia kua uta ai a mutolu mo fakafifitakiaga kia lautolu oti kua tua ha i Maketonia, katoa mo Akaia;

8 Ha kua tuogo atu mai ia mutolu e kupu he Iki; nakai kuenaia i Maketonia mo Akaia, ka e katoa foki mo e tau mena oti kua fakapuloa ai ha mutolu a tua ke he Atua; ko e mena ia kua nakai aoga ai ke vagahau atu a mautolu ha kupu ki ai.

9 Ha ko lautolu ni kua talahau atu e lautolu kia mautolu po ke fefe ha mautolu a hohoko atu kia mutolu, mo e ha mutolu a hagao mai ke he Atua mai he tau tupua ke fekafekau ke he Atua kua moui to moli.

10 Mo e tatali atu foki ke he hana Tama mai he lagi, ko ia ne fakatu mai e ia mai ia lautolu kua mamate, ko Iesu haia, ko ia kua laveaki a tautolu mai he ita ne tatali.