Luka

3 KO e tau ne hogofulu ma lima he pule a Tiperio Kaisara, ne pule a Ponotio Pilato ki Iutaia, ko Herota foki ko e patuiki a ia a Kalilaia, mo Filipo hana matakainaga ko e patuiki a ia a Ituraia mo e fahi ko Terekoniti, ko Lusanio foki, ko e iki a ia a Apilene;

2 Ko Ana mo Kaiafa, ko e tau ekepoa ne mua a laua, kua hoko mai ai e kupu he Atua kia Ioane e tama a Sakaria ke he tutakale.

3 Ti fano ai a ia ke he tau fahi oti a Ioritana, kua fakamatala atu e papatisoaga he tokihala kia fakamagalo ai e tau hala.

4 Tuga ne tohi ke he tohi he tau kupu a Isaia e perofeta, kua pehe mai, Ko e leo he taha tagata ne ui he tutakale, Ati tauteute a e mutolu e hala he Iki, ati fakahako foki e puhala māna.

5 To fakapuke e tau pahua oti, to fakatokolalo foki e tau mouga, mo e tau mena matiketike oti; to fakahakohako foki e tau mena keukeu, to fakamolemole foki e tau hala tule.

6 To kitia foki he tau tagata oti e fakamouiaga mai he Atua.

7 Ti kua tala age a ia ke he lanu tagata ne o mai ke papatiso e ia, Ko e fanau he tau gata gagau na e, ko hai kia ne fakakite atu kia mutolu ke fehola he ita ne tatali?

8 Kia fua mai a mutolu e tau fua ke lata mo e tokihala, ti ua pehe hifo ke he tau loto ha mutolu, Ko Aperahamo ha mautolu a matua; ha ko e mena tala atu e au kia mutolu, kua maeke ni ke he Atua ke fakatupu mai he tau maka nai e fanau ma Aperahamo.

9 Ha ne toka nai foki e toki he tau fu akau; ko e tau akau oti foki nakai fua mai e tau fua mitaki, to hio ia, mo e tolo ke he afi.

10 Kua hūhu mai kia ia e lanu tagata, kua pehe mai, Ti ko e heigoa e mena ke eke e mautolu?

11 Ti tala age a ia, kua pehe age kia lautolu, Ko e tagata ne ua hana tapulu tino, kia age kia ia kua nakai fai tapulu; ko e tagata ne fai mena kai, kia eke pihia foki e ia.

12 Ne o mai foki e tau telona kia papatiso a lautolu, mo e pehe mai kia ia, Ko e akoako na e, To eke ha e mautolu?

13 Ati tala age ai a ia kia lautolu, Ua fakahomo e mutolu e tau mena ne kotofa mai kia mutolu.

14 Kua hūhu foki e tau kau kia ia, kua pehe mai, Ka ko mautolu to eke ha e mautolu? Ti pehe age a ia kia lautolu, Ua fakamatakutaku atu e mutolu taha; ua tukumale e mutolu taha; kia talia e mutolu ha mutolu a palepale mo e fakamamate.

15 Ha ne talifaki e motu, mo e manamanatu oti ke he tau loto ha lautolu kia Ioane, po ke Keriso a ia;

16 Ti tala age a Ioane kia lautolu oti, kua pehe age, Ko au ni kua papatiso atu e au a mutolu ke he vai, ka ko ia ka haele mai, kua homo atu a ia ia au, nakai aoga au ke vevete e pipi he tau afialoalohui hana; ko ia ni ke papatiso a mutolu ke he Agaga Tapu mo e afi;

17 Ha he lima hana hana ako, to fakamea e ia hana tanakiaga saito; to fakapotopoto e ia e tau saito ke he hana fale saito, ka e huhunu e otaota he tau saito ke he afi nakai maeke he tamate.

18 Ko e falu a kupu fakamafana foki ne loga ne fakamatala ai e ia e vagahau mitaki ke he motu.

19 Ka kua akonaki e ia e patuiki ko Herota, ha ko Herotia e hoana he hana matakainga, ko Filipo, katoa mo e tau mena kelea oti ne eke e Herota;

20 Kua lafi e ia e mena ia ke he tau mena oti, ti kua tuku atu e ia a Ioane ke he fale puipui.

21 Kua papatiso foki e motu oti, ti papatiso mo Iesu, kua liogi a ia, ati maihiua ai e lagi,

22 Kua haele hifo e Agaga Tapu ki luga hana, kua tino mai, tuga ne lupe; kua hoko mai foki e leo mai he lagi, kua pehe mai, Ko e haku a Tama fakahele a koe, kua fiafia ni au kia koe.

23 Ko Iesu foki, ko e hoko la ia ke he tolu gofulu e tau tau hana, kua manatu foki e tau tagata, ko ia ko e tama a Iosefa, ko e tama a ia a Heli, 24 Ko e tama a ia a Matata, ko e tama a ia a Levi, ko e tama a ia a Meleki, ko e tama a ia a Iana, ko e tama a ia a Iosefa, 25 Ko e tama a ia a Matatia, ko e tama a ia a Amosa, ko e tama a ia a Naumo, ko e tama a ia a Eseli, ko e tama a ia a Nagai, 26 Ko e tama a ia a Maato, ko e tama a ia a Matatia, ko e tama a ia a Simei, ko e tama a ia a Iosefa, ko e tama a ia a Iuta, 27 Ko e tama a ia a Ioana, ko e tama a ia a Resa, ko e tama a ia a Serupapelu, ko e tama a ia a Neri, 28 Ko e tama a ia a Meleki, ko e tama a ia a Ati, ko e tama a ia a Kosamo, ko e tama a ia a Elemotamo, ko e tama a ia a Eru, 29 Ko e tama a ia a Iose, ko e tama a ia a Eliesera, ko e tama a ia a Iorimo, ko e tama a ia a Matata, ko e tama a ia a Levi, 30 Ko e tama a ia a Simeona, ko e tama a ia a Iuta, ko e tama a ia a Iosefa, ko e tama a ia a Ionano, ko e tama a ia a Eliakimo, 31 Ko e tama a ia a Melea, ko e tama a ia a Mainano, ko e tama a ia a Matata, ko e tama a ia a Natano, ko e tama a ia a Tavita, 32 Ko e tama a ia a Iese, ko e tama a ia a Opeta, ko e tama a ia a Poasa, ko e tama a ia a Salemona, ko e tama a ia a Nasona, 33 Ko e tama a ia a Aminatapu, ko e tama a ia a Arama, ko e tama a ia a Heseroma, ko e tama a ia a Faresa, ko e tama a ia a Iuta, 34 Ko e tama a ia a Iakopo, ko e tama a ia a Isaako, ko e tama a ia a Aperahamo, ko e tama a ia a Taraha, ko e tama a ia a Nakori, 35 Ko e tama a ia a Saruka, ko e tama a ia a Reu, ko e tama a ia a Peleko, ko e tama a ia a Heperu, ko e tama a ia a Saraha. 36 Ko e tama a ia a Kainano, ko e tama a ia a Afasata, ko e tama a ia a Semu, ko e tama a ia a Noa, ko e tama a ia a Lameko, 37 Ko e tama a ia a Metusela, ko e tama a ia a Enoka, ko e tama a ia a Iareto, ko e tama a ia a Maalaelu, ko e tama a ia a Kainano, 38 Ko e tama a ia a Enosa, ko e tama a ia a Setu, ko e tama a ia a Atamu, ko e tama a ia he Atua.