Luka

4 KUA liu hake tuai a Iesu mai Ioritana, kua puke ke he Agaga Tapu, ati uta ai a ia he Agaga ke he tutakale;

2 Kua kamatamata he tiapolo, a ia ke he fagofulu a aho. Ko e tau aho foki ia nakai kai ai a ia ha mena taha, kua mole atu e tau aho ia, ati oti ka e hoge a ia.

3 Ti pehe age e tiapolo kia ia, Kaeke ko e Tama he Atua a koe, ati tala age a ke he maka nai kia faliu mo areto.

4 Ti tala age a Iesu kia ia, kua pehe age, Kua tohi, Nakai ko e tau mena kai hokoia ke moui ai e tagata, ka ko e tau kupu oti he Atua.

5 Ti ta hake foki a ia he tiapolo ke he mouga tokoluga, kua fakakite atu kia ia e tau kautu oti he lalolagi ke he magaaho kiliku.

6 Ti pehe age e tiapolo kia ia, To ta atu oti e au kia koe e pule nai, mo e lilifu ha lautolu; ha kua tuku mai ia kia au, to ta atu foki e au kia ia na loto au ki ai;

7 Hanai, kaeke ke hufeilo mai a koe kia au, to eke e tau mena oti na māu.

8 Ti tali age a Iesu, kua pehe age kia ia, Satani na e, ati fano a a koe ki tua haku, nukua tohi, Kia hufeilo a koe ke he Iki hau a Atua, ko ia ni hokoia ke fekafekau a koe ki ai.

9 Ti uta e ia a ia ki Ierusalema, kua fakatu a ia ke he tapitapi he faituga, kua tala age kia ia, Kaeke ko e tama he Atua a koe, ati hopo hifo a koe he mena nei;

10 Ha ko e mena kua tohi, To poaki a ia ke he hana tau agelu kia koe, ke leveki kia koe;

11 Ke uta e lautolu a koe he tau lima ha lautolu, neke pakia hau a hui he maka.

12 Ti tali age ai a Iesu, kua pehe age kia ia. Kua pehe e kupu, Aua neke kamatamata a koe ke he Iki hau a Atua.

13 Kua fakaoti tuai he tau kamatamata oti he tiapolo kia ia, ti fano kehe a ia ia ia, ato hoko ke he taha aho.

14 Kua liu atu a Iesu he malolo he Agaga ki Kalilaia; kua puloa ke he fahi oti e ogo kia ia.

15 Kua fakaako a ia ke he tau sunako ha lautolu, kua nava kia ia e tau tagata oti.

16 Kua hoko foki a ia ki Nasareta, ne tupu ai a ia; ti kua hu atu a ia ke he sunako ke he aho sapati ko e hana mahani haia; kua tu ki luga ke totou.

17 Ti tuku age kia ia e tohi he perofeta ko Isaia. Kua fofola e ia e tohi, ati moua ai e mena ne tohi ai,

18 Ha ha i luga ia au e Agaga he Iki, ha kua fakauku e ia a au ke fakamatala e vagahau mitaki kia lautolu kua nonofogati; kua fakafano mai e ia au ke fakamalolo e tau loto ne malipilipi, ke fakamatala ai e tokonoaaga ke he kaumahala, kia ala ai foki e tau matapouli, ke toka noa ai a lautolu ne matematekelea,19 Ke ogoogo e tau kua mafola ai e finagalo he Iki.

20 Kua vakai e ia e tohi, mo e tuku atu ai ke he fekafekau, ti nofo hifo ai; ati mataono mai ai kia ia e tau tagata oti he sunako.

21 Ti kamata ai a ia ke talahau atu kia lautolu, Ko e aho nai kua fakamoli ai e tohi nai he fanogonogo ki ai a mutolu.

22 Ti nava a lautolu oti kia ia, kua ofo he tau kupu fakaalofa ne hopo mai he hana fofoga; kua pehe age a lautolu, Ka e nakai kia ko e tama a Iosefa a enei?

23 Ti pehe a ia kia lautolu, To talahau mai ni e mutolu e kupu fakatai nai kia au, Ko e ekekafo na e, kia fakamalolo a e koe a koe; ko e tau mena oti ne logona e mautolu kua eke e koe i Kapanaumi, kia eke a foki e koe i hinai ke he māga moli hāu.

24 Kua tala age foki a ia, Ko e moli, ke tala atu e au kia mutolu, Nakai talia ha perofeta he hana māga moli.

25 Ko e moli, ke tala atu e au kia mutolu; na tokologa e tau fifine takape ha ha i Isaraela ke he vaha a Elia, ne puipui maka e lagi tolu e tau ti ono e mahina, kua hoge lahi ai e motu oti.

26 Ka e nakai fakafano atu a Elia ke he taha ha lautolu, ka ko Sarafata hokoia ni, ko e māga i Saitonu, ke he taha fifine takape.

27 Ne tokologa foki e lepela ha i Isaraela ke he vaha he perofeta ko Elisaio; ka e nakai fakamea taha ia lautolu, ka ko Naamanu ni hokoia, ko e Suria.

28 Ti ita lahi a lautolu oti ha he sunako, he logona e lautolu a tau mena ia.

29 Kua mamatike a lautolu, kua vega a ia ki tua he māga, kua takitaki a ia ke he mena pāpāti he mouga ne toka ai ha lautolu a māga, kia fakahu hifo a ia.

30 Ka kua fano a ia ke he vaha loto ha lautolu kua haele kehe.

31 Kua hifo a ia ki Kapanaumi, ko e taha māga i Kalilaia; kua fakaako a ia kia lautolu ke he tau aho sapati.

32 Kua ofo lahi a lautolu he hana tau kupu, ha ko e kupu hana ne toka ai e pule.

33 Ha ha he sunako e tagata ha i ai e agaga he temoni kelea; ti kua ui mai a ia mo e leo lahi.

34 Kua pehe mai, Oi! Iesu na e ko e Nasareta, ko e heigoa hāu kia mautolu? Kua haele mai kia a koe ke mahakava ai a mautolu? Kua iloa e au a koe, ko e Tagata Tapu a koe he Atua.

35 Ti kua hataki e Iesu a ia, kua pehe age, Ati fakamate a, ti fano a koe ki fafo ia ia. Ti liti hifo he temoni a ia ki mua ha lautolu; ati fano ai ki fafo ia ia, nakai maona a ia.

36 Ati ofo ai a lautolu oti, kua fevagavagahauaki, kua pehe age, Ko e heigoa e kupu nai? ha kua fekau atu e ia e tau agaga kelea ke he pule mo e mana, ti o kehe atu ai a lautolu.

37 Ti tuogo atu e tala kia ia ke he tau mena oti he fahi ia.

38 Kua toka e ia e sunako, ka e hu atu ke he fale a Simona. Kua gagao e matua fugavai fifine a Simona he kafo vevela, kua gagao lahi; ti kua ole age a lautolu kia ia māna. 39 Ti tu age a ia ke he tapa hana, kua hataki e kafo vevela, ati maulu ai; kua matike ai agataha a ia, kua fekafekau kia lautolu.

40 Ko lautolu oti ha i ai e tau tagata gagao ke he tau kafo kehekehe, ne uta e lautolu a lautolu kia ia ke he magaaho ne to ai e la; kua fakalago hana tau lima kia lautolu takitokotaha, mo e fakamalolo a lautolu.

41 Kua o atu foki ki fafo e tau temoni ia lautolu ne tokologa, ha ha ne tauhea, kua pehe age, Ko koe ni e Keriso, ko e Tama he Atua. Kua hataki e ia a lautolu, aua neke vagahau a lautolu, nukua kitia e lautolu ko ia ko e Keriso.

42 Kua aho tuai, ti hu ai ki fafo a ia, kua haele ke he mena tokanoa; kua kumi a ia e lanu tagata, kua hoko kia ia, ti taofi e lautolu a ia, neke haele kehe a ia ia lautolu.

43 Ka e tala age a ia kia lautolu, Ko e mena lata ke fakamatala e au e vagahau mitaki he kautu he Atua ke he falu a māga foki; ha ko e mena ia ne fakafano mai ai au.

44 Ti fakamatala e ia ke he tau sunako i Kalilaia.