Gahua

8 KUA loto fakalataha foki a Saulo mo lautolu ke he keliaga hana. Ko e aho ia kua tupu ai e favale lahi ke he ekalesia i Ierusalema; kua mavehevehe foki a Iautolu oti ke he tau fahi a Iutaia mo Samaria, kua toe e tau aposetolo hoko lautolu.

2 Ne tanu foki a Setefano he tau tagata ne matakutaku ke he Atua, kua tagi tatuki lahi ai a lautolu kia ia.

3 Ka kua moumou e Saulo e ekalesia, kua hu a ia ke he taha fale mo e taha fale, mo e toho mai e tau tane mo e tau fifine, kua tuku atu ai ke he fale puipui.

4 Kua o fano foki a lautolu ne mavehevehe, mo e fakamatala atu e vagahau mitaki he kupu.

5 Kua hifo foki a Filipo ke he māga i Samaria, kua fakamatala atu ai e Keriso kia lautolu.

6 Kua hagao e moto tagata mo e loto fakalataha ke he tau kupu ne talahau atu e Filipo, kua fanogonogo a lautolu mo e kitekite ke he tau fakamailoga ne eke e ia.

7 Ha ko e mena kua o ki fafo e tau agaga kelea ke he tokologa ne heketia ai, kua tauui fakaleo lahi; kua fakamalolo foki e tokologa ne pareluti mo e tau kulikuli.

8 Kua fiafia lahi ni e māga ia.

9 Ka ko e taha tagata, ko Simona e higoa, ne eke fakamua e ia e tau lagatau he taulaatua ke he māga ia, kua ofo ai e tau tagata Samaria, kua talahau e ia ko ia kua mua.

10 Kua hagao atu a lautolu oti kana kia ia, ko e tau lalotagata katoa mo e tau iki, kua pehe age, Ko e malolo lahi he Atua e tagata nai.

11 Kua hagao a lautolu kia ia, ha kua leva hana fakaofo kia lautolu ke he hana tau lagatau he taulaatua.

12 Kua talia e lautolu a Filipo kua fakamatala e tala mitaki ke he tau mena he kautu he Atua, mo e higoa a Iesu Keriso, ti papatiso ai a lautolu, ko e tau tane katoa mo e tau fifine.

13 Ko Simona foki, kua talia e ia; kua papatiso foki a ia, ati nofo mau ai a ia mo Filipo, kua ofo lahi he kitekite ke he tau fakamailoga mo e tau mana lalahi ne eke.

14 Kua fanogonogo foki e tau aposetolo ha i Ierusalema kua talia e Samaria e kupu he Atua, ati fakafano atu ai e lautolu a Peteru mo Ioane kia lautolu.

15 Kua o mai foki a laua, ati liogi ai ma lautolu, kia moua e lautolu e Agaga Tapu.

16 Ha ko e vaha ia nakai la to hifo ai a ia ke he taha ha lautolu; ka kua papatiso hokoia a lautolu ke he higoa he Iki ko Iesu.

17 Ati fakalago atu ai ha laua a tau lima kia lautolu, ti moua ai e lautolu e Agaga Tapu.

18 Kua kitia e Simona, ko e fakalago he tau lima he tau aposetolo kua foaki atu ai e Agaga Tapu, ati age ai e ia e tau tupe kia laua,

19 Kua pehe age, Ta mai a foki kia au e pule nai, kia moua ai e Agaga Tapu he tagata ka fakalago ki ai hoku tau lima.

20 Ka kua tala age a Peteru kia ai, Kia fakahiku hau a tau ario fakalataha mo koe, ha kua manatu a koe ke fakafua e mena foaki noa he Atua ke he tau tupe.

21 Nakai fai mena a koe, ti nakai fai tufaaga a koe ke he mena nai; ha ko e mena kua nakai tonu hau a loto ki mua he Atua.

22 Ko e hanai, kia tokihala a a koe he hau a kelea nai, mo e ole atu a koe ke he Atua, po ke fakamagalo mai nakai e manatu he hau a loto.

23 Ha ko e mena kua iloa tuai e au kua nofo a koe ke he ahu kona, mo e afī he mahani hepehepe.

24 Ati tala age ai a Simona, kua pehe age, Ole atu a a mua ke he Iki māku, kia nakai hoko mai kia au ha mena he tau mena ia kua tala mai e mua.

25 Kua oti foki he talahau fakatonu e Iaua mo e vagahau age ke he kupu he Iki, ati liliu atu ai foki a laua ki Ierusalema, kua fakamatala e tala mitaki ke he tau māga loga he tau tagata Samaria.

26 Kua vagahau mai foki e agelu he Iki kia Filipo, kua pehe mai, Ati tu a, ke fano ke he fahi toga, ke he puhala ne hifo mai i Ierusalema ki Kasa; ko e mena tokanoa haia.

27 Ati matike a ia mo e fano; kitiala foki, ko e tagata Aitiope, ko e eunuka, ko e fekafekau ne mua a Kanake e patuiki fifine a Aitiope, ne eke hana tau koloa oti kana; ne fina atu a ia ki Ierusalema ke liogi ai.

28 Kua liu mai foki a ia, ha ne heke hana nofoa fakataveli, kua totou ke he tohi a Isaia ko e perofeta.

29 Ti pehe mai e Agaga kia Filipo, Fakatata atu a a koe, mo e fakalataha ke he nofoa fakataveli na.

30 Ati poi atu ai a Filipo, kua fanogonogo atu kia ia ha ne totou Isaia ko e perofeta; ati pehe atu ai a ia, Kua maama nakai kia koe e tau mena kua totou ai e koe?

31 Kua tala mai a ia, To maeke fefe e au, ka nakai fakakite mai e taha kia au? Ti ole mai a ia kia Filipo ke hake mai ke nofo mo ia.

32 Ko e fahi kupu foki he tohi kua totou ai e ia, ko e hanai, Tuga ne mamoe kua takitaki ke keli; tuga e punua mamoe foki ki mua he tagata ne hifi ai kua nakai tagi, pihia foki a ia kua nakai lea.

33 Ko e vaha ne fakatokolalo ai a ia ne uta kehe ai hana fakafiliaga; ko hai foki taha ke talahau hana hau? ha ko e mena kua uta kehe hana moui he lalolagi.

34 Kua tala mai e eunuka kia Filipo, kua pehe mai, Ke hūhu atu au kia koe, kua tala mai e mena nai he perofeta kia hai? kia ia kia, po ke taha tagata?

35 Ati tala age ai a Filipo, kua kamata he tohi ia kua fakamatala atu kia ia e tala mitaki kia Iesu.

36 Kua o age foki a laua ke he puhala, kua hoko ke he taha vai; ati tala age ai e eunuka, Kitiala, ko e vai; ke lekua he ha ke nakai papatiso ai au?

37 (Ti kua pehe age a Filipo, Kaeke kua talia e koe mo e loto katoa, ti maeke ai. Kua tala age a ia, kua pehe age, Kua talia e au, ko Iesu Keriso ko e Tama he Atua a ia).

38 Ati fekau ai a ia ke tu e nofoa fakataveli; ati fakatau o hifo ai a laua ke he vai, ko Filipo mo e eunuka; kua papatiso foki e ia a ia.

39 Kua o hake a laua he vai, ati hamu ai a Filipo he Agaga he Iki; kua nakai tuai kitia he eunuka a ia; kua fano foki a ia he hana fenoga mo e fiafia.

40 Ka kua kitia a Filipo i Asota; kua fano foki a ia, mo e fakamatala fakahaga e tala mitaki ke he tau māga oti kana, ato hoko a ia ki Kaisaria.