Kenese

16 KO Sarai e hoana a Aperamo, nakai fanau e ia kia ia; ha ia ia foki e fekafekau fifine, ko e fifine Aikupito, ko Hakara hana higoa.

2 Ne pehe foki a Sarai kia Aperamo, Kitiala, kua finagalo e Atua, kia nakai fanau e au; ati fina age a koe ke he fekafekau fifine haku, na ko e mena moua ai e au ha tama ia ia; ti fanogonogo a Aperamo ke he kupu a Sarai.

3 Ko Sarai foki e hoana a Aperamo, ne uta e ia a Hakara e fifine Aikupito, ko e hana fekafekau fifine mo e tuku atu kia Aperamo hana tane ke eke mo hoana hana: kua mole atu e tau tau ne hogofulu he nofo a Aperamo ke he motu ko Kanana.

4 Ti fina age ai a ia kia Hakara, ti fatu ai a ia; kua iloa e ia kua fatu a ia, ti fakateaga ai a ia ke he hana iki fifine.

5 Ti pehe atu a Sarai kia Aperamo, Kia ha ha ia koe e mena ne mamahi ai au, ne tuku atu e au ni haku a fekafekau fifine kia koe; kua iloa foki e ia kua fatu a ia, ti kua fakateaga tuai a ia kia au; kia fakafili mai e Iehova a taua mo koe.

6 Ti pehe mai a Aperamo kia Sarai, Kitiala, ha ia koe e pule ke he hau a fekafekau fifine, kia eke e koe kia ia e mena ne mitaki ai kia koe. Ne favale foki a Sarai kia ia, ti hola kehe ai a ia ia ia.

7 Ne moua foki a ia he agelu a Iehova ke he tapa vai puna ha he tutakale, ko e vai puna ke he puhala ne fano ki Sura.

8 Ti pehe mai a ia, Hakara na e, ko e fekafekau fifine a Sarai, hau a koe i fe? to fano a koe ki fe? ti pehe atu a ia, Kua hola au ia Sarai ko e iki fifine haku.

9 Ti pehe mai e agelu a Iehova kia ia, Liu a koe ke he iki fifine hau, mo e fakatokolalo a koe kia ia.

10 Na pehe mai foki e agelu a Iehova kia ia, To fakatokologa lahi e au hau a fanau, ti nakai maeke ke totou he tokologa.

11 Ti pehe mai foki e agelu a Iehova kia ia, Kitiala, kua fatu tuai a koe, to fanau e koe e tama tane; kia ui e koe e higoa hana ko Isamaeli, ha kua fanogonogo a Iehova ke he hāu a mamahi.

12 To eke a ia mo tagata ke tuga e asini vao; to eke e ia e tau tagata oti mo fi hana, to eke foki a ia mo fi he tau tagata oti; to nofo foki a ia ki mua he hana tau matakainaga oti.

13 Ti ui ai e ia e higoa a Iehova ne vagahau kia ia, Ko koe ni ko e Atua ne fioia au; ha kua pehe a ia, Kua kitia kia e au hinei e tua hana kua fioia au?

14 Ko e mena ia kua ui ai e vai keli, ko Perelaharoi; kitiala, ha he vaha a Katesa mo Pareta.

15 Ne fanau mai e Hakara e tama a Aperamo; ne ui foki e Aperamo e higoa he tama hana ne fanau mai e Hakara, ko Isamaeli.

16 Ne valugofulu ma ono e tau tau a Aperamo, he fanau mai ai e Hakara a Isamaeli ko e tama a Aperamo.