Numera

12 KUA vagahau a Miriama mo Arona kia Mose ha ko e fifine Kuso ne hoana ai a ia; ha kua fai hoana tuai a ia ke he fifine Kuso.

2 Ti pehe age a laua, Ko Mose tokotaha kia kua vagahau mai ai e Iehova? ka e nakai kia vagahau mai foki ia maua nai? Ti logona ai e Iehova.

3 Ko e tagata nai foki ko Mose, kua totonu ue atu a ia he tau tagata oti ha he fuga kelekele.

4 Ti vagahau fakaofo mai a Iehova kia Mose, mo Arona, mo Miriama, Kia o mai a mutolu tokotolu ke he fale uta fano he tutuutaga. Ti o mai ni a lautolu tokotolu.

5 Ti haele hifo a Iehova ke he aolagi fakatupou, mo e tu ai ke he gutuhala he fale uta fano, ti ui a ia kia Arona mo Miriama; ti o mai ai a laua tokoua.

6 Ti pehe mai a ia, Kia fanogonogo mai a a mua ke he haku a tau kupu, Kaeke ke ha ia mutolu ha perofeta a Iehova kua fakailoa atu e au a au kia ia ke he fakakiteaga, kua vagahau atu e au kia ia ke he miti.

7 Ka e nakai pihia haku a fekafekau ko Mose, kua fakamoli ni a ia ke he haku a magafaoa oti.

8 Kua fakafehagaoaki a maua ti vagahau ai a maua mo ia, mo e fakakite ni, ka e nakai ko e tau kupu galo, to kitekite foki a ia ke he fakatai a Iehova; ko e heigoa e mena nakai matakutaku ai a mua ke fai kupu ke he haku a fekafekau ko Mose?

9 Ti tupu ai e ita a Iehova kia laua, ti haele kehe a ia.

10 Ti lele atu foki e aolagi mai luga he fale uta fano; kitiala foki, kua lepela a Miriama, tuga ne kiona ni; kua haga atu a Arona kia Miriama, kitiala, kua lepela ni a ia.

11 Ti pehe atu ai Arona kia Mose, ma iki na e, aua neke tuku mai e koe kia maua e hala kua eke ai e maua mo e goagoa, mo e hala ai ni a maua.

12 Aua neke eke a ia ke tuga ne taha kua mate, ko e tagata ne popo ai e taha fahi he hana kakano he fanau mai he manava he hana matua fifine.

13 Ti tagi tau ai a Mose kia Iehova, kua pehe atu, Ko e Atua na e, kia fakamalolo e koe a ia.

14 Ti pehe mai ai a Iehova kia Mose, Ane mai kua anu hana matua tane ke he hana mata nakai kia ma ai a ia ke he tau po ne fitu? Kia puipui ai a ia po fitu ki tua he heagaapi, ka mole ia ti talia ai a ia.

15 Ti puipui ai po fitu a Miriama ki tua he heaga api; ti nakai o fenoga e motu ato talia mai a Miriama.

16 Kua mole e mena ia ti o ai e motu i Haserota, mo e he api ai a lautolu ke he tutakale ko Parana.