Tau Salamo
135 HALELUIA. Kia fakaheke atu a mutolu ke he higoa a Iehova; kia fakaheke atu a mutolu ko e tau fekafekau a Iehova;
2 Ko mutolu kua tutu ke he fale a Iehova, ke he tau lotopā he fale he Atua ha tautolu.
3 Haleluia, ha kua mitaki ni a Iehova; kia uhu lologo ke he hana higoa, ha ko e mena fulufuola ia.
4 Ha kua fifili e Ioha a Iakopo māna, ko Isaraela ke eke mo koloa uho hana.
5 Ha kua iloa ni e au kua homo a Iehova, kua mua foki ha tautolu a Iki ke he tau atua oti kana.
6 Ko e tau mena oti kua finagalo ki ai a Iehova, kua eke ni e ia ke he lagi katoa mo e lalolagi, ko e tahi mo e tau mena hokulo oti kana.
7 Ko ia ne hake ai e tau aolu mai he tau kala he lalolagi, kua eke e ia e tau uhila katoa mo e uha; kua ta mai e ia e matagi mai he hana tau fale koloa.
8 Ko ia ne keli e tau uluaki a Aikupito, ko e tau tagata katoa mo e tau manu.
9 Ko ia ne fekau atu e tau fakamailoga mo e tau mana kia koe, Aikupito na e, kia Farao mo e hana tau fekafekau oti kana.
10 Ko ia ne keli e tau motu loga, mo e kelipopo e tau patuiki malolo;
11 Ko Sikono ko e patuiki he faoa a Amori, mo Oko ko e patuiki a Vasana, katoa mo e tau patuiki oti a Kanana.
12 Kua āge foki e ia ha lautolu a kelekele mo fonua, ko e fonua mo e hana motu ko Isaraela.
13 Iehova na e, to tukulagi hāu a higoa, ko e fakamanatuaga kia koe, Iehova na e, ko e hahau mo hahau ia.
14 Ha ko e mena fakafili e Iehova hana motu; to tokihala foki a ia ha ko e hana tau fekafekau.
15 Ko e tau tupua he tau motu kehe ko e ario mo e auro ia, ko e tau gahua he tau lima he tau tagata.
16 Kua fai gutu a lautolu, ka e nakai ni vagahau; kua fai mata a lautolu, ka e nakai ni kitekite;
17 Kua fai teliga foki a lautolu, ka e nakai ni fanogonogo; ti nakai fakai ha fafagu ke he tau gutu ha lautolu.
18 To tuga na lautolu e tau tagata ne eke e tau mena ia, ti pihia mo lautolu oti kana kua tua ki ai.
19 Ko e magafaoa a Isaraela na e, kia fakamonu atu a mutolu kia Iehova; ko e magafaoa a Arona na e, kia fakamonu atu a mutolu kia Iehova;
20 Ko e magafaoa a Levi na e, kia fakamonu atu a mutolu kia Iehova; ko mutolu ne matakutaku kia Iehova, kia fakamonu atu a mutolu kia Iehova.
21 Kia fakamonu atu kia Iehova mai ia Siona, ko ia kua haele i Ierusalema. Haleluia.