Numera

16 TI uta tagata e Koru ko e tama a Isara, ko e tama ia a Koato, ko e tama a Levi haia, ko Tatano foki mo Apiramo ko e tau tama e Eliapo, ko Ono foki ko e tama a Peleto, ko e fanau a Reupena haia;

2 Ti tutu ai a lautolu ki mua a Mose, ne fakalataha foki mo lautolu falu he fanau a Isaraela ne ua e teau ti limagofulu e tagata, ko e tau iki a lautolu he fakapotopotoaga, ne talahaua ke he fakapotopotoaga, ko e tau tagata lilifu;

3 Kua fakapotopoto e lautolu a lautolu kia Mose mo Arona, mo e pehe atu a lautolu kia laua, Kua fakatokoluga a mua, ha kua tapu e fakapotopotoaga oti ni, ha ha ia lautolu foki a Iehova, hanai, ko e ha ne fia pule ai a mua ke he fakapotopotoaga a Iehova?

4 Kua logona ai e Mose, ti veli fakafohifo ai a ia.

5 Kua vagahau atu foki e ia kia Koru mo lautolu oti kua fakalataha mo ia, kua pehe atu, To fakailoa mai ai e Iehova a pogipogi po ko hai hana tau tagata, po ko hai foki kua tapu, to fakatata atu foki e ia e tau tagata ia kia ia; ko e tagata kua fifili e ia māna to fakatata ai e ia a ia kia ia.

6 Ko e hanai; kia ta mai e mutolu e tau mena uta afi, ko Koru mo lautolu oti kua fakalataha mo ia;

7 Ti tuku ai e afi mo e tuku ki luga ai e mena manogi ki mua a Iehova a pogipogi; ko e tagata foki kua fifili e Iehova kua tapu ni a ia; kua fakatokoluga a mutolu ni, ko mutolu na ko e fanau a Levi.

8 Ti pehe atu foki a Mose kia Koru, kia fanogonogo mai a mutolu ko e fanau a Levi na e;

9 Ko e mena tote kia kia mutolu kua vevehe kehe he Atua a Isaraela a mutolu mo e fakapotopotoaga a Isaraela, kia fakatata a mutolu kia ia ke fekafekau ai a mutolu ke he gahua he faituga a Iehova, ke tutu foki ki mua he fakapotopotoaga ke fekafekau ai kia lautolu.

10 Kua fakatata a koe kia ia katoa foki mo e hau a tau matakainaga oti ni ko e fanau a Levi fakalataha mo koe, ka e kumi kia a mutolu ke he feua foki he tau ekepoa?

11 Ko e mena ia ni kua fakapotopoto ai a mutolu ko koe mo lautolu oti kua kau fakalataha mo koe ke totoko atu kia Iehova; ka ko Arona, ko hai kia a ia ke loma a mutolu kia ia?

12 Ti fakafano atu ai e Mose taha ke ui kia Tatano mo Apiramo ko e tau tama tane a Eliapo; ka e pehe mai ai a laua Nakai ni o atu a maua.

13 Ko e mena tote kia he ta hake e koe a mautolu mai he motu ne tafe ai e puke huhu mo e meli, kia mamate ai a mautolu ke he tutakale, ka e eke kia a koe mo iki fakaoti kia mautolu?

14 Hanai foki, nakai ni fakahoko atu e koe a mautolu ke he motu kua tafe ai e puke huhu mo e meli, kua nakai foaki mai foki e koe e tau fonua mo e tau uluvine ke eke mo tufaaga ma mautolu; to fakapouli kia e koe e tau mata he tau tagata nai? Nakai o atu a maua.

15 Ti tupu lahi ai e ita a Mose, ti pehe atu a ia kia Iehova, Aua neke hagao a koe ke he ha lautolu a tau poa; nakai uta e au e asini taha ha lautolu, ti nakai mahani kelea ai au ke he taha tagata ia lautolu.

16 Ti pehe atu a Mose kia Koru, kia o mai a mutolu ki mua a Iehova a pogipogi ko koe mo lautolu oti kua kau fakalataha mo koe, ko koe, mo lautolu, katoa foki mo Arona.

17 Kia takitaha foki e tagata mo e uta hana mena uta afi mo e tuku ki ai e mena manogi, ti takitaha foki e tagata ia mutolu mo e ta mai hana mena uta afi ki mua a Iehova, ko e ua e teau ti limagofulu e mena uta afi; ko koe foki mo Arona kia takitaha mo e hana mena uta afi.

18 Ti takitokotaha a lautolu mo e uta hana mena uta afi, mo e tuku ai e afi, ti tuku ai foki e mena manogi, ti tutu ai a lautolu mo Mose, mo Arona ke he gutuhala he fale uta fano he tutuutaga.

19 Ti fakapotopoto ai e Koru e fakapotopotoaga katoa ke he gutuhala he fale uta fano he tutuutaga ke totoko atu kia laua; ti fakakite mai ai e aolagi a Iehova ke he fakapotopotoaga oti ni.

20 Ti vagahau mai a Iehova kia Mose mo Arona, kua pehe mai,

21 Kia vevehe kehe a mutolu mo e fakapotopotoaga nai ato fakaotioti ai e au a lautolu ke he magaaho ke kemo ai e mata.

22 Ti veveli fakafohifo ai a laua mo e pehe atu, Ko e Atua na e, Ko e Atua he tau agaga he tau tagata oti, ka hala he tagata tokotaha to fakahala kia e koe e fakapotopotoaga oti kana?

23 Ti vagahau mai a Iehova kia Mose, kua pehe mai,

24 Kia vagahau atu a koe ke he fakapotopotoaga, kia pehe atu, Kia o kehe a mutolu he tau fahi oti he tau fale ie a Koru, mo Tatano, mo Apiramo.

25 Ti matike a Mose mo e fina atu kia Tatano mo Apiramo, ti mumui atu kia ia e tau patu a Isaraela.

26 Ti vagahau atu e ia ke he fakapotopotoaga, kua pehe atu, Kia o kehe a mutolu he tau fale ie he tau tagata mahani kelea nai, ti aua neke pipiki atu a mutolu ke he taha mena ha lautolu, neke malaia ai a mutolu ke he tau hala oti ha lautolu.

27 Ti o kehe ai a lautolu he tau fahi oti he tau fale ie a Koru, mo Tatano, mo Apiramo; ti huhu ki fafo a Tatano mo Apiramo, kua tutu ai a laua ke he tau gutuhala he tau fale ie ha laua, mo e tau hoana ha laua, mo e ha laua a tau tama tane, katoa mo e ha laua a tau tama ikiiki.

28 Ti pehe atu ai a Mose, Ko e mena hanai ke iloa ai e mutolu kua fakafano mai e Iehova au ke eke e tau gahua oti nai, ka e nakai eke he haku a loto ni.

29 Kaeke ke mamate e tau tagata nai tuga ne mamate ai e tau tagata oti, po ke hoko atu kia lautolu tuga ne hoko ke he tau tagata oti, ti iloa ai e mutolu nakai ni fakafano mai e Iehova au.

30 Kaeke ke eke e Iehova ha mena fou, ti fakamaga ai e gutu he kelekele mo e folo ai a lautolu, mo e ha lautolu a tau mena oti, ti o hifo moui ni a lautolu ki seoli; ti iloa ai e mutolu kua vihiatia he tau tagata ia a Iehova.

31 Kua oti hana vagahau atu kia lautolu ke he tau kupu ia, ti ihi ai e kelekele ki lalo ia lautolu.

32 Ti fakamaga e gutu he kelekele, mo e folo fua ai a lautolu, mo e ha lautolu a tau fale, katoa mo e tau tagata oti ia Koru, mo e ha lautolu a tau mena oti.

33 Kua o hifo moui a lautolu ki seoli mo e tau mena oti ni ha ha ia lautolu, ti tanumia ai a lautolu he kelekele; ti mahaikava ai a lautolu mai he fakapotopotoaga.

34 Ti fehola ai e tau tagata Isaraela oti ne agaagai kia lautolu ke he ha lautolu a fakatutu, ka kua pehe age a lautolu, Neke folo ai foki he kelekele a tautolu.

35 Ti fina atu ai e afi mai mua a Iehova, mo e fakaotioti ai e tau tagata ua e teau ti limagofulu ne uta e mena manogi ke huhunu.

36 Ti vagahau mai a Iehova kia Mose, kua pehe mai,

37 Kia tala age a koe kia Eleasaro ko e tama tane a Arona ko e ekepoa ke uta ai e ia e tau mena uta afi mai loto he afi, mo e liligi e afi ke he mena mamao; ha kua tapu ni e mena ia.

38 Ko e tau mena uta afi he tau tagata ia ne hala ke he ha lautolu a tau agaga, kia eke aki e mena lapalapa laulahi ke eke mo ufi he fatapoa; nukua ta atu ai e lautolu e tau mena ia ki mua a Iehova, ko e mena ia kua tapu ai e tau mena ia ni; ke eke foki ia mo fakamailoga ke he fanau a Isaraela.

39 Ti uta e Eleasaro ko e ekepoa e tau mena uta afi apa kula, ne ekepoa ai e lautolu kua huhunu, ti tukituki fakaaleale ai e tau mena ia ke eke mo ufi ke he fatapoa.

40 Ko e fakamanatuaga haia ke he fanau a Isaraela, ke aua neke fakatata ai e tagata kehe nakai ko e fanau a Arona, ke huhunu ai e mena manogi ki mua a Iehova; neke uta kehe a ia tuga na Koru mo e hana kau; tuga ne vagahau ai e Iehova kia ia ia Mose.

41 Kua hoko ke he aho a pogipogi ti loma ai he fakapotopotoaga oti he fanau a Isaraela kia Mose mo Arona, kua pehe mai, kua kelipopo e mua e motu a Iehova.

42 Kua tutuuta mai e fakapotopotoaga ke totoko kia Mose mo Arona, ti haga atu a lautolu ke he fale uta fano he tutuutaga, kitiala, kua ufia ke he aolagi, kua fakakite mai ai foki e lilifu a Iehova.

43 Ti o mai ai a Mose mo Arona ki mua he fale uta fano he tutuutaga.

44 Ti vagahau mai a Iehova kia Mose, kua pehe mai,

45 Kia o kehe a a mua he fakapotopotoaga nai ato fakaotioti ai e au a lautolu ke he magaaho ke kemo ai e mata. Ti fakaveveli fakafohifo ai a laua.

46 Ti pehe age a Mose kia Arona, Kia uta e koe hau a mena uta afi, mo e tuku ai e afi mai he fatapoa, mo e tuku ki ai e mena manogi, ti fano fakaave a koe ke he fakapotopotoaga, mo e eke ai e koe e lukutoto ha ko lautolu, ha kua fina atu ai e ita ia Iehova; kua kamata tuai e tatalu.

47 Ti uta ai e Arona hana mena uta afi tuga ne poaki age a Mose, ti poi ni a ia ke he vaha loto he fakapotopotoaga; kitiala, kua kamata tuai e tatalu ke he motu; ti uta e ia e mena manogi ke huhunu mo e eke ai e lukutoto ha ko e motu.

48 Kua tu ai a ia ke he vaha loto he tau tagata mamate mo e tau tagata momoui; ti motuhia ai e tatalu.

49 Ko lautolu foki ne mamate ke he tatalu ko e hogofulu ma fa e afe ti fitu e teau e tagata, ka e nakai lafilafi ki ai a lautolu ne mamate ai ke he mena a Koru.

50 Ti liu mai a Arona kia Mose ke he gutuhala he fale uta fano he tutuutaga; kua motuhia tuai e tatalu.