Numera

4 KUA vagahau mai e Iehova kia Mose mo Arona, kua pehe mai,

2 Kia totou e koe e fanau a Koato, mai he fanau a Levi ke he ha lautolu a tau magafaoa, ke he faoa he ha lautolu a tau matua.

3 Ke kamata ia lautolu ne tologofulu ha lautolu a tau tau katoa mo lautolu ne fakamua atu, ke hoko atu kia lautolu ne limagofulu ha lautolu a tau tau, katoa mo lautolu oti kua o atu ke eke ai e gahua he fale uta fano he tutuutaga.

4 Ko e gahua hanai he fanau a Koato ke he fale uta fano he tutuutaga, ke he mena tapu ue atu.

5 Ka o atu ai e heagaapi, ti o age a Arona mo e hana tau tama tane, ti ta hifo e lautolu e ie puipui, mo e ufi aki e lautolu e puha he fakatufono.

6 Ti tuku foki e lautolu ki luga hana e ufi kili takesa, ti fofola foki ki luga ia e ie ne uli katoatoa, ti humaki ai foki e lautolu e tau akau tauloto.

7 Ti fofola foki e lautolu e ie uli ki luga he laulau he areto ne fakatokatoka i mua, ti tuku ai ki luga hana e tau kapiniu lapalapa, mo e tau kapiniu, mo e tau kapiniu ahu, mo e tau kumete ke liligi ki ai; ke ha i ai foki ki luga, hana e areto toka mau.

8 Ti fofola e lautolu ki luga he tau mena ia e ie kula uhi, ti ufiufi foki ia ke he ufi kili takesa, ti humaki ai e lautolu hana tau akau tauloto.

9 Ti uta foki e lautolu e ie uli mo e ufi aki e fakatuaga lamepa, mo e hana tau lamepa, mo e hana helehelevavae, mo e hana tokaaga helehelevavae, mo e hana tau mena oti ne tukuaki e lolo, kua fekafekau ai a lautolu ki ai;

10 Ti tuku ai e lautolu foki mo e hana tau mena oti ki loto he ufi kili takesa ti tuku ai ni ki luga he fata ke taulotoaki.

11 Ti fofola ai foki e lautolu e ie uli ki luga he fatapoa auro, ti ufiufi foki e lautolu a ia ke he ufi kili takesa, ti humaki ai e lautolu hana tau akau tauloto.

12 Ti uta foki e lautolu e tau mena oti ke eke aki e gahua kua fekafekau ai a lautolu ke he faituga, ti tuku e lautolu ia ke he ie uli, ti ufi aki foki ke he ufi kili takesa, ti tuku ai ki luga he fata ke tauloto aki.

13 Ti uta kehe e lautolu e tau efuefuafi he fatapoa, mo e fofola ki luga hana e ie kula uhi;

14 Ti tuku ai e lautolu ki luga hana hana tau mena oti kua fekafekau ai a lautolu, ko e hana tau kumete mo e efuefu afi, mo e tau huki, mo e tau aku, mo e tau kapiniu; ko e tau mena oti he fatapoa; ti fofola foki e lautolu ki luga hana e ufi kili takesa mo e humaki ai e lautolu e tau akau tauloto.

15 Ka kua oti he ufiufi e Arona mo e hana tau tama tane e mena tapu mo e tau mena oti he mena tapu ha ko e o ha ne fai e heagaapi, ka mole ia ti huhu atu e fanau a Koato ke uta ai; ka e aua neke pipiki atu a lautolu ke he mena tapu, neke mamate a lautolu. Ko e kavega he fanau a Koato haia ke he fale uta fano he tutuutaga.

16 Ti ha ia Eleasaro ko e tama a Arona ko e ekepoa e pule ke he puke lolo ke fakapuho, mo e tau mena manogi mitaki ke huhunu, mo e poa mena kai ke eke mau, mo e lolo fakauku; ko e hana ni e pule ke he faituga oti, mo e tau mena oti ha ha he mena tapu, katoa mo e hana tau mena.

17 Kua vagahau mai a Iehova kia Mose mo Arona, kua pehe mai,

18 Aua neke vevehe kehe e mutolu e magafaoa he tau fanau a Koato mai he magafaoa a Levi;

19 Ka eke e mutolu e mena nai kia lautolu, ti momoui a lautolu, ti nakai mamate ai a lautolu, ka fakatata a lautolu ke he mena tapu ue atu; kia huhu atu a Arona mo e hana tau tama tane, mo e kotofa kia lautolu takitokotaha, ko e tagata mo e hana gahua mo e hana kavega;

20 Ka e aua neke huhu atu a lautolu ke kitekite ke he mena tapu ke he magaaho kiliku neke mamate ai a lautolu;

21 Kua vagahau mai foki a Iehova kia Mose, kua pehe mai,

22 Kia totou e koe e fanau a Keresoma ko lautolu mo e faoa he ha lautolu a tau matua, ke he tau magafaoa ha lautolu;

23 Ke kamata ia lautolu ne tolugofulu ha lautolu a tau tau katoa mo lautolu ne fakamua atu, ke hoko atu kia lautolu kua limagofulu ha lautolu a tau tau, kia totou ai e koe a lautolu, ko lautolu oti kua o atu ke fekafekau ai, ke eke ai e gahua ke he fale uta fano he tutuutaga.

24 Ko e gahua hanai he magafaoa a Keresoma, ke fekafekau ai a lautolu, mo e ha lautolu a tau kavega;

25 To uta e lautolu e ie puipui he faituga mo e fale uta fano he tutuutaga, ko e hana ufiufi, mo e ufiufi kili takesa ha i luga fakaoti, mo e ie puipui he gutuhala he fale uta fano he tutuutaga,

26 Ko e ie puipui foki he pa, mo e ie puipui he pupuni he gutuhala he pa, ko e mena kua lata mo e faituga, ti lata ai foki mo e fatapoa ke takai aki, mo e ha lautolu a tau toua, mo e tau mena oti he ha lautolu a fekafekauaga, mo e tau mena oti kua eke ai kia lautolu; ko e ha lautolu, a gahua haia.

27 Ko e kupu a Arona mo e hana tau tama tane ke eke ai he fanau a Keresoma ha lautolu a gahua oti, ke he ha lautolu a tau kavega oti, mo e ha lautolu a tau gahua oti; to kotofa e mutolu kia lautolu ke he fekau, ha lautolu a tau kavega oti kana.

28 Ko e gahua hanā he tau magafaoa he fanau a Keresoma ke he fale uta fano he tutuutaga; ke pule ai foki e Itamaro ko e tama a Arona ke e ekepoa ke he tau fekau ke eke e lautolu.

29 To totou e koe e fanau a Merari, ke he ha lautolu a tau magafaoa, ke he faoa he ha lautolu a tau matua;

30 Ke kamata ia lautolu kua tolugofulu ha lautolu a tau tau katoa mo lautolu ne fakamua atu, ke hoko atu kia lautolu ne limagofulu ha lautolu a tau tau, to totou e koe a lautolu, ko lautolu oti ni kua o atu ke fekafekau, ke eke ni e gahua he fale uta fano he tutuutaga.

31 Ko e tau mena hanai ha lautolu ke leveki he ha lautolu a tau kavega, he ha lautolu a tau gahua oti ke he fale uta fano he tutuutaga, ko e tau lapa he faituga, mo e hana tau akau loa, mo e hana tau pou, mo e hana tau fakalago,

32 Ko e tau pou foki he pa ke takai aki, mo e ha lautolu a tau fakalago, mo e ha lautolu a tau fao, mo e ha lautolu a tau toua, mo e ha lautolu a tau mena oti, mo e ha lautolu a tau gahua oti; to totou atu foki e mutolu ke he tau higoa ha lautolu e tau mena oti kua leveki e lautolu ke he ha lautolu a tau kavega.

33 Ko e gahua haia he tau magafaoa he fanau a Merari, he ha lautolu a fekafekauaga ke he fale uta fano he tutuutaga; ko e pule ia a Itamaro ko e tama a Arona ko e ekepoa.

34 Ti totou ai e Mose, mo Arona, mo e tau iki he fakapotopotoaga e fanau a Koato ke he ha lautolu a tau magafaoa, mo e faoa he ha lautolu a tau matua;

35 Ke kamata ia lautolu kua tolugofulu ha lautolu a tau tau katoa mo lautolu ne fakamua atu, ke hoko atu kia lautolu ne limagofulu ha lautolu a tau tau, ko lautolu oti kua o atu ke fekafekau ai ke he gahua he fale uta fano he tutuutaga.

36 Ko lautolu foki ne totou ke he tau magafaoa ha lautolu ko e ua ni e afe ti fitu e teau ti limagofulu.

37 Ko lautolu hana ne totou he magafaoa a Koato, ko lautolu oti kua fekafekau ai ke he fale uta fano he tutuutaga, ne totou ai e Mose mo Arona ke lata mo e kupu a Iehova kia Mose.

38 Ko lautolu foki ne totou he fanau a Keresoma, ke he ha lautolu a tau magafaoa, mo e faoa he ha lautolu a tau matua,

39 Ke kamata ia lautolu ko e tolugofulu ha lautolu a tau tau katoa mo lautolu ne fakamua atu ke hoko atu kia lautolu kua limagofulu ha lautolu a tau tau, ko lautolu oti ni kua o atu ke fekafekau ai ke he gahua he fale uta fano he tutuutaga,

40 Ko lautolu ni ne totou ke he ha lautolu a tau magafaoa ke he faoa he ha lautolu a tau matua, ne ua e afe ti ono e teau ti tolugofulu.

41 Ko lautolu hanā ne totou he tau magafaoa he fanau a Keresoma, ko lautolu oti kua fekafekau ai ke he fale uta fano he tutuutaga, ne totou ai e Mose mo Arona ke lata mo e kupu a Iehova kia Mose.

42 Ko lautolu foki ne totou ai he tau magafaoa a Merari, ke he ha lautolu a tau magafaoa, ke he faoa he ha lautolu a tau matua.

43 Ke kamata ia lautolu kua tolugofulu ha lautolu a tau tau katoa mo lautolu ne fakamua atu, ke hoko atu kia lautolu kua limagofulu ha lautolu a tau tau, ko lautolu oti ni kua o atu ke fekafekau ai ke he fale uta fano he tutuutaga.

44 Ko lautolu ne totou ai ke he tau magafaoa ha lautolu, ne tolu e afe ti ua ni e teau.

45 Ko lautolu hanā ne totou he tau magafaoa he fanau a Merari, ne totou e Mose mo Arona ke lata mo e kupu a Iehova kia Mose.

46 Ko lautolu oti kana ne totou ai he tau tagata Levi, ne totou ni e Mose, mo Arona, mo e tau iki a Isaraela a lautolu, ke he tau magafaoa ha lautolu, mo e faoa he ha lautolu a tau matua.

47 Ke kamata ia lautolu ne tolugofulu ha lautolu a tau tau, katoa mo lautolu ne fakamua atu, ke hoko atu kia lautolu kua limagofulu ha lautolu a tau tau, ko lautolu oti kua o atu ke fekafekau ai ke he fekafekauaga he gahua mo e fekafekauaga he tau kavega ke he fale uta fano he tutuutaga,

48 Ko lautolu ni ne totou ai e lautolu, ko e valu e afe ti lima e teau, ti valugofulu e tagata.

49 Ne totou ai e Mose a lautolu ke lata mo e kupu a Iehova, ko e tagata mo e hana gahua mo e hana kavega; ne totou ai pihia e ia a lautolu, tuga ne poaki mai ai e Iehova kia Mose.