Iosua

13 KUA motua tuai a Iosua, kua loga hana tau tau; ti pehe mai a Iehova kia ia, Kua motua tuai a koe kua loga hau a tau tau; kua lahi mahaki foki e kelekele kua toe ke eke ma mutolu.

2 Ko e kelekele kua toe hanai; ko e fahi oti he tau tagata Filisitia mo Kasuri oti;

3 Ke kamata mai i Sikora, ne fehagai mo Aikupito, ti hoko atu ke he katofia a Ekerona ke he fahi tokelau, kua toka ai ia ma e tau tagata Kanana; ko e tau iki Filisitia ne tokolima; ko e tau tagata Kasa, mo e tau tagata Asetota, ko e tau tagata Asikelona, ko e tau tagata Kata, mo e tau tagata Ekerona; mo e tau tagata Gavi foki;

4 Ke kamata mai he fahi toga, ko e motu oti he tau tagata Kanana, mo Meara ha i ai ke he tau tagata Saitonu, ke hoko atu ki Afeka, ke hoko ke he tau katofia he tau tagata Amori;

5 Ko e motu foki he tau tagata Kevali, mo Lepanona oti ke he fahi ne hake ai e la, ke kamata mai i Paalakato ha i lalo he mouga ko Heremoni, ke hoko ke he mena ne fina atu ai ki Hamato.

6 To vega e au ki mua he fanau a Isaraela ko lautolu oti kua nonofo ke he atu mouga ke kamata mai i Lepanona, ke hoko atu ki Misirefomaima, ko e tau tagata Saitonu oti; ka kia eke e vili ke tufatufa ai kia Isaraela ha lautolu a kelekele, tuga ne poaki atu e au kia koe.

7 Ko e hanai kia vevehe atu e koe e kelekele nai ke eke mo tau tufaaga ke he tau magafaoa ne hiva, mo e veveheaga he magafaoa a Manase.

8 Ko e tau tagata Reupena, mo e tau tagata Kato, kua moua e lautolu ha lautolu a tufaaga fakalataha mo lautolu, ne ta age e Mose kia lautolu ke he fahi uta a Ioritana, tuga ne ta age ai e Mose ko e fekafekau a Iehova kia lautolu;

9 Ke kamata i Aroeru, ha he kauvai he vailele ko Aranona, mo e maga ha i loto he vailele, mo e kelekele tatai oti ko Metipa, ke hoko atu ki Tipona;

10 Ko e tau maga oti foki a Sikono ko e patuiki he tau tagata Amori, ko ia ne pule i Hesepona, ke hoko ke he tau katofia he fanau Amoni;

11 Ko Kiliata foki, mo e motu he tau tagata Kasuri, mo e tau tagata Maaka, mo e mouga oti ko Heremoni, mo Vasana oti ke hoko atu ki Saleka.

12 Ko e kautu oti ne pule ai a Oko i Vasana, ne toe a ia he tau tagata makimaki, ne pule a ia i Aserota, mo Etirei; ne keli foki e Mose a lautolu, mo e vega a lautolu.

13 Ka e nakai vega he fanau a Isaraela e tau tagata Kasuri, mo e tau tagata Maaka; ka kua nonofo ai e tau tagata Kasuri, mo e tau tagata Maaka fakalataha mo Isaraela, ke hoko ni ke he aho nai.

14 Ka e nakai ta age ha tufaaga ke he magafaoa a Levi; ko e tau poa kua eke ke he afi kia Iehova ko e Atua a Isaraela ko e tufaaga ha lautolu haia, tuga ne vagahau ma a ia kia lautolu.

15 Ne ta age e Mose e tufaaga ke he magafaoa he fanau a Reupena ke lata mo e ha lautolu a tau magafaoa;

16 Kua kamata mai i Aroeru ha lautolu a katofia, ha ha he kauvai he vailele ko Aranona, mo e maga ha i loto he vailele, mo e kelekele tatai oti i Metipa;

17 Ko Hesepona, mo e hana tau maga oti ha ha he kelekele tatai; ko Tipona, mo Pamotapaala, mo Petepaalameona,

18 Mo Iaesa, mo Katemoti, mo Mefata,

19 Mo Kiriataima, mo Sepema, mo Saretasaara ke he mouga he pahua,

20 Mo Petepeoro, mo Asetota-peseka, mo Petesemota;

21 Ko e tau maga oti he kelekele tatai, mo e kautu oti a Sikono ko e patuiki he tau tagata Amori, ko ia ne eke mo iki i Hesepona, ne keli e Mose a ia fakalataha mo e tau iki i Mitiana, ko Evi, mo Rekema, mo Suro, mo Huro, mo Repa, ko e tau iki i Sikono haia, ne nonofo ke he motu.

22 Ko Palaamo foki ko e tama a Peoro, ko e tagata taulaatua, ne kelipopo he fanau a Isaraela ke he pelu fakalataha mo lautolu kua keli.

23 Ko e katofia he fanau a Reupena ko Ioritana haia, mo e hana katofia. Ko e tufaaga haia he fanau a Reupena ke lata mo e ha lautolu a tau magafaoa, ko e tau maga mo e ha lautolu a tau kaina he maga he hala.

24 Ne ta age e Mose e tufaaga ke he magafaoa a Kato, ko e fanau a Kato ke lata mo e tau magafaoa ha lautolu.

25 Ko e katofia ha lautolu ko Iasaru, mo e tau maga oti a Kiliata, mo e maga ne veveheua aki e kelekele he fanau Amoni, ke hoko atu ki Aroeru, ne fehagai mo Rapa;

26 Ke kamata mai foki i Hesepona, ke hoko atu ki Ramamesepa; mo Patanima; ke kamata foki i Mahanaima ke hoko atu ke he katofia a Tiperi;

27 Ko e tau maga foki ke he pahua, ko Petearama, mo Petenimara, mo Sukota, mo Safono, ko e mena ne toe he kautu a Sikono ko e patuiki i Hesepona, ko Ioritana mo e hana katofia, ke hoko atu ke he mena ne liu mai ai e vai ko Kinereta ke he fahi atu a Ioritana ko e fahi uta haia.

28 Ko e tufaaga haia he magafaoa a Kato ke lata mo e ha lautolu a tau magafaoa, ko e tau maga mo e ha lautolu a tau maga ikiiki.

29 Ne age e Mose e tufaaga ke he taha veveheaga he magafaoa a Manase; ko e tufaaga hanai he veveheaga he magafaoa he fanau a Manase ke lata mo e ha lautolu a tau magafaoa.

30 Ko e ha lautolu a tau katofia ke kamata mai i Mahanaima, ko Vasana oti, ko e kautu oti a Oko ko e patuiki a Vasana, mo Havota-iairo oti ha i Vasana, ko e tau maga ne onogofulu;

31 Mo e taha fahi a Kiliata, mo Aserota, mo Etirei, ko e tau maga he kautu a Oko i Vasana, ha ha i ai ke he fanau a Makiro ko e tama a Manase, ko e maga ne veveheua aki e fanau a Makiro ke lata mo e ha lautolu a tau magafaoa.

32 Ko e tau motu ia ne tufatufa ai e Mose ke he kelekele tatai a Moapi, ke he fahi atu a Ioritana, ne fehagai mo Ieriko ke he fahi uta.

33 Ka e nakai age e Mose ha tufaaga ke he magafaoa a Levi; ko Iehova ko e Atua a Isaraela ko e ha lautolu a tufaaga a ia, tuga ne vagahau mai a ia kia lautolu.