Kalatia

4 KUA tala atu foki e au ko e vaha tote he hakeaga kua nakai fai mena kua kehe ai a ia mo e tupa, pete ni ko ia hana e tau mena oti;

2 Ka kua pule kia ia e tau leveki tama mo e tau fekafekau pule, ato hoko ke he vaha ne kotofa tuai he matua.

3 Kua pihia foki a tautolu ke he vaha ne ikiiki ai, ne fakatupatupa a tautolu ke he tau kupu fakamua he lalolagi.

4 Ka kua hoko ke he fakakatoatoaga he tau tau, ti fakafano mai ai he Atua hana Tama, ke fanau ke he fifine, ne fanau kua nofo ke he fakatufono;

5 Kia fakafua mai ai e ia a tautolu kua nonofo ke he fakatufono, kia eke a tautolu mo tau tama hiki.

6 Ha ko e tau tama a mutolu, ko e mena ia kua fakafano mai ai he Atua e Agaga he hana Tama ke he tau loto ha mutolu, ha ha ne ui, Ava, ko e Matua na e.

7 Haia, nakai tuai ko e tupa a koe, ka ko e tama; kaeke ko e tama, ti ko e hakeaga foki he Atua kia Keriso.

8 Ko e moli, ko e vaha ia ni nakai iloa ai e mutolu e Atua, ne eke ai a mutolu mo tau tupa ke he tau mena nakai eke ke atua ki ai;

9 Ka ko e vaha nai, kua nakai kuenaia he iloa e mutolu e Atua, ka kua iloa foki he Atua a mutolu, ko e ha kia ne liliu foki hagao atu ai a mutolu ke he tau kupu fakamau kua mama mo e fakateaga, kua liu foki loto a mutolu ke liu foki fakatupa ki ai?

10 Kua omaoma a mutolu ke he tau aho, mo e tau mahina, mo e tau tau, mo e tau vaha.

11 Kua matakutaku au kia mutolu, neke teao e gahua ne eke ai e au kia mutolu.

12 Ko e tau matakainaga na e, kua ole atu au kia mutolu, kia tuga na au a mutolu, ha ko au kua tuga a mutolu; nakai fakakelea mai e mutolu au ke he taha mena taha.

13 Kua iloa foki e mutolu ko e lolelole he haku tino ne fakamatala atu fakamua ai e au e vagahau mitaki kia mutolu;

14 Ko e kamatamata foki ha ha ia au ke he hoku tino, kua nakai fakateaga ai e mutolu, ti nakai fakavihia ai e mutolu, ka kua talia e mutolu au tuga e agelu he Atua, tuga a Keriso Iesu.

15 Po ke fefe ha mutolu a monuina ia ne talahau mai? ha ko e haku a talahau ainei kia mutolu, ane mai ke maeke po kua kape mai tuai e mutolu ha mutolu a tau mata, mo e ta mai kia au.

16 Haia, kua eke kia a au mo fi ha mutolu ke he haku a talahau atu kia mutolu e kupu moli?

17 Kua fakamakutu a lautolu kia mutolu, ka e nakai fakamitaki; ka e fia fakatoka kehe e lautolu a mutolu, kia fakamakutu ai a mutolu kia lautolu.

18 Ka e mitaki ke fakamakutu ke he mena mitaki nakai noa, aua neke kuenaia ka ha i ai au ia mutolu.

19 Haku fanau ikiiki na e, ko mutolu kua liu foki mamahi fanau ai au, ato fakatino mai a Keriso ki loto ia mutolu,

20 Kua loto au kia ha i ai au kia mutolu ke he vaha nai, mo e hiki haku a leo, ha kua mahalohalo au kia mutolu.

21 Kia talahau mai a kia au, ko mutolu kua fia nonofo ke he fakatufono, kua nakai kia fanogonogo a mutolu ke he fakatufono?

22 Ha kua tohi, ha ha ia Aperahamo e na tama, ne tokoua la, ko e taha ne fanau mai he fifine fakatupa, ka ko e taha he patu fifine he kaina.

23 Ka ko e tama he fifine fakatupa, ne fanau a ia kua lata mo e tino; ka ko e tama he patu fifine he kaina, ne fanau a ia ha ko e kupu ne talahaua.

24 Ko e tau mena fakatai e tau mena ia ha ko e na fifine ia ko e na maveheaga ua ia; ko e taha ni mai he mouga ko Sinai, kua fanau mai e tama ke eke mo tupa, ko Hakara haia;

25 Ha ko Hakara ko e mouga ko Sinai haia i Arapi; kua lata ia mo Ierusalema ke he vaha nai, kua fakatupa a ia katoa mo e hana fanau;

26 Ha ko Ierusalema i luga, kua toka noa a ia, ko ia ko e matua fifine ha tautolu oti kana.

27 Ha kua tohi, kia olioli a koe, ko e fifine tufua kua nakai fanau, kia kalaga mo e leo lahi a koe kua nakai mamahi fanau; ha ko e mena au atu he tokologa he fanau hana kua nofo noa kia ia kua fai tane.

28 Ka ko tautolu ko e tau matakainaga na e, ko e tau fanau he talahauaga a tautolu, tuga a Isaako;

29 Ka e tuga e vaha ia, ne favale a ia ne fanau mai kua lata mo e tino kia ia ne fanau mai kua lata mo e Agaga, kua pihia foki ke he vaha nai.

30 Ka ko e ha kia kua tala mai he Tohi? Ati vega a e fifine fakatupa mo e hana tama; ha ko e mena nakai hakeaga fakalataha e tama he fifine fakatupa mo e tama he patu fifine he kaina.

31 Hanai, ko e tau matakainaga na e, nakai ko e fanau he fifine fakatupa a tautolu, ka ko e fanau he patu fifine he kaina.