1 Nofoaga he Tau Patuiki
16 KUA ta mai e lautolu e puha he Atua, mo e tuku ai ki loto he fale ie ne eke e Tavita ma e puha; ti eke ai e lautolu e tau poa huhunu mo e tau poa fakaaue ki mua he Atua.
2 Kua oti he eke e Tavita e tau poa huhunu mo e tau poa fakaaue, ti fakamonuina ai e ia e motu ke he higoa a Iehova.
3 Ti tufatufa atu e ia ke he tau tagata Isaraela oti takitokotaha, ko e tau tane mo e tau fifine, ke takitaha ia lautolu mo e areto pukupuku mo e taha maga kakano, mo e taha lafiaga fua vine tavaki.
4 Kua kotofa e ia falu he tau tagata Levi ke fekafekau ki mua he puha a Iehova ke fakamanatu ai, mo e fakaaue, mo e fakaheke atu kia Iehova ko e Atua a Isaraela;
5 Ko e iki ko Asafo, ti mumui age kia ia a Sakaria, ko Ieielu, mo Semiramotu, mo Ikielu, mo Matitia, mo Eliapo, mo Penaia, mo Opeta-etoma; ko Ieielu foki ha ha ia ia e tau napeli, mo e tau kitara, ka ko Asafo ne fakatagi e ia e tau kumepalo.
6 Ko e tau ekepoa ko Penaia, mo Iahasielu ne toka ai e tau pu ke ulo, ha ha i ai mau a laua ki mua he puha he maveheaga he Atua.
7 Ne kotofa la ia e Tavita he aho ia ni, ke fakaaue atu ai kia Iehova ia Asafo mo e hana tau matakainaga.
8 Kia fakaaue atu ā mutolu kia Iehova; kia ui atu a ke he hana higoa; kia fakailoa atu e mutolu ke he tau motu hana tau mena ne eke.
9 Kia lologo atu ā mutolu kia ia, kia uhu lologo a mutolu kia ia; kia talahau atu ā e mutolu hana tau mana oti.
10 Kia fiafia a mutolu ke he hana higoa tapu; kia kolikoli e tau loto ha lautolu kua kumi kia Iehova.
11 Kia kumi a mutolu kia Iehova mo e hana malolo; kia kumi nakai noa a mutolu ke he hana fofoga.
12 Kia manatu a a mutolu ke he hana tau mena fakaofo ne eke e ia, ko e hana tau mana, katoa mo e tau fakafiliaga he hana fofoga;
13 Ko mutolu ko e fanau he hana fekafekau ko Isaraela, ko e tau tama a Iakopo ne fifili e ia,
14 Ko ia ni ko Iehova ko e Atua ha tau tolu; ha ha he lalolagi oti kana hana tau fakafiliaga.
15 Kia manatu tukulagi e mutolu hana maveheaga, ko e kupu ne poaki e ia ke he tau hau ne taha e afe.
16 Ko e maveheaga ne eke e laua mo Aperahamo, mo e hana omonuo kia Isaako;
17 Ne fakamau ai foki e ia kia Iakopo ke eke mo fakatufono, ko e maveheaga tukulagi mo Isaraela,
18 Ne pehe atu kia ia, To ta atu e au kia koe e kelekele ko Kanana, ko e tufaaga ia he fonua ha mutolu;
19 Ka kua tokogaogao a mutolu, kua tokogaogao ni, mo e tau tagata kehe a mutolu i ai.
20 Ne o fano foki a lautolu ke he taha motu mo e taha motu, mai he taha fahi kautu ke he taha motu.
21 Nakai toka e ia taha tagata ke favale atu kia lautolu; ne akonaki e ia e tau patuiki ha ko lautolu.
22 Kua pehe atu ki ai, Aua neke piki atu kia lautolu ne fakauku e au; aua foki neke mahani kelea ke he haku a tau perofeta.
23 Kia lologo atu a mutolu kia Iehova, ko mutolu gotoa ha ha he lalolagi; kia fakamatala atu e mutolu hana fakamouiaga ke he taha aho mo e taha aho.
24 Kia tokutoku atu e mutolu hana lilifu ke he tau motu kehe, mo e hana tau mana ke he tau motu oti kana.
25 Ha kua homo a Iehova, ti lata ni ke fakaheke fakalahi kia ia; kua mua e matakutaku kia ia ke he tau atua oti.
26 Ha ko e tau atua oti he tau motu ko e tau tupua ni haia; ka ko Iehova, ne eke e ia e lagi.
27 Ha ha i mua hana e fakahekeaga mo e fulufuluola; ha ha he haeleaga hana e malolo mo e fiafia.
28 Ko mutolu ko e tau magafaoa he tau motu, kia ta atu e mutolu kia Iehova, kia ta atu e mutolu kia Iehova e lilifu mo e malolo.
29 Kia ta atu kia Iehova e fakahekeaga he hana higoa; kia uta e mutolu e tau poa, mo e o atu a mutolu ki mua hana, kia hufeilo a mutolu kia Iehova mo e tau mena tapu kua fulufuluola.
30 Kia vivivivi ki mua hana a mutolu ko e lalolagi oti; kua fakamau foki e lalolagi neke fagahuatia.
31 Kia fiafia e lagi, kia olioli foki e lalolagi, kia pehe atu a mutolu ke he tau motu kehe, Ko e Patuiki a Iehova.
32 Kia go mai e tahi mo e tau mena kua puke ai; kia fiafia e fonua mo e tau mena oti ha ha i ai.
33 Ti kalaga fiafia ai e tau akau oti ke kavei ki mua a Iehova, ha kua haele mai a ia ke fakafili e lalolagi.
34 Kia fakaheke atu ā mutolu kia Iehova ha kua mitaki ni a ia; ha kua tukulagi hana fakaalofa.
35 Kia pehe atu a mutolu, ko e Atua na e, ko e Atua he fakamouiaga ha mautolu, kia fakamoui e koe a mautolu, mo e fakapotopoto e koe a mautolu mai he tau motu kehe, kia fakaheke ai ke he hau a higoa tapu, kia fiafia foki ke he fakahekeaga kia koe.
36 Kia fakamonu kia Iehova, ko e Atua a Isaraela mai i tuai tigahau kia hoko ke he tukulagi. Ti pehe atu e motu oti, Amene, mo e fakaheke atu a lautolu kia Iehova.
37 Ne toka e ia a Asafo, mo e tau matakainaga hana ke he mena ia ki mua he puha he maveheaga a Iehova, ke fekafekau mau ai ki mua he puha, ke lata mo e gahua ke he taha aho mo e taha aho;
38 Ko Opeta-etoma mo e tau matakainaga ha lautolu ko e toko onogofulu ma valu; ko Opeta-etoma foki ko e tama a Iutana, mo Hosa ne kotofa ke eke mo tau leoleo gutuhala;
39 Ko e ekepoa ko Satoka, mo e tau matakainaga hana ko e tau ekepoa, ha ha i mua he faituga a Iehova ke he mena tokoluga i Kipeona a lautolu,
40 Ke eke mau ai e tau poa huhunu kia Iehova ki luga he fatapoa ne eke ai e tau poa huhunu, ke he pogipogi mo e afiafi, ke lata mo e tau mena oti kua tohi ke he fakatufono a Iehova ne poaki mai e ia kia Isaraela;
41 Ha ha ia lautolu a Hemana, mo Iutana, mo lautolu ne toe ne fifili, ne talahau ai ha lautolu a tau higoa ke fakaheke atu kia Iehova, ha ko e mena tukulagi ni hana fakalofa;
42 Ha ha i ai mo lautolu a Hemana mo Iutana, ha ha i ai e tau pu ke ulo, mo e tau kumepalo ma lautolu kua fakatagi ai, mo e tau akau fakatagi mo e tau lologo he Atua. Ko e tau tama foki a Iutana, kua eke mo tau leoleo gutuhala.
43 Ti o e motu oti takitaha ke he hana magafaoa; ti liu atu a Tavita ke fakamonuina atu hana magafaoa.