2 Samuela
5 KUA o mai e tau magafaoa oti a Isaraela kia Tavita ki Heperona, ti vagahau ai a lautolu, kua pehe mai, Kitiala, ko mautolu ko e hau a tau hui motua, mo e hau a kakano a mautolu nai;
2 Ko e vaha fakamua foki, he eke a Saulo mo patuiki ha mautolu, ko koe ni ne takitaki atu mo e takitaki mai a Isaraela; ne pehe foki a Iehova kia koe, To leveki e koe haku motu ko Isaraela, to eke foki a koe mo takitaki kia Isaraela,
3 Ti o mai ai e tau patu oti a Isaraela ke he patuiki ki Heperona; ti eke e lautolu e maveheaga mo e patuiki ko Tavita i Heperona ki mua a Iehova, ti fakauku e lautolu a Tavita ke eke mo patuiki a Isaraela.
4 Ne tolugofulu e tau tau a Tavita he eke a ia mo patuiki; ti fagofulu e tau ne patuiki ai a ia.
5 Ne eke a ia mo patuiki i Heperona kia Iuta ke he tau tau ne fitu ti ono e mahina; ka kua eke a ia mo patuiki i Ierusalema kia Isaraela oti katoa mo Iuta, ke he tau tau ne tolugofulu ti tolu e tau.
6 Ti o atu a Tavita mo e hana tau tagata ki Ierusalema ke he tau tagata Iepusi kua nonofo ke he motu. Ka kua vagahau mai a lautolu kia Tavita, kua pehe mai, Nakai hao mai a koe ki hinai, ato uta kehe fakamua e koe e tau tagata mata pouli mo e tau tagata kulikuli; Ne pihia a lautolu, he piko a lautolu nakai hao mai a Tavita ki hinai.
7 Ka e fofo e Tavita e taue i Siona, ko e maga a Tavita haia.
8 Ti pehe age a Tavita ke he aho ia, Ko ia ke keli e tau tagata Iepusi kia hake atu a ia ke he hala vai, mo e keli ai e ia e tau tagata kulikuli mo e tau tagata mata pouli, kua vihiatia e Tavita. Ko e mena ia kua pehe age a lautolu, Ha ha i ai e tau tagata mata pouli mo e tau tagata kulikuli; nakai hao mai a ia ki fale,
9 Ti nofo ai a Tavita ke he taue ti ui ai e ia ko e maga a Tavita. Kua ati takai ai e Tavita ke kamata i Milo ti hoko ki loto.
10 Kua tolomaki fakahaga ni e lilifu a Tavita, ha ha ia ia foki a Iehova, ko e Atua he tau kau.
11 Ti fakafano mai e Hiramo ko e patuiki a Turo e tau fekau kia Tavita; ti ta mai ai e ia e tau akau ko e tau arasi, mo e tau tufuga, mo e tau tufuga ati fale; ti ta ai e lautolu e fale ma Tavita.
12 Ti iloa e Tavita kua fakamau ai e Iehova a ia ke eke mo patuiki a Isaraela, mo e fakatokoluga ai e ia hana kautu ha ko e motu hana ko Isaraela.
13 Ti eke foki e Tavita e tau hoana fakahoa mo e tau hoana i Ierusalema; ha kua fina age a ia i Heperona; ti fanau ai foki e tau tama tane mo e tau tama fifine kia Tavita.
14 Ko e tau higoa hanai ha lautolu ne fanau ai kia ia i Ierusalema; ko Samua, mo Sopapa, mo Natano, mo Solomona.
15 Mo Ivara, mo Elisua, mo Nefeku, mo Iafiia.
16 Mo Elisama, mo Eliata, mo Elifaleta.
17 Kua logona he tau tagata Filisitia kua fakauku a Tavita ke eke mo patuiki a Isaraela, ti o hake ai e tau tagata Filisitia oti ke kumi a Tavita, kua logona e Tavita ti hifo ai a ia ke he taue.
18 Ti o atu e tau tagata Filisitia mo e fofola ai a lautolu ke he pahua he tau tagata Refā.
19 Ti huhu atu a Tavita kia Iehova, kua pehe atu, To hake nakai au ke he tau tagata Filisitia? To tuku mai nakai e koe a lautolu ke he lima haku? Ti pehe mai ai a Iehova kia Tavita, Hake ā, ha ko e mena to tuku atu ni e au e tau tagata Filisitia ke he lima hau.
20 Kua fina age a Tavita ki Paala-Faresa, ti keli e Tavita a lautolu ke he mena ia; ti pehe age a ia, Kua oho mai a Iehova ke he haku tau fi ki mua haku, tuga ne oho mai e vai, ko e mena ia ne fakahigoa ai e ia e mena ia ko Paala-Faresa.
21 Kua tiaki ai e lautolu, ke he mena ia e tau tupua ha lautolu, ti uta kehe ai e Tavita mo e hana tau tagata.
22 Kua o hake foki e tau tagata Filisitia, mo e fofola ai a lautolu ke he pahua a Refā.
23 Ti huhu atu ai a Tavita kia Iehova, ti pehe mai a ia, Aua neke hake a koe, ka kia fano takai ai a koe ki tua ha lautolu, ti fina atu a koe kia lautolu tata age ke he tau akau ko e tau pēka.
24 Ka logona ai e koe ke he tau tapunu akau ko e tau peka e tomumu he tau tagata ne o, ti fakaave a koe, ha kua fina atu ai a Iehova ki mua hau ke keli e kau he tau tagata Filisitia.
25 Ti eke e Tavita tuga ne poaki mai ai e Iehova kia ia; ti keli ai e ia e tau tagata Filisitia ke kamata mai i Kepa ke hoko atu ki Kasera.