Amosa

Ko e Tohi a Amosa

1 KO e tau kupu a Amosa ne ha i ai fakalataha mo e tau leveki manu i Tikoa, ne kitia ai e ia kia Isaraela, ke he vaha he patuiki a Iuta ko Usia, ko e vaha foki a Ierepoamo ko e tama a Ioasa ko e patuiki a Isaraela, ua e tau ne toe he vaha ia to to ai e mafuike.

2 Kua pehe mai, To fakaleo lahi mai a Iehova i Siona, to leo mai foki hana fofoga i Ierusalema, to tagi foki e tau mena ne totolo ai e tau manu he tau leveki mamoe, to fifigo foki e tapunu mouga he mouga ko Karamelu.

3 Kua pehe mai e vagahau a Iehova, Ne tolu e holifono a Tamaseko, ti fa foki, nakai liliu kehe ai e au hana fakahala; he haha e lautolu a Kiliata ke he tau lapatoa ne haha aki e tau saito.

4 Ka to tuku atu e au e afi ke he fale a Hasaeli, to fakaoti ai foki e tau fale iki a Penihata.

5 To papaki foki e au e akau fakalava a Tamaseko, to fakaoti foki e au a lautolu kua nonofo ke he pahua a Avene, katoa mo ia kua toto e tokotoko i Pete-etena; to fakapaea atu foki e motu ko Suria ki Kira, kua pihia mai a Iehova.

6 Kua pehe mai e vagahau a Iehova, Ne tolu e holifono a Kasa, ti fa foki, to nakai liliu kehe e au hana fakahala, he fakapaea atu e lautolu e paeaaga katoa ke tuku atu ai a lautolu ki Etoma.

7 Ka to tuku atu e au e afi ke he kaupa a Kasa, to fakaoti ai hana tau fale iki.

8 To fakaoti e au a lautolu kua nonofo i Asetota, mo ia kua toto e tokotoko i Asekelona; to liuaki atu e au haku lima ki Ekerona; ti mahaikava ai a lautolu ne toe i Filisitia, kua pihia mai e Iki ko Iehova.

9 Kua pehe mai e vagahau a Iehova, Ne tolu e holifono a Turo, ti fa foki, to nakai liliu kehe ai e au hana fakahala; he tuku atu e lautolu e paeaaga katoa ki Etoma, mo e nakai manatu ai e lautolu e maveheaga mo e tau matakainaga.

10 Ka to tuku atu e au e afi ke he kaupa a Turo, ti fakaoti ai hana tau fale iki.

11 Kua pehe mai e vagahau a Iehova, Ne tolu e holifono a Etoma, ti fa foki, to nakai liliu kehe ai e au hana fakahala; he tutuli e ia hana matakainaga ke he pelu, nakai ni fai fakaalofa a ia, ne hēhē mau e ia ke he ita; ne toka fakaoti e ia hana ita lahi.

12 Ka to tuku atu e au e afi ki Timanu, ti fakaoti ai e tau fale iki a Posara.

13 Kua pehe mai e vagahau a Iehova, Ne tolu e holifono he fanau a Amoni, ti fa foki; to nakai liliu kehe ai e au hana fakahala; he iihi e lautolu e tau manava he tau fifine fatu i Kiliata, kua fakalaulahi ai e lautolu e kelekele ha lautolu.

14 Ka to tafu ai e au e afi ke he kaupa a Rapa, to fakaoti ai mo e kalaga hana tau fale iki, ke he aho ke tau ai, mo e afā ke he aho ke to ai e hiohio.

15 Ti o ai ke he paeaaga e patuiki ha lautolu, ko ia mo e hana tau iki fakalataha mo ia, kua pihia mai a Iehova.