Teutaronome
23 AUA neke fina atu ke he fakapotopotoaga a Iehova, e tagata ne malipilipi ai hana mouiaga, po ke hehele kehe ai hana fuuho.
2 Aua neke fina atu ai e tama tohi ke he fakapotopotoaga a Iehova; nakai ni fina atu a ia ke he fakapotopotoaga a Iehova ke hoko ni ke he tau tau ne hogofulu.
3 Aua neke fina atu ha tagata Amori, po ke tagata Moapi ke he fakapotopotoaga a Iehova; ke hoko ni ke he hau ne hogofulu ha lautolu, aua neke o atu ai a lautolu ke he fakapotopotoaga a Iehova ke hoko ke he tukulagi;
4 He nakai o mai a lautolu ke feleveia mo mutolu mo e tau areto, mo e magavai, ke he puhala he o mai ai a mutolu i Aikupito; nukua totogi foki e lautolu a Palaamo ko e tama a Peoro, i Petoru i Mesopotamia, ke kaialu kia koe.
5 Ka e nakai mafai a Iehova hau a Atua ke fanogonogo kia Palaamo; ka e liliu ai e Iehova hau a Atua e kaialu ke eke mo fakamonuina kia koe, ha kua fakaalofa mai a Iehova hau a Atua kia koe.
6 Ua eke e koe ha mena ke mafola ai a lautolu, po ke monuina ai a lautolu ke he hau a tau aho oti ni tukulagi.
7 Aua neke fakavihia e koe e tagata Etoma, ha ko e hau a matakainaga haia; ti ua vihiatia foki e koe e tagata Aikupito, ha ko e mena eke a koe mo tagata kehe ke he hana motu.
8 Ko e tau tama ke fanau mai ai ia lautolu to huhu atu ai a lautolu ke he fakapotopotoaga a Iehova ke he hau ne tolu ha lautolu.
9 Kaeke ke o atu e kau ke tau kia lautolu kua fai fi kia koe, a koe, neke eke ai e koe ha mena kelea.
10 Kaeke ke ha ia mutolu ha tagata kua hoko kia ia e kelea ke he po, kia fano a ia ki tua he heaga api, aua neke liu mai foki a ia ke he heaga api;
11 Ka hoko ke he afiafi ti koukou a ia ke he vai; ka to e la ti liu mai a ia ke he fakapotopotoaga.
12 Kia ha ha ia koe ha mena ki tua he heaga api, ke fina atu a koe ki ai;
13 Kia ha ia koe foki ha koho mo e hau a tau kanavaakau; ka fano foki a koe ke he vao ti keli ai e luo ti liu ai foki a koe mo e tanu hau a otaota;
14 Ha ko e mena haele fano ai a Iehova hau a Atua ki loto hau a heaga api, ke laveaki a koe, mo e foaki mai e ia ki mua hau a lautolu kua fai fi kia koe; ko e mena ia kia tapu ai hau a heaga api; neke fioia ni e ia e mena kelea ia koe, mo e liu kehe ai a ia ia koe.
15 Aua neke tuku atu e koe ke he hana iki e fekafekau kua hola mai kia koe he hana iki;
16 Kia nofo ai a ia mo koe, ke he hau a motu, ke he mena ke fifili ai e ia ke he taha he hau a tau maga, ke mitaki kia ia; aua neke eke fakakelea e koe kia ia.
17 Aua neke ha i ai he tau tamāfine a Isaraela ha fifine fakataka; ti aua neke ha i ai ha tane mahani sotoma ke he tau tama tane a Isaraela.
18 Aua neke uta e koe ke he fale a Iehova hau a Atua e totogi he fifine fakataka, po ke mena ne moua he fakafua aki e kuli, ke eke mo mena ne omonuo ai; ha ko e fakalialia e na mena ua ia kia Iehova hau a Atua.
19 Aua neke ta age e koe e tau mena ke he hau a matakainaga ke totogi fakaloga mai e ia; ko e tau tupe ke totogi fakaloga mai, po ke tau mena kai ke totogi fakalahi mai, po ke falu a mena he tau mena oti ke totogi fakaloga mai;
20 To ta age mena e koe ke he tagata kehe ke totogi fakaloga mai e ia; ka e aua neke āge mena e koe ke he hau a matakainaga ke totogi fakaloga mai; kia fakamonuina ai e Iehova hau a Atua a koe ke he tau mena oti ni ke eke ai hau a tau lima, ke he motu ke fano a koe ki ai ke eke ai mau.
21 Kaeke ke omonuo ai e koe e omonuo kia Iehova hau a Atua, aua neke mule a koe ke uta ai; ha ko e mena kumi mai ia e Iehova hau a Atua kia koe; ti eke ai e mena ia mo hala kia koe.
22 Kaeke ke nakai omonuo e koe; nakai ni hala ai a koe he mena ia.
23 Ko e kupu kua to mai he gutu hau kia omaoma a koe ki ai mo e eke ai, ko e poa kua makai ki ai e loto ke eke, tuga ne omonuo ai e koe kia Iehova hau a Atua; kua vagahau ai a koe.
24 Ka fina atu a koe ke he ulu vine he tagata ne katofia mo koe, ti kai ai e koe e tau fua vine ato makona ai a koe; ka e aua neke fafao ai ke he kato hau.
25 Ka fina atu a koe ke he ulu saito he tagata ne katofia mo koe ko e saito ne tu agaia, ti faki mai ai e koe e tau fua ke he hau a lima; ka e aua neke helehele ai e koe ke he hau a helesaito e tau saito kua tu agaia he tagata ne katofia mo koe.