Ieremia

36 KO e tau fa a Iehoakima ko e tama a Iosia ko e patuiki a Iuta ne hoko mai ai e kupu ia Iehova kia Ieremia, kua pehe mai,

2 Kia uta a e koe e tohi vakai, ti tohi ai e koe e tau kupu oti ne vagahau atu e au kia koe kia Isaraela, mo Iuta, mo e tau motu oti, ke kamata mai he vaha ne vagahau atu ai e au kia koe, mai he vaha ia Iosia, ke hoko ni ke he aho nai.

3 Po ke fanogonogo nakai e magafaoa a Iuta ke he malaia oti kua manatu e au ke fakahoko atu kia lautolu; kia liliu mai a lautolu, takitaha e tagata mai he tau puhala kelea hana, mo e fakamagalo e au ha lautolu a tau mahani kelea mo e ha lautolu a tau hala.

4 Ti ui ai e Ieremia kia Paruka ko e tama a Neria; to tohi ai e Paruka ke he tohi vakai, mai he fofoga a Ieremia e tau kupu oti a Iehova ne vagahau mai a ia kia ia.

5 Ti poaki atu e Ieremia kia Paruka, kua pehe atu, Kua puipui ai au, nakai maeke au ke fina atu ke he fale a Iehova;

6 Ka kia fano a koe, mo e totou e koe ke he tohi vakai, ne tohi ai e koe mai he gutu haku, e tau kupu a Iehova ki mua he motu ke he fale a Iehova ke he aho ke fakakanopogi ai; ti totou ai foki ki mua a Iuta oti, ko lautolu kua o mai ai he tau maga ha lautolu.

7 Po ke tuku atu nakai e lautolu ha lautolu a tau liogi ki mua a Iehova, mo e liliu mai a lautolu, takitaha e tagata mai he tau puhala kelea hana; ha kua lahi e ita mo e vale kua vagahau mai ai e Iehova ke he motu nai.

8 Ti eke e Paruka ko e tama a Neria ke lata mo e tau mena oti ne poaki atu ai he perofeta ko Ieremia; ne totou ai e ia ke he tohi e tau kupu a Iehova ke he fale a Iehova.

9 Ko e tau lima a Iehoakima ko e tama a Iosia ko e patuiki a Iuta, ke he hiva mahina, kua fakamatala atu ai e lautolu e fakakanopogi ki mua a Iehova ke he tau tagata oti i Ierusalema, mo e tau tagata oti ne o mai ai he tau maga a Iuta ki Ierusalema.

10 Ti totou ai e Paruka ke he tohi e tau kupu oti a Ieremia ke he fale a Iehova, ke he poko a Kemaria ko e tama a Safana ko e tohikupu, ke he lotopā i luga, ke he mena ne fina atu ai ke he gutuhala fou he fale a Iehova, ti fanogonogo e motu o tagata oti.

11 Kua logona e Mikaio ko e tama a Kemaria, ko e tama a Safana, e tau kupu oti a Iehova mai he tohi;

12 Ti hifo ai a ia ke he fale he patuiki, ke he poko he tohikupu, ti kitiala, ne nonofo ai e tau iki oti, ko Eliasama ko e tohikupu, mo Tilaia ko e tama a Samaia, mo Elenatana ko e tama a Akepora, mo Kemaria ko e tama a Safana, mo Setekaia ko e tama a Hanania, mo e tau iki oti.

13 Ti tala age ai e Mikaio kia lautolu e tau kupu oti ne logona e ia, he totou ai e Paruka ke he tohi ki mua he motu.

14 Ti fakafano atu ai he tau iki oti a Iehuti ko e tama a Netania, ko e tama a Selemaia; ko e tama a Kusi, kia Paruka, kua pehe atu, Kia toto e koe ke he hau a lima e tohi vakai ne totou ai e koe ki mua he motu, ti hau a koe. Ti uta e Paruka ko e tama a Neria e tohi vakai ke he hana lima, mo e fina atu ai a ia kia lautolu.

15 Ti pehe mai a lautolu kia ia, Nofo ā, ti totou mai ai e koe ke logona atu e mautolu. Ti totou ai e Paruka ti fanogonogo mai a lautolu.

16 Kua logona e lautolu e tau kupu oti na, ti matakutaku ai a lautolu, ko e taha mo e taha, mo e pehe mai a lautolu kia Paruka, to tala age ni e mautolu e tau kupu oti ia ke he patuiki.

17 Ti huhu mai a lautolu kia Paruka, kua pehe mai, Kia tala mai la kia mautolu, po ke tohi fefe e koe e tau kupu oti ia mai he fofoga hana?

18 Ti pehe atu a Paruka kia lautolu, Ne fakamatala mai e ai e tau kupu oti ia mai he fofoga hana, ti tohi ai e au ke he tohi ke he vai tohi.

19 Ti pehe mai e tau iki kia Paruka, Kia fano ā koe, ti fakamumuli a mua mo Ieremia, ti aua neke iloa e taha po ko fe a mua.

20 Ti o age a lautolu ke he patuiki ke he lotopa, ka kua tuku e lautolu e tohi vakai ke he poko a Elisama ko e tohikupu; ti fakakite age e lautolu e tau kupu oti ia ki mua he patuiki.

21 Ti fakafano atu he patuiki a Iehuti ke ta mai e tohi vakai; ti ta mai ai e ia he poko a Elisama ko e tohikupu; ti totou ai e Iehuti ki mua he patuiki, ki mua foki he tau iki oti ne tutu ai he tapa he patuiki.

22 Ne nofo ai foki e patuiki ke he fale he tau makalili ke he hiva mahina, ti puho ai e afi ke he lapatoa ne fakapuho ai e afi mumu ki mua hana.

23 Kua hoko a Iehuti ke he atu kupu tolu po ke fa he totou, ti helehele ai he patuiki e tohi ke he titipi he tohikupu, mo e liti ke he afi ha ha he lapatoa ne fakapuho ai e afi, ato fakaoti ai e tohi vakai katoa ke he afi ha ha i ai ke he lapatoa ne fakapuho ai e afi.

24 Ti nakai matakutaku a lautolu, ti nakai hehe ai e lautolu e tau tapulu ha lautolu, ko e patuiki mo e hana tau fekafekau oti, ne logona e tau kupu oti ia.

25 Ha ko e mena olelalo atu ni e Elenatano, mo Tilaia, mo Kemaria ke he patuiki, ke aua neke huhunu ai e ia e tohi vakai; ka e nakai fanogonogo a ia kia lautolu.

26 Ti poaki atu e patuiki kia Ieramaelu ko e tama he patuiki, mo Seraia ko e tama a Asirielu, mo Selemaia ko e tama a Apitelu, kia tapaki e lautolu a Paruka ko e tohikupu, mo Ieremia ko e perofeta; ka kua fufu e Iehova a laua.

27 Ti hoko mai ai e kupu a Iehova kia Ieremia, ka kua oti he huhunu he patuiki e tohi vakai, mo e tau kupu ne tohi e Paruka mai he gutu a Ieremia, kua pehe mai,

28 Kia uta foki e koe taha tohi vakai mo e tohi ai e tau kupu fakamua oti ne ha i ai ke he tohi vakai fakamua, ne huhunu ai he patuiki a Iuta ko Iehoakima.

29 Ti pehe atu a koe ke he patuiki a Iuta ko Iehoakima, Kua pehe mai e kupu a Iehova, Kua huhunu e koe e tohi vakai na, kua pehe mai, Ko e ha ne tohi ai e koe, pehe, To hau ni e patuiki a Papelonia, mo e fakaoti ai e motu nai, mo e uta kehe ai e ia e tau tagata katoa foki mo e tau manu?

30 Ko e mena ia kua pehe mai e vagahau a Iehova ke he patuiki a Iuta ko Iehoakima, To nakai, ha ia ia taha ke nofo ke he nofoaiki a Tavita; to liti foki hana tino ka mate ke he vevela ka aho, mo e makalili ka po.

31 To taui atu foki e au kia ia, mo e hana fanau; mo e hana tau fekafekau, ha lautolu a tau mahani kelea; to fakahoko atu foki e au kia lautolu, mo lautolu ne nonofo i Ierusalema, mo e tau tagata Iuta, e tau malaia oti ne vagahau atu ai e au kia lautolu; ka e nakai fanogonogo mai a lautolu.

32 Ti uta ai e Ieremia taha tohi vakai, mo e ta age ai ke he tohikupu ko Paruka ko e tama a Neria; ti tohi ai foki e ia mai he gutu a Ieremia, e tau kupu oti he tohi ne huhunu ai ke he afi he patuiki a Iuta ko Iehoakima; ti lafi ai foki falu a kupu pihia ne loga.