Tau Fakatai

26 KE tuga ne kiona ke he tau mafana, tuga foki e uha ke he vaha kua helehele ai e tau saito; kua nakai ni lata pihia e lilifu ke he tagata goagoa.

2 Tuga ne manu lele kua faifano, mo e pekapeka kua lele, kua pihia e kaialu kua eke noa nakai ni hoko.

3 Ko e hunu ke hunu aki e solofanua, ko e fakamau gutu ma e asini, mo e akau ma e tua he tagata goagoa.

4 Aua neke tali atu a koe ke he tagata goagoa ke lata mo e hana goagoa; neke tatai foki a mua mo ia.

5 Kia tali atu a ke he tagata goagoa ke lata mo e hana goagoa; neke iloilo a ia ke he hana ni a manatu.

6 Ko ia kua fakafano atu e tagata goagoa ke uta e ogo; kua helehele kehe e ia hana tau hui, kua inu foki e ia e mena ke mamahi ai a ia.

7 Kua toho e tau hui he tagata kulikuli; kua pihia foki e fakatai ke he gutu he tagata goagoa.

8 Tuga ne kofukofu maka uho ke he tanakiaga maka, kua pihia a ia kua ta age e fakahekeaga ke he tagata goagoa.

9 Tuga ne akau talatala kua ta hake ai ke he lima he tagata konahia, kua pihia ni e fakatai ke he tau gutu he tau tagata goagoa.

10 Ko e patu eke gahua kua taute ai e ia e tau mena oti; ka ko ia kua palepale e tagata goagoa ke gahua, kua tuga a ia kua palepale ke gahua a lautolu ne o age ai he puhala.

11 Tuga ne kuli kua liu ke he hana kokō, kua pihia foki e tagata goagoa, kua liu foki eke hana tau mena goagoa.

12 Kua kitia kia e koe e tagata kua iloilo ke he hana ni a manatu? kua fai amaamanaki e tau tagata ke he tagata goagoa, ka e nakai pihia kia ia.

13 Kua pehe e tagata teva, Ko e leona ha ha he puhala, ha ha he tau male e leona.

14 Tuga ne feliuaki e gutuhala ke he hana tau fakamau, kua pihia he fuluhi ai e tagata teva ke he hana mohega.

15 Kua fufu he tagata teva hana lima ke he kumete ne toka ai e tau mena kai; kua uka kia ia ke liuaki mai ke he gutu hana.

16 Kua manatu he tagata teva kua mua hana iloilo ke he tau tagata tokofitu, ko e tau tagata kua tali mai mo e manamanatu.

17 Ko ia kua fina age mo e ita ai ke he taufetoko kehe, kua lata a ia mo e tagata kua tapaki e kuli ke he hana tau teliga.

18 Tuga ne tagata heketia kua fana ke he tau fana kaka, mo e tau fana, mo e mate;

19 Kua pihia e tagata kua fakavai hana kapitiga, mo e pehe age kia ia, Nakai kia fefeua atu au?

20 Ka nakai fai gaafi ti mate ai e afi, ti mole atu foki e taufetoko ka nakai ha ha i ai e tagata feutaaki tala.

21 Tuga ne tau malala ke he tau malala kaka, tuga foki e gaafi ke he afi, kua pihia e tagata fa taufetoko ke fakatapu ai e taufetoko.

22 Ko e tau kupu he tagata feutaaki tala, kua lata ia mo e tau mena lolo, kua hoko hifo ki loto he manava.

23 Ko e tau laugutu kua vagahau mo e fakaalofa lahi, ka e kelea e loto, kua lata ia mo e kapiniu kelekele kua fakakili aki he ario ne toka ai e otaota.

24 Ko ia kua fakavihia, kua vagahau mitaki fakatupua ke he hana tau laugutu; ka e toka ai e ia e fakavai ke he hana loto;

25 Pete he vagahau mai a ia mo e tonu, aua neke tua a koe kia ia; ha kua ha ha he loto hana fitu e mena vihiatia;

26 Kua ufiufi ai e ia hana fakavihia ke he pikopiko; ka to fakakite ai hana mahani kelea ki mua he fakapotopotoaga.

27 Ko ia kua keli e luo, to to a ia ki ai; ko ia foki kua fuluhi e maka, to liu taveli mai ai kia ia.

28 Kua fakavihia he alelo pikopiko a lautolu ne malipilipi ia ia; ko e gutu kua vagahau fakamolemole kua tupu ai e malaia.