2 Samuela

11 KUA liu hoko mai e tau, ko e vaha ia ne o age ai e tau patuiki ke tau, ti fakafano atu e Tavita a Ioapo, mo e hana tau fekafekau fakalataha mo ia, katoa mo Isaraela oti; ti fakaotioti e lautolu e fanau a Amoni, mo e pa takai e lautolu a Rapa; ka e nofo a Tavita i Ierusalema.

2 Kua hoko ke he taha afiafi kua matike a Tavita mai he mohega hana kua evaeva a ia ke he tua fale ki luga he fale he patuiki; ti kitia atu e ia mai luga he tua fale, e fifine ne koukou, ko e fifine tino mitaki lahi a ia.

3 Ti fakafano atu ai e Tavita ke huhu po ko hai e fifine. Ti pehe age e taha, Nakai kia ko Patesepa aena, ko e tama fifine a Eliamu, ko e hoana a Uria ko e tagata Heti?

4 Ti fakafano atu e Tavita e tau fekafekau, kua ta mai e lautolu a ia; ti hau ai a ia kia ia; ti momohe ai a laua mo ia; (ka ko e fifine ne fakamea e ia a ia he hana kelea;) ti liu atu a ia ke he hana fale.

5 Kua fatu e fifine, ti fakafano age e ia taha mo e tala age ai kia Tavita, kua pehe age, Kua fatu tuai au.

6 Ti fakafano atu e Tavita taha kia Ioapo, kua pehe atu, Kia fakafano mai e koe kia au a Uria ko e tagata Heti. Ti fakafano age ai e Ioapo a Uria kia Tavita.

7 Kua hau a Uria kia ia, ti huhu atu ai e Tavita, po ke monuina nakai a Ioapo, mo e monuina nakai e motu, mo e monuina nakai e tau.

8 Ti pehe atu a Tavita kia Uria, Kia hifo a koe ke he hau a fale mo e holoholo ai hau a tau hui. Kua fano a Uria he fale he patuiki, ti mui atu e taha kia ia mo e maga galue mai he patuiki.

9 Ka e takoto ai a Uria ke he gutuhala he fale he patuiki fakalataha mo e tau fekafekau he hana iki, kua nakai hifo a ia ke he hana fale.

10 Ti tala age ai e lautolu kia Tavita, kua pehe age, Nakai hifo a Uria ke he hana fale. Ti pehe atu a Tavita kia Uria, Nakai kia hau a koe he fenoga? Ko e heigoa kia e mena nakai hifo ai a koe ke he fale hau;

11 Ti pehe mai ai a Uria kia Tavita, Ko e puha, mo Isaraela, katoa mo Iuta, kua nonofo a lautolu ke he tau fale api; ko e haku iki foki ko Ioapo, mo e tau fekafekau he haku iki kua heapi ai a lautolu ke he fuga kelekele; ti fano kia au ke he haku fale ke kai mena ai au mo e inu, ke momohe ai foki mo e hoana haku? Kua moui a koe mo e moui hau a agaga nakai eke e au e mena nai.

12 Ti pehe atu a Tavita kia Uria, Nofo a a koe ki hinai he aho nai foki, ti fakafano atu e au a koe a pogipogi. Ti nofo ai a Uria i Ierusalema ke he aho ia mo e taha aho.

13 Ti ui atu e Tavita kia ia, ti kai ai e ia mo e inu ki mua hana, ti fakainu e ia a ia ke konahia. Ti fina atu a ia ke he magaaho afiafi mo e takoto ai a ia ke he hana moheaga fakalataha mo e tau fekafekau he hana iki, ka e nakai ni hifo a ia ke he hana fale.

14 Kua hoko ke he aho a pogipogi ti tohi e Tavita e tohi kia Ioapo, ti fakafano age ai ke he lima a Uria.

15 Ti tohi ai e ia ke he tohi, kua pehe age, Kia tuku e koe a Uria ke he mena ne tau mai ai e tau toa, ti tukumuli mai a mutolu ia ia, kia keli ai a ia ke mate a ia.

16 Kua pa takai ai e Ioapo ke he maga ti kotofa ai e ia a Uria ke he mena ne iloa e ia ne ha i ai e tau tagata toa.

17 Ti o mai ai e tau tagata he maga, ti tau a lautolu mo Ioapo, ti keli ai falu a tagata ko e tau fekafekau a Tavita; kua mate foki a Uria ko e tagata Heti.

18 Ti fakafano atu ai e Ioapo taha, ti talahau atu ai e ia kia Tavita e tau kupu oti ke he tau.

19 Ti poaki age e ia ke he fakau ne uta e ogo, kua pehe age, Ka oti he tala age e koe ke he patuiki e tau kupu oti ke he tau,

20 Kaeke ke ita lahi ai e patuiki, mo e pehe mai a ia kia koe, Ko e ha ne fakatata atu a mutolu ke he maga ke tau ki ai? Nakai kia iloa e mutolu to fana mai e lautolu mai luga he kolo.

21 Ko hai kia ne keli a Apimeleko ko e tama a Ierupeseta? nakai kia ko e fifine ne liti hifo e fahi maka holo ki luga hana mai luga ke kolo, mo e tamate ai a ia i Tipesa? Ne fakatata atu he ha a mutolu ke he kolo? Ti pehe age a koe, Kua mate foki hau a fekafekau ko Uria ko e tagata Heti.

22 Ti fano ai e fekau, kua hoko mai mo e talahau kia Tavita e tau mena oti ne poaki mai ai e Ioapo ia ia.

23 Kua pehe mai e fekau kia Tavita, Ne kautu mai he tau tagata kia mautolu, ti o mai a lautolu kia mautolu ke he vao; ka e totoko atu a mautolu kia lautolu, kua hohoko ke he gutuhala he maga;

24 Ka ko e tau tagata fana ne fana mai e lautolu mai luga he kolo ke he tau fekafekau hāu, ti mamate ai falu a fekafekau he patuiki; mo e hau a fekafekau ko Uria ko e tagata Heti, kua mate foki a ia.

25 Ti pehe atu a Tavita ke he fekau, Kia pehe age a koe kia Ioapo, Aua neke fakalolelole a koe ha ko e mena nai, ha kua kai ai he pelu, mo e nakai fakamailoga tagata. Kia tau fakamalolo a koe ke he maga, mo e moumou ai e koe, kia fakamalolo a koe ki ai.

26 Kua logona he hoana a Uria, kua mate a Uria hana tane, ti tagi tatuki ai a ia ha ko e hana iki.

27 Kua mole atu e tagi, ti fakafano atu e Tavita e ogo ti ta mai ai a ia ke he hana fale, ti eke a ia mo hoana hana, ti fanau ai e ia hana tama tane. Ka kua kelea kia Iehova e mena ne eke e Tavita.