Heperu

10 HA kua toka ai ke he fakatufono e ata he tau mena mitaki ne tatali, ka e nakai ko e fakatai tonu he tau mena ia, kua nakai maeke ke he tau poa tamate ia kua eke mau ke he taha tau mo e taha tau ke fakakatoatoa ai a lautolu kua o atu ki ai.

2 Kane mai ke maeke po kua nakai tuai eke e tau poa, ha kua oti he fakamea a lautolu kua fekafekau ai, ti nakai tuai iloa e lautolu e tau hala ke he loto manamanatu,

3 Ka ko e tau poa ia kua fakamanatu ai e tau hala ke he taha tau mo e taha tau.

4 Ha ko e mena nakai maeke ke he toto he tau povi tane mo e tau koti ke uta kehe e tau hala.

5 Ko e mena ia kua talahau mai ai e ia ke he hana haele mai ke he lalolagi, Ko e tau poa tamate mo e tau poa, kua nakai finagalo a koe ki ai, ka kua taute e koe e tino māku.

6 Ko e tau poa huhunu, mo e tau poa mo e tau hala kua nakai fiafia a koe ki ai.

7 Ti kua pehe age ai au, Ko e Atua na e, kitiala, kua fina atu au ke eke hau a finagalo, (kua tohia kia au ke he tohivakai.)

8 Kua talahau fakamua a ia, Ko e tau poa tamate, mo e tau poa, mo e tau poa huhunu, mo e tau poa mo e tau hala, kua nakai finagalo a koe ki ai, mo e nakai fiafia ki ai, ko e tau mena ia kua eke ke lata mo e fakatufono;

9 Ti talahau mai ai foki a ia, Ko e Atua na e, kitiala, kua fina atu au ke eke hau a finagalo; ne uta kehe e ia e mena fakamua kia fakatumau ai e mena ke ua aki.

10 Ko e finagalo haia kua fakatapu ai a tautolu ke he tino a Iesu Keriso kua eke mo poa laga taha ni.

11 Kua tutu foki e tau ekepoa takitokotaha ke fekafekau atu ke he taha aho mo e taha aho, kua eke mau foki e tau poa ia, kua nakai maeke ni ke uta kehe ai e tau hala.

12 Ka ko ia, kua eke e ia e poa taha mo e tau hala, ti nofo tukulagi ai a ia ke he fahi matau he Atua,

13 Kua fakatalitali atu ai a ia, ato eke a lautolu kua fai fi kia ia mo fakatuagave hana.

14 Ha ko e poa taha ni kua fakakatoatoa ai tukulagi e ia a lautolu kua fakatapu.

15 Ko e talahau foki kia tautolu e Agaga Tapu; ha ko e mena kua oti hana talahau mai fakamua,

16 Ko e maveheaga hanai ke eke e au mo lautolu ka mole atu e tau aho ia, kua pihia mai e Iki, To tuku atu e au haku a tau fakatufono ke he tau loto ha lautolu, mo e tohi ai foki e au ke he tau manamanatu ha lautolu,

17 Ka ko e tau hala ha lautolu mo e tau holifono ha lautolu, nakai tuai manatu au ki ai.

18 Hanai, ko e mena ha i ai e fakamagaloaga he tau mena ia, kua nakai tuai eke ai e poa mo e tau hala.

19 Hanai, ko e tau matakainaga na e, ha ha ia tautolu e pule ke huhu atu ke he mena tapu ue atu ha ko e toto a Iesu,

20 Ke he puhala fou ke moui ai, kua fakapa ai e ia ma tautolu ke he fahi atu he ie puipui, ko e hana tino haia;

21 Ha ia tautolu foki e ekepoa ne mua kua pule ke he fale he Atua,

22 Kia fakatata atu a tautolu kia ia mo e loto fakamoli ke he tua kua makamakafua, kua pīpī tuai ha talu tau loto mai he loto manamanatu kelea, kua koukou foki ha tautolu a tau tino ke he vai tavana.

23 Kia taofi mau e tautolu ha tautolu a amaamanaki kua talahau atu e tautolu mo e nakai hikihikifano; ha kua fakamoli a ia kua talahaua mai;

24 Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki;

25 Aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.

26 Ha ko e mena kaeke kua hala a tautolu mo e loto ki ai, ka kua talia tuai e tautolu e maama he kupu moli, ti nakai tuai toe ha poa mo e tau hala,

27 Ka ko e tatali mo e matakutaku lahi ke he fakahala, mo e ita lahi ke huhunu ai a lautolu kua totoko atu.

28 Ko ia ne totoko ke he fakatufono a Mose ne mate a ia ke he talahau he tokoua po ke tokotolu, mo e nakai fakaalofa ki ai.

29 Kua manatu a mutolu ke ha ke he mua he mamafa he taui kua lata mo ia kua taholi e Tama he Atua, mo e talahau kua nakai tapu e toto he maveheaga ne fakatapu ai a ia, ti kupu kelea foki ke he Agaga he fakaalofa noa?

30 Ha kua iloa e tautolu a ia kua talahau mai, Kua pehe mai e Iki, Ha ia au ke taui atu, to taui atu e au. Ti pehe foki, To fakafili he Iki hana tau tagata.

31 Ko e mena ke matakutaku lahi ai ke moua a tautolu he tau lima he Atua moui.

32 Ka kia manamanatu a mutolu e vaha i tuai, ne fakamaamatia ai a mutolu, ti fakauka ai a mutolu ke he tau lahi he tau mena matematekelea.

33 Ne tauamuamu kia mutolu mo e matematekelea ke eke a mutolu mo kitekiteaga; ko e taha mena ia, ka ko e taha hanai, kua fakalataha a mutolu mo lautolu ne eke pihia ki ai;

34 Ha kua fakaalofa mai a mutolu ke he haku a tau liliaga, kua tuku atu foki e mutolu mo e fiafia e tau koloa ha mutolu ke fofo, he iloa e mutolu ha he lagi e tau koloa ha mutolu kua mua he mitaki to tumau.

35 Ko e mena ia, aua neke tiaki ai e mutolu e fakamalolo ha mutolu, ha i ai e palepale kua lahi.

36 Nukua aoga kia mutolu e fakauka, kia moua ai e mutolu e tau mena kua talahaua mai, ka oti he eke e mutolu e finagalo he Atua.

37 Ha ko e toe tote ni to hoko mai a ia ha ne haele mai mo e nakai mule mai.

38 Ka e moui e tagata tututonu ke he tua; kaeke foki ke tukumuli, nakai fiafia haku a loto kia ia,

39 Ka ko tautolu, nakai ha ia lautolu kua tukumuli ke he malaia, ka ko lautolu kua tua ke momoui ai e tau agaga.