Isaia

43 KA ko ainei, kua talahau mai pehe a Iehova, ko ia ne eke a koe, Iakopo na e, mo ia ne eke a koe ma Isaraela na e; ua matakutaku a koe, ha kua laveaki e au a koe, kua ui ai e au a koe ke he hau a higoa; kua eke a koe maku.

2 Ka fina atu a koe ke he tau vai, to fakalataha au mo koe; ka fina atu a koe ke he tau vailele, nakai tafia ai a koe; ka fano a koe ki loto he afi, nakai vela ai a koe; to nakai huhunu ai foki a koe ke he afi puhopuho.

3 Ka ko au ko Iehova hau a Atua, ko ia ne Tapu i Isaraela, ko e Fakamoui hau; ne ta atu ai e au a Aikupito ke eke mo palepale māu, ko Aitiope mo Sipa ke hukuiaki a koe.

4 Ha kua fakahelehele e au a koe, kua fakalilifu e au a koe; kua fakaalofa atu foki au kia koe, ko e mena ia to ta atu ai e au e tau tagata ke hukuiaki a koe, mo e tau motu ke hukui aki hau a moui.

5 Ua matakutaku a koe, ha ko au kua fakalataha mo koe; to ta mai e au hau a fanau mai he fahi uta; to fakapotopoto foki e au a mutolu mai he fahi lalo.

6 To pehe atu au ke he fahi tokelau, Tuku mai ā; mo e fahi toga, Aua neke taofi; kia ta mai haku a tau tama tane he mena mamao, mo e haku a tau tama fifine mai he motuaga he lalolagi;

7 Ko lautolu oti ne ui ai ke he haku a higoa, ne eke e au a lautolu ke lilifu ai au; ne taute ai e au, mo e eke e au a lautolu.

8 Kia takitaki mai a e motu matapouli, ne ha i ai kia lautolu e tau mata; mo e motu teliga tuli, ne ha i ai kia lautolu e tau teliga.

9 Kia fakapotopoto fakalataha e tau motu kehe oti, mo e tutuuta mai ai e tau motu oti. Ko hai ia lautolu ke fakakite mai e tau mena nai, po ke fakailoa mai kia tautolu e tau mena fakamua? Kia tamai a e lautolu ha lautolu a tau fakamoli, kia talahaua tututonu ai a lautolu; po ke fanogonogo mai a lautolu, mo e pehe mai a lautolu, Ko e moli.

10 Kua pehe mai a Iehova, Ko e haku a tau fakamoli a mutolu, mo e haku a tau fekafekau ne fifili e au a mutolu; kia iloa e mutolu mo e tua a mutolu kia au, mo e kitia ai e mutolu, ko au ni a ia, nakai eke ai fakamua ia au taha atua, ti nakai ha i ai taha ke mui mai kia au.

11 Ko au ko au ni ko Iehova; ti nakai ha i ai e Fakamoui ka ko au ni hoko au.

12 Ko au ni, ne fakakite atu e au, mo e fakamoui ai e au, mo e fakailoa atu e au, ti nakai ha i ai ia mutolu e atua kehe; ko mutolu foki ko e haku a tau fakamoli, ko au ni ko e Atua, kua pihia mai a Iehova.

13 Ka kua nakaila fai aho, ko au ni a ia; ti nakai ni fai tagata ke laveaki mai he lima haku; to eke e au, ka ko hai kia ke moumou ai?

14 Kua talahau mai pehe a Iehova ko ia ne laveaki a mutolu, ko ia ne Tapu i Isaraela; kua fakafano atu e au ki Papelonia ha ko mutolu, mo e ta hifo ai e au a lautolu ne fehola, ko lautolu oti ni, katoa mo e tau tagata Kaletaia, kua kalaga a lautolu ke he tau foulua ha lautolu.

15 Ko au ko Iehova, ko e Iki Tapu ha mutolu; ne eke a Isaraela, ko e ha mutolu a Patuiki.

16 Kua talahau mai pehe a Iehova, ko ia ne eke e puhala ke he tahi, mo e puhala loto ke he tahi ne loka lahi.

17 Ko ia ne tamai e kariota mo e solofanua, ko e tau kau, mo e malolo; to tatakoto fakalataha a lautolu; nakai tuai mamatike a lautolu, kua mamate a lautolu, kua tamate a lautolu tuga ne vavae he lamepa.

18 Aua neke manatu e mutolu ke he tau mena fakamua, ti ua manamanatu a mutolu ke he tau mena ne aho mua.

19 Kitiala, to eke e au e tau mena fou, to tupu hake ainei ni; to iloa e hai e mena ia? Ko e moli to eke ai e au e puhala ke he tutakale, mo e tau vailele ke he motu nakai fai vai.

20 To fakalilifu mai kia au e tau manu he vao, ko e tau luko mo e tau iaena; ha kua ta atu ai e ia e tau vai ke he tutakale, ko e tau vailele ke he motu nakai fai vai; ke inu ai haku motu kua fifili e au.

21 Ne eke e au e motu nai māku; to talahau ai e lautolu haku a fakahekeaga.

22 Ti nakai ui mai e koe kia au, ma Iakopo na e; ha kua fakaahumate mai a koe kia au, ma Isaraela na e.

23 Nakai tamai e koe kia au e tau mamoe he hau a tau poa huhunu; ti nakai fakalilifu mai a koe kia au ke he hau a tau poa; nakai fakafekafekau e au a koe ke he tau poa mena kai, ti nakai fakamamafa atu e au kia koe ke he tau pili lipano.

24 Nakai fakafua mai e koe ke he tau tupe e tau kani māku, ti nakai tamai e koe e gako he hau a tau poa ke makona ai au; ka e fakafekafekau e koe au ke he hau a tau hala, kua fakamamafa mai e koe kia au ke he hau a tau mahani kelea.

25 Ko au, ko au ni kua holoholo kehe ai hau a tau holifono, ha ko au ni; ko e hau a tau hala foki nakai manatu ai e au.

26 Kia fakamanatu mai e koe au, kia fefakafiliaki a taua; kia talahau mai ā koe, kia talahaua tututonu ai a koe.

27 Ne hala ai hau a matua tupuna; mo e hau a tau akoako ne fakafualoto mai a lautolu kia au;

28 Ko e mena ia ke ulu ki lalo e au e tau iki lilifu; to foaki atu foki e au a Iakopo ke tuku atu ai ke malaia, mo Isaraela ke amuamu ki ai.