Gahua

18 KUA mole e tau mena ia kua fano ai a Paulo i Atenai, kua hoko ki Korinito;

2 Kua kitia ai e ia e taha tagata Iutaia, ko Akula e higoa, ne fanau i Pono, ne kito hau i Italia, mo e hana hoana ko Pisila; (ha ko e mena poaki mai a Kalaotio kia o kehe i Roma e tau tagata Iutaia oti kana;) kua fina atu a ia kia laua;

3 Ko e feua taha foki e feua ha lautolu, ko e mena ia kua nofo ai a ia ia laua, mo e gahua; ha ko e feua ha lautolu ke eke e tau fale ie.

4 Kua vagavagahau foki a ia ke he sunako ke he taha aho sapati, mo e taha aho sāpati, mo e ole atu ke he tau tagata Iutaia, katoa mo e tau tagata Heleni.

5 Kua o mai a Sila mo Timoteo i Maketonia, kua fakaatukehe tuai a Paulo ke he loto hana, he talahau atu ke he tau tagata Iutaia, ko Iesu ko e Keriso a ia.

6 Ka kua totoko mai a lautolu, mo e kupu kelea kia Iesu; ti lulululu atu ai e ia hana tau tapulu, mo e pehe age kia lautolu, Ko e ha mutolu a tau toto kia toka ai ia ki luga he tau ulu ha mutolu; kua mea na au; ke kamata ke he aho nai he fano au ke he tau tagata kehe.

7 Ati fano kehe ai a ia he mena ia, kua hu atu ke he fale he taha tagata matakutaku ke he Atua, ko Iuso hana higoa; kua tutaki age ke he sunako hana fale.

8 Kua tua foki ke he Iki e tagata ne pule ke he sunako, ko Kiripo, katoa mo e hana magafaoa oti; ne tokologa foki e tau tagata Korinito ne fanogonogo, kua tua a lautolu, mo e papatiso.

9 Ati vagahau mai ai e Iki kia Paulo ke he fakakiteaga ke he po, Ua matakutaku a koe, ka e vagahau atu a koe, ti ua fakamate;

10 Ha ko e mena ha ha ia koe au, nakai oho mai foki taha ke fakakelea mai kia koe; ha ko e mena tokologa haku a tau tagata he māga nai.

11 Kua nofo ai a ia ke he tau hohoko mo e ono e mahina, kua fakaako atu kia lautolu ke he kupu he Atua.

12 Kua eke a Kaliona mo iki ke pule i Akaia, ti feoho mai ai e tau tagata Iutaia kia Paulo mo e loto fakalataha, kua takitaki e lautolu a ia ke he nofoa fakafili, kua pehe age.

13 Kua ole he tagata nai e tau tagata kia tapuaki ke he Atua kua nakai lata mo e fakatufono.

14 Ko e vagahau atu ne fai a Paulo, ati tala age ai a Kaliona ke he tau tagata Iutaia, Iutaia na e, ane mai ko e mahani hepehepe, po ke matahavala kelea, po kua lata ai he fanogonogo fakauka au kia mutolu;

15 Kaeke ko e fakafili ke he tau kupu mo e tau higoa, mo e fakatufono ha mutolu, ti pule na mutolu; ha ko e mena nakai fia eke au mo fakafili ke he tau mena na.

16 Ti vega atu ai e ia a lautolu he nofoa fakafili.

17 Ti tapaki ai he tau tagata Heleni oti a Sosene ko e tagata ne pule ke he sunako, kua fahi a ia ki mua he nofoa fakafili. Ka e nakai mahalo a Kaliona he taha mena he tau mena ia.

18 Ka e nofo gaia a Paulo kua po loga, ati mavehevehe a ia mo e tau matakainaga, kua o halavaka a ia ki Suria, ko lautolu mo Pisila mo Akula; kua hifipuga e ia hana ulu i Kenekerea, ha kua eke e ia e omonuo.

19 Kua hoko atu ki Efeso, kua toka e ia a laua ke he mena ia; ka e hu atu a ia ke he sunako, kua vagavagahau ke he tau tagata Iutaia.

20 Kua ole a lautolu kia ia ke nofo mo lautolu he falu a aho, ka e nakai mafai a ia.

21 Ka kua mavehe a ia mo lautolu, kua pehe atu, Lata ni he fano au ke he galue ka eke i Ierusalema; ka to liu mai au kia mutolu, ka finagalo ki ai e Atua. Ati fano ai a ia halavaka i Efeso.

22 Kua hoko atu ki Kaisaria, kua hake mo e fakaalofa atu ke he ekalesia, ati hifo ai a ia ki Anetioka.

23 Kua po loga foki, ati fina atu ai a ia, kua fai fano ke he fahi ko Kalatia mo Ferukia, mo e fakamalolo e ia e tau tutaki oti.

24 Kua hau foki ki Efeso e taha tagata Iutaia ko Apolo e higoa, ko Alesania ne fanau ai, ko e tagata vagahau pulotu, mo e iloilo ke he tau Tohi;

25 Kua fakaako tuai e tagata nai ke he puhala he Iki; kua malolo foki hana loto, kua vagahau atu ai a ia, mo e fakaako fakamakutu atu a ia ke he tau kupu he Iki, ko e papatisoaga a Ioane hokoia ne iloa e ia.

26 Ne kamata foki he vagahau fakamalolo atu a ia ke he sunako; kua fanogonogo atu a Akula mo Pisila kia ia, ati takitaki age ai e laua a ia, mo e fakamatala fakatonu atu e puhala he Atua kia ia.

27 Kua loto a ia ke fina atu ki Akaia, ti tohi atu ai e tau matakainaga mo e tomatoma atu ke he tau tutaki kia talia mai a ia; kua hoko foki a ia, ati lagomatai fakalahi ai a ia kia lautolu ne tua ha ko e fakaalofa noa.

28 Ha kua fakatonu mo e fakamakamaka a ia ke he tau tagata Iutaia ki mua he motu, kua fakakite atu ke he tau Tohi, ko Iesu ko e Keriso a ia.