2 Tau Patuiki

10 HA ha i Samaria foki e tau tama tane a Ahapo ne tokofitugofulu. Ti tohi e Iehu e tau tohi mo e fakafano age ai ki Samaria, ke he tau iki i Isereelu ko e tau patu katoa mo lautolu ne leveki e fanau a Ahapo, kua pehe age.

2 Hanai ka hoko atu e tohi nai kia mutolu, ko e mena ha ha ia mutolu e tau tama tane he iki ha mutolu, ha ha ia mutolu foki e tau kariota, mo e tau solofanua, ko e maga foki hai taue, katoa mo e tau kanavaakau;

3 Kia fifili ā e mutolu e tama he iki ha mutolu, kua mua he mitaki mo e mua he lata, ti fakanofo e mutolu a ia ke he nofoa iki he hana matua, mo e tauteute a mutolu ke tau ha ko e magafaoa he iki ha mutolu.

4 Ka kua matakutaku lahi ni a lautolu, kua pehe age a lautolu, Kitiala, nakai tutu e tau patuiki tokoua ki mua hana, po ke maeke fefe a mautolu ke tutu ai?

5 Ti fakafano age ai e ia ne pule ke he magafaoa, mo ia ne pule ke he maga, mo e tau patu, katoa mo lautolu ne leveki e tau tama a Ahapo, kia Iehu kua pehe age, Ko e tau fekafekau hau a mautolu to eke e mautolu e tau mena oti ke tala mai ai e koe; nakai eke e mautolu ha tagata mo patuiki; kia eke e koe e tau mena kua finagalo ai a koe.

6 Ti tohi age e ia kia lautolu ko e lagaua ia, kua pehe age, Kaeke ke ha ia au a mutolu, mo e fanogonogo a mutolu ke he haku tau kupu, kia ta mai e mutolu e tau ulu he tau tagata ko e tau tama tane he iki ha mutolu, ti o mai ai a mutolu kia au ki Isereelu ke he magaaho pehenai a pogipogi. Ha ha i ai foki e tau tama he patuiki ko e tokofitugofulu e tagata mo e tau iki he maga ne leveki a lautolu.

7 Kua hoko age e tohi kia lautolu, ti uta ai e lautolu e tau tama he patuiki, mo e kelipopo e lautolu a lautolu ko e tau tagata tokofitugofulu, ti fafao e lautolu ha lautolu a tau ulu ke he tau kato, mo e fakafano age kia ia ki Isereelu.

8 Ti fina age ai e fekau, mo e tala age kia ia kua pehe age, Kua ta mai e lautolu e tau ulu he tau tama he patuiki, Ti pehe age a ia, Kia tuku ai e mutolu ke he ua e tumutumu ke he mena ke hu atu ai ke he gutuhala ato a pogipogi.

9 Kua hoko ke he aho a pogipogi ti fina age ai a ia, kua tu atu a ia, mo e pehe age ke he motu oti, Kua tututonu a mutolu, kitiala, ne fakafualoto au ke he haku a iki, ti keli e au a ia; ka ko hai ne keli a lautolu oti nai?

10 Hanai, kia iloa e mutolu nakai to noa ke he kelekele ha mena taha he finagalo a Iehova, ne vagahau mai ai e Iehova ke he magafaoa a Ahapo; ka kua eke e Iehova e mena ne vagahau mai ai e ia ke he hana fekafekau ko Elia.

11 Ti keli e Iehu a lautolu oti ne toe he magafaoa a Ahapo i Isereelu, katoa mo e tau iki oti ha ha ia ia mo e hana tau kapitiga, mo e hana tau ekepoa, ato nakai toe ai ha tagata tokotaha kia ia.

12 Ti matike a ia, mo e fano, ti fano ai a ia ki Samaria, ha i ai a ia ke he fale he tau leveki mamoe ne hifi ai e tau mamoe, ha ha he puhala haia.

13 Ti moua ai e Iehu e tau matakainaga a Ahasaia ko e patuiki a Iuta; ti pehe age a ia, ko hai kia a mutolu? Ti pehe age a lautolu, Ko e tau matakainaga a Ahasaia a mautolu, ko e o hifo foki a mautolu ke fakaalofa ke he fanau he patuiki, mo e fanau he patuiki fifine.

14 Ti pehe age a ia, Kia tapaki moui a a lautolu. Ti tapaki moui e lautolu a lautolu, mo e kelipopo ai a lautolu ke he luo he fale ne hifi ai e tau mamoe, ko e tau tagata tokofagofulu ma ua; nakai ni toka e ia taha ha lautolu.

15 Kua fano kehe a ia he mena ia, ti moua ai e ia a Ionatapu ko e tama a Rakapa, kua fonofono mai kia ia. Ti fakaalofa atu a ia kia ia, kua pehe atu kia ia, Kua tonu nakai hau a loto, tuga ne loto haku mo e loto hau? Ti pehe mai ai a Ionatapu, Haia ni. Kaeke kua pihia, ti ta mai ā hau a lima. Ti ta age āi e ia hana lima; ti ta hake e ia a ia ke fakalataha a laua ke he kariota.

16 Ti pehe atu a ia kia ia, Kia o a tua mo au, ke kitia e koe haku a fakamalolo ha ko Iehova. Ti fakaheke e lautolu a ia ke he hana kariota.

17 Kua hoko a ia ki Samaria ti keli ai e ia a lautolu oti ne toe he magafaoa a Ahapo i Samaria, ato fakaoti ai e ia a ia, ke lata mo e kupu a Iehova ne vagahau mai ai e ia ia Elia.

18 Ti fakapotopoto ai e Iehu e motu oti, kua pehe age a ia kia lautolu, Ne fekafekau fakatote a Ahapo kia Paala, ka to fekafekau fakalahi e Iehu kia ia.

19 Hanai, kia fakapotopoto mai e mutolu kia au e tau perofeta oti a Paala, ko e hana tau fekafekau oti, katoa mo e hana tau ekepoa oti; aua neke nofo taha; ha ko e eke ne fai e au e poa lahi kia Paala; ko e tagata ka toe nakai moui a ia. Ka kua eke e Iehu e mena ia mo e fakavai, kia fakaotioti ai e ia e tau fekafekau a Paala.

20 Ti pehe age a Iehu, Kia fakamatala a e fakapotopotoaga tapu kia Paala. Ti fakamatala ai e lautolu.

21 Ti fakafano atu e Iehu ki Isaraela oti; ti o mai ai e tau fekafekau oti a Paala, nakai ni toe ha tagata taha nakai hau. Kua huhu atu a lautolu ke he fale a Paala, ti puke namo ai e fale a Paala.

22 Ti pehe age a ia ke he tagata ne leveki e fale ne toka ai e tau tapulu, Ta mai la e tau tapulu ma lautolu oti ko e tau fekafekau a Paala. Ti ta mai ai e ia e tau tapulu ma lautolu.

23 Ti hu atu ai a Iehu ke he fale a Paala ko laua mo Ionatapu ko e tama a Rakapa, ti pehe age a ia ke he tau fekafekau a Paala, Kumi la e mutolu, mo e kitia neke ha i ai ki hinei mo mutolu e tau fekafekau a Iehova, ka ko e tau fekafekau a Paala hoko lautolu.

24 Ti huhu atu a lautolu ki fale ke eke ai e tau poa mo e tau poa huhunu; ti kotofa ai e Iehu i fafo e tau tagata tokovalugofulu, kua pehe age a ia, Kaeke ke hao taha he tau tagata kua ta mai e au ke he tau lima ha mutulu, ko ia ke fakahao e tagata, to uta ai hana moui ke totogi aki a ia.

25 Kua oti e poa huhunu he eke, ti pehe age a Iehu ke he kau leoleo, mo e tau takitaki kau, Huhu atu a, kia keli e mutolu a lautolu, aua neke hu atu ki fafo taha. Ti keli ai e lautolu a latuolu ke he pelu, ti liti he kau leoleo mo e tau takitaki kau a lautolu ki fafo. Ti o ai a lautolu ke he maga he fale a Paala.

26 Ti ta mai ai e lautolu ki fafo e tau tupua he fale a Paala mo e huhunu ai e lautolu.

27 Ti ulu moumou e lautolu e tupua a Paala, kua ulu moumou foki e lautolu e fale a Paala, ti eke ai mo hala he vao kua hoko ni ke he aho nai.

28 Ne fakaoti ai pihia e Iehu a Paala i Isaraela.

29 Ka ko e tau hala a Ierepoamo ko e tama a Nepata ne fakatupu ai e hala kia Isaraela, nakai fano kehe a Iehu mo e tau mena ia, ko e tau punua povi auro haia ha ha i ai i Peteli katoa foki mo Tano.

30 Ti pehe mai a Iehova kia Iehu, Kua mitaki hau a tau mena ne eke ha kua eke e koe e tau mena tonu ki mua haku, mo e eke ai e koe ke he magafaoa a Ahapo ke lata mo e tau mena oti ne loto au ki ai, ko e mena ia ke nonofo ai e tama tane hāu ke he nofoaiki a Isaraela ke hoko ke he hau ne fa.

31 Ka e nakai omaoma a Iehu ke fano ke he tau fakatufono a Iehova ko e Atua a Isaraela mo e hana loto katoa; nakai fano kehe a ia mo e tau hala a Ierepoamo ne fakatupu ai e ia e hala kia Isaraela.

32 Ko e vaha ia ne kamata ai e Iehova ke fakatote a Isaraela; ti keli e Hasaeli a lautolu ke he tau fahi oti a Isaraela.

33 Ke kamata i Ioritana ke he fahi ne hake ai e la, ko e motu oti a Kiliata, ko e tau tagata he magafaoa a Kato, mo e tau tagata he magafaoa a Reupena; katoa mo e tau tagata he magafaoa a Manase, ke kamata i Aroeru ne tata age ke he vailele ko Aranona, ko Kiliata katoa mo Vasana.

34 Ko e tau mena ne toe ne eke e Iehu mo e tau mena oti ne eke e ia, katoa mo e hana malolo oti, nakai kia tohi ia ke he tohi ne toka ai e tau tala ke he nofoaga he tau patuiki a Isaraela?

35 Kua takoto foki a Iehu fakalataha mo e hana tau matua; ti tanu e lautolu a ia i Samaria; ti eke ai hana tama ko Iehoahasa mo patuiki ke hukui aki a ia.

36 Ko e tau aho foki ne eke a Iehu mo patuiki a Isaraela i Samaria, ne uafulu ma valu e tau.