Ieremia

22 KUA vagahau mai pehe a Iehova, Kia hifo a a koe ke he fale he patuiki a Iuta mo e vagahau ai e koe ke he mena ia e tau kupu nai,

2 Kia pehe atu a koe, Kia fanogonogo mai a mutolu ke he kupu a Iehova, ko e patuiki a Iuta na e, kua nofo ke he nofoaiki a Tavita, mo e hau a tau fekafekau, katoa mo e hau a motu kua huhu mai he tau gutuhala nai;

3 Kua vagahau mai pehe a Iehova, Kia eke e mutolu e fakafiliaga mo e mahani tututonu, mo e laveaki e mutolu a ia ne fofo ai hana tau mena mai he lima he tagata favale; aua neke ekefakakelea atu, aua neke favale atu ke he tagata kehe, mo ia ne mamate hana tau matua, mo e fifine takape; ti ua fakamaligi ai e mutolu ke he mena nai e toto he tagata nakai hala.

4 Ha ko e mena kaeke ke eke e mutolu e mena nai, ti huhu mai ai ke he tau gutuhala he fale nai e tau patuiki kua nonofo ke he nofoaiki a Tavita, kua heke e tau kariota mo e tau solofanua, ke takitaha mo e hana tau fekafekau, mo e hana motu.

5 Ka ko e mena kaeke ke nakai fanogonogo a mutolu ke he tau kupu nai, Kua pehe mai a Iehova, kua omonuo ai au kia au, to eke ai e fale nai mo mena kua moumou.

6 Ha kua vagahau mai pehe a Iehova, ke he magafaoa he patuiki a Iuta, Kua eke a koe mo Kiliata kia au, ko e tapunu mouga i Lepanona; ka ko e moli, to eke e au a koe mo tutakale, ko e tau maga kua nakai nofo ai taha.

7 To kotofa e au e tau tagata moumou mena ke takitaha e tagata mo e hana tau kanavaakau; to hio e lautolu hau a tau arasi ne mua he mitaki mo e liti ai ke he afi.

8 Ti o age e tau motu loga ke he maga nai, mo e pehe age e taha ke he taha, Ko e heigoa e mena kua eke ai pihia e Iehova ke he maga lahi nai?

9 Ti pehe age ai a lautolu, Ha kua tiaki e lautolu e maveheaga a Iehova ha lautolu a Atua, mo e fakaveveli fakafohifo ai a lautolu ke he tau atua kehe, mo e fekafekau ki ai.

10 Aua neke tagi a mutolu ha ko ia ne mate, ti aua neke mānu a mutolu ha ko ia; ka kia tagi fakalahi a ha ko ia kua fano kehe; ha ko e mena nakai tuai liu mai a ia, to nakai kitia foki e ia e motu ne fanau ai a ia.

11 Ha kua vagahau mai pehe a Iehova kia Saluma ko e tama a Iosia ko e patuiki a Iuta, ko ia ne eke mo patuiki ke hukui aki a Iosia ko e matua hana, ko ia ne fina atu ai he mena nai, ti nakai liu mai a ia ki ai.

12 Ha ko e mena mate ai a ia ke he motu ne uta e lautolu a ia ki ai, ti nakai kitia foki e ia e motu nai.

13 Oi te fakaalofa kia ia kua ati hana fale mo e mahani hepehepe, mo e eke ai e ia hana tau poko tapa ki luga mo e mahani nakai lata; kua eke noa e ia mo fekafekau hana e tagata ne katofia mo ia, mo e nakai age kia ia hana palepale;

14 Kua pehe age a ia, To eke e au maku e fale lahi mo e tau poko lalahi tapa ki luga; kua eke ai foki e tau fakamaama māna, mo e laupapa aki ke he tau arasi, mo e vali aki e vali kula.

15 To tumau kia a koe mo patuiki, ha kua eke a koe ke mua he ta e tau fale arasi? Nakai kia kai he matua hau mo e inu mo e eke e fakafiliaga mo e mahani tututonu? ti monuina ai a ia.

16 Ne fakafili e ia e taufetoko he tagata ne matematekelea mo e tagata nofogati; ti monuina ai a ia. Nakai kia ko e iloa au hanā? kua pihia mai a Iehova.

17 Ka e nakai hagao atu hau a tau mata mo e hau a loto ke he taha mena ka ko e hau a tau koloa, mo e fakamaligi ai e toto he tau tagata nakai hala, mo e favale, mo e fakamamahi tagata, ke eke ai.

18 Ko e mena ia kua vagahau mai pehe a Iehova ke he tau mena ke hoko kia Iehoakima ko e tama a Iosia ko e patuiki a Iuta, To nakai tagi tatuki a lautolu kia ia, pehe, Oi te! haku matakainaga na e. Oi te! haku mahakitaga na e. Ti nakai tagi tatuki a lautolu kia ia, pehe, Oi te! ko e iki na e. Oi te! ko e lilifu e.

19 To tanu a ia tuga he tanu e asini; to toho a ia mo e tiaki ai ki tua he tau gutuhala a Ierusalema.

20 Kia hake a ki Lepanona mo e tagi, kia leo lahi a a koe i Vasana, kia tagi foki a koe mai Aperima; ha kua fakaoti a lautolu oti ne manako kia koe.

21 Ne vagahau atu e au kia koe he monuina a koe; ka e pehe mai a koe, Nakai fanogonogo atu e au. Ko e hau a mahani haia, tali mai he vaha tote hau, kua nakai fanogonogo mai a koe ke he haku a leo.

22 To kai he matagi hau a tau leveki mamoe oti; ti o ai ke he paeaaga a lautolu kua manako kia koe; ti mā ai a koe mo e fakahahaku ha ko e hau a tau mahani kelea oti.

23 Ko koe na kua nofo i Lepanona, mo e eke hau a fata ke he tau arasi, fakaalofa kia koe ka hoko kia koe e mamahi, tuga ne mamahi fanau he fifine kua fatu.

24 Kua pehe mai a Iehova, Kua moui au, pete he eke e au a Konia ko e tama a Iehoakima ko e patuiki a Iuta mo fakamau fakamailoga ke he haku lima matau; ka to hamu mai e au a koe he mena ia.

25 To ta atu foki e au a koe ke he tau lima ha lautolu kua kumi a koe ke tamate, mo e tau lima ha lautolu kua matakutaku ai a koe, ko e tau lima ni a Nepukanesa ko e patuiki a Papelonia, mo e tau lima he tau tagata Kaletaia.

26 To vega e au a mua mo e hau a matua fifine ne fanau a koe ke he motu kehe, nakai ko e motu ne fanau ai a mua; to mamate ai foki a mua ke he mena ia.

27 Ka ko e motu kua manako e tau loto ha lautolu ke liliu mai ki ai, nakai ni liliu mai ki ai a lautolu.

28 Ko e kapiniu kua tiaki mo e malipilipi kia e tagata nai ko Konia? Ko e kapiniu kia ia kua nakai fiafia ki ai? Ko e heigoa e mena kua vega ai a lautolu, ko ia, mo e hana fanau, mo e tiaki a lautolu ke he motu kua nakai iloa e lautolu?

29 Ko e lalolagi na e, ko e lalolagi na e, ko e lalolagi na e, kia fanogonogo mai a ke he kupu a Iehova.

30 Kua vagahau mai pehe a Iehova, Kia tohi e mutolu e tagata nai kua nakai fai tama, ko e tagata nakai monuina ke he tau aho he hana moui; ha ko e mena nakai monuina taha he hana fanau, to nakai nofo ke he nofoaiki a Tavita, ti nakai tuai pule i Iuta.